Sa bilog nga kalibutan, madamo ang interesado sa vegan nga pagkabuhi.

•   “Ang vegan nga pagkabuhi isa ka pagpati sa diin ang mga tawo nga nagasunod sini nagatinguha gid nga likawan ang pagpamintas kag pagkaon sang mga sapat, paggamit sang panit sini para himuon nga bayo, ukon sa iban pa nga rason.”—The Vegan Society.

 Ang pila ka tawo nangin vegan indi lang bangod nagaulikid sila sa mga sapat kundi gusto man nila nga proteksionan ang palibot, ang ila panglawas, ukon bangod sa ila relihion.

•   “Ang vegan nga pagkabuhi lain gid sa iban nga mga diet bangod ginakabig ini bilang isa ka pagpati, isa ka desisyon base sa moral, kag isa ka paagi sang kada tawo para mabag-o ang kalibutan.”—Britannica Academic.

 Ang vegan bala nga pagkabuhi ang solusyon sa mga problema sa kalibutan? Ano ang ginasiling sang Biblia?

 Mabasa sa Biblia nga para sa aton Manunuga, si Jehova nga Dios, a ang mga tawo mas mataas sangsa mga sapat kag ginhatagan niya sila sang awtoridad nga dumalahan ang mga sapat. (Genesis 1:27, 28) Sang ulihi, gintugutan sang Dios ang mga tawo nga kaunon ang mga sapat. (Genesis 9:3) Pero, wala niya ginapasugtan ang pagpamintas sa mga sapat.—Hulubaton 12:10.

 Base sa Biblia, personal nga desisyon kon bala makaon kita sang karne ukon indi. b Bisan ano man ang aton pilion, wala ini sing epekto sa aton relasyon sa Dios. (1 Corinto 8:8) Indi dapat pagpakalainon ang desisyon sang isa bangod lang sa ginpili niya nga kaunon.—Roma 14:3.

 Ginasugid sang Biblia nga bisan ano man ang aton pilion nga pagkabuhi, indi ini makasolbar sang mga problema sa kalibutan. Ang kabangdanan sang madamo nga problema subong ara sa sistema sang pulitika, komunidad, kag ekonomiya sang kalibutan, nga wala gid sang makasolbar. Ang Biblia nagasiling:

•   “Ang tiko indi na mapatadlong.”—Manugwali 1:15.

 Solbaron sang aton Manunuga ang mga problema naton subong. Ginasugid sang Biblia kon ano ang iya himuon.

•   “Kag nakita ko ang isa ka bag-o nga langit kag ang isa ka bag-o nga duta; kay ang nahauna nga langit kag ang nahauna nga duta nagtaliwan na, kag ang dagat wala na.”—Bugna 21:1.

 Buslan sang Dios ang gobierno sang tawo, ukon ang “nahauna nga langit,” sang “bag-o nga langit,” ang iya Ginharian sa langit. Dulaon sang iya Ginharian ang “nahauna nga duta,” ang malain nga mga tawo, kag magagahom ini sa “bag-o nga duta,” ukon sa mga tawo nga gusto magpasakop sa iya awtoridad.

 Sa idalom lang sang paggahom sang Ginharian sang Dios nga matun-an sang mga tawo kon paano magkabuhi nga indi na pagpintasan ang mga sapat kag proteksionan ang palibot.—Isaias 11:6-9.