Sang Enero 2021, ginpahibalo sang Nagadumala nga Hubon ang pag-release sang libro nga Magkabuhi sing Wala Katapusan! a nga gamiton para sa pag-Bible study. Ano ang imo reaksion sa sini nga pahibalo? Si Matthew nga taga-Canada nagsiling: “Eksayted gid ako! Nagdugang pa gid ini samtang nagapamati ako sang mga talk kag nagatan-aw sang mga video nga nagapaathag kon ngaa ginhimo ini nga libro kag kon paano ini ginpatestingan sa mga utod. Gusto ko na gid makita ini nga libro kag gamiton ini dayon.”

 Ang Magkabuhi sing Wala Katapusan! may bag-o nga pamaagi sa pagdumala sang mga Bible study. Pero, indi lang amo sina ang kinalain sining bag-o nga libro sangsa mga libro nga ginagamit sa pag-Bible study sadto. Kon may naimprinta ka nga Magkabuhi sing Wala Katapusan!, mahimo natalupangdan mo na ini kon uyatan mo ang libro. Kon ngaa amo sini, hibaluon naton kon paano ginhimo ini nga libro.

 Mas madamol nga papel. Ngaa dapat madamol ini? Ang Magkabuhi sing Wala Katapusan! may masobra 600 ka colored nga mga piktyur, nga halos napulo ka beses nga mas madamo sangsa Ginatudlo sa Aton nga libro! Ang bag-o nga libro may mas madamo man nga white space ukon mga lugar sa pahina nga wala sing sulat ukon piktyur. Bangod sini, may problema: Kon manipis ang papel, nagasilang ang piktyur sa pihak. Para indi ini matabo, ang mga utod sa International Printing Department (IPD), sa Wallkill, New York, U.S.A., nag-testing sang apat ka klase sang papel nga ginagamit naton subong sa aton mga imprintahan. Gintan-aw sang Writing Committee sang Nagadumala nga Hubon ang kada sampol kag ginpili nila ang mas madamol nga klase sang papel. Ini nga papel 16 porsiento nga mas mahal sangsa mga papel nga ginagamit naton sa kalabanan naton nga mga publikasyon. Kon gamiton ini nga papel, indi na magsilang ang mga piktyur sa likod sang pahina, gani malikawan nga ma-distract ang mga Bible study nga nagabasa sang Magkabuhi sing Wala Katapusan!

 Lain nga klase sang pag-laminate sang kober. Ang kober sang bag-o nga libro indi pareho sa kober sang iban nga libro kay lain ang pag-laminate sini. Imbes nga gamiton ang normal gloss laminate, ang bag-o nga libro may matte finish, amo nga nangin maathag pa gid ang artwork sa kober. Ang laminate nagabulig man nga indi dayon magdaan ang kober sang libro bisan pirme ginagamit. Pero ang matte laminate mas mahal sing asta sa lima ka beses sangsa gloss laminate. Gani nagbuligay ang pila ka branch para makabakal sila sing mas barato nga matte finish.

 Ngaa nga ginpili ining mas mahal nga mga materyales? Ang isa ka brother sa IPD nagpaathag: “Ginapaabot namon nga gamiton pirme ini nga libro, gani gusto namon nga mangin presentable ini gihapon bisan pirme ginagamit.” Si Eduardo, nga nagaobra sa Printery Office sa branch sang Brazil, nagsiling: “Nalipay gid kami nga gingamit sang organisasyon ni Jehova ang de-kalidad nga mga materyales para ini nga libro mangin matahom, mabakod, kag manami kaptan, pero ginagamit man nila sing maalamon ang mga donasyon.”

 Nagsugod ang pag-imprinta sang Magkabuhi sing Wala Katapusan! sang Marso 2021. Ginhimo ini sa tion sang COVID-19 nga pandemic, amo nga indi ini mahapos. Gin-lockdown ang Bethel, gani indi makabulig ang mga Bethel commuter sa aton mga imprintahan, kag indi man puede magtawag sang bag-o nga mga brother para mangin Bethelite. Bangod sini, kulang ang mga personnel sa pila ka imprintahan, kag ang iban nga imprintahan temporaryo nga ginpauntat bangod sang mga restriksion sang gobierno.

 Paano nasolbar ini nga mga problema? Sang puede na mag-imprinta, ang mga kauturan sa iban nga departamento sang Bethel temporaryo nga gin-asayn sa pagbulig sa imprintahan. “Daku gid ang nabulig sining mga kauturan nga nagsakripisyo kag nagtuon sang ila bag-o nga mga asaynment, gani nakaimprinta kami,” siling ni Joel, nga nagaobra sa IPD.

 Bisan pa sang mga problema, nakaimprinta na kami sing minilyon ka kopya sang Magkabuhi sing Wala Katapusan! Para mahimo ini, kinahanglan namon ang madamo nga materyales, lakip ang mga printing plate, laminate film, papel, tinta, kag papilit. Sa sulod lang sang una nga lima ka bulan nga pag-imprinta, masobra na sa $2.3 ka milyon (U.S.) ang nagasto sa mga materyales lang. Para makakinot, ginaimprinta lang namon ang ginaorder nga libro sang mga kongregasyon.

 Ano ang masiling sang mga nagatudlo sa Biblia kag sang ila mga Bible study parte sa sining bag-o nga libro? Si Paul, nga isa ka brother sa Australia nagsiling: “Kanami gid gamiton sang Magkabuhi sing Wala Katapusan! amo nga eksayted ako pirme nga mag-Bible study. Makagalanyat gid ang hitsura sang libro kag interactive ini. May maathag ini nga mga impormasyon, mga pamangkot nga makapahunahuna, video, piktyur, tsart, kag mga puede himuon sang Bible study. Kanami gid sini nga libro gani gusto ko nga mag-uswag pa gid sa akon pagtudlo.”

 Ang isa ka Bible study sa United States nagsiling: “Nanamian gid ako sining bag-o nga libro. Mas naintiendihan ko ang panguna nga mga punto paagi sa mga piktyur. Na-touch ako sang mga video kag napahulag ako sini nga sundon ang akon natun-an.” Ining Bible study ginastadihan sing duha ka bes kada semana kag regular nga naga-attend sa mga miting sang kongregasyon.

 Minilyon pa ka kopya sang Magkabuhi sing Wala Katapusan! ang dapat imprintahon sa madamo nga lenguahe. Subong, gin-aprobahan na sang Nagadumala nga Hubon ang pag-imprinta sini nga libro sa 710 ka lenguahe, nga mas labaw sing 340 sangsa Ginatudlo sa Aton nga libro!

 Sa diin naghalin ang ginagasto sa sini nga pag-imprinta? Sa mga donasyon sa worldwide work, nga ginahimo gamit ang sarisari nga paagi sa pag-donate sa donate.pr418.com. Ginapasalamatan gid namon ang imo kaalwan, nga nakabulig sa paghimo sang mga libro nga ginagamit sa pag-Bible study para sa mga gusto magtuon parte kay Jehova kag ‘magkabuhi sing wala sing katubtuban.’—Salmo 22:26.