Kada tuig, ginaimbitar ang pila ka special full-time servant halin sa lainlain nga pungsod sa bilog nga kalibutan para mag-eskwela sa Watchtower Bible School of Gilead, nga ginahiwat sa Watchtower Educational Center sa Patterson, New York. a Matun-an diri sang mga estudyante kon paano mangin epektibo sa ila sarisari nga asaynment sa organisasyon ni Jehova. Ini nga paghanas magabulig sa ila nga mapalig-on kag mapabakod ang mga kongregasyon kag mga sanga sa bilog nga kalibutan.

 Ang Gilead isa gid ka internasyonal nga eskwelahan. Halimbawa, ang ika-147 nga klase sang 2019, may 56 ka estudyante halin sa 29 ka pungsod. Ang mga nagaeskwela sa Gilead mga Bethelite, manugtatap sang sirkito, misyonero, ukon mga espesyal payunir.

 Madugay pa antes magsugod ang klase, madamo na sang dapat ihanda. Halimbawa, ang World Headquarters Travel Department (WHQ Travel) amo ang nagabakal sang mga tiket sang mga gin-imbitar nga mag-eskwela. Sa ika-147 nga klase sang Gilead, ang aberids nga plete sang kada estudyante halin sa iban nga pungsod pakadto sa Patterson kag pauli sa ila mga pungsod mga $1,075 (U.S.). Ang mga estudyante halin sa Solomon Islands nagakinahanglan sang apat ka flight pakadto sa Patterson kag sang tatlo ka flight pauli—buot silingon magabiyahe sila sing sobra 35,400 kilometros! Ang gasto sa ila plete mga $2,300 (U.S.) kada estudyante. Para makakinot, ang WHQ Travel nagagamit sing isa ka program para maka-book sang mas barato nga mga tiket. Kag bisan na-reserve na nila ang tiket, ini nga program sa kompyuter padayon gihapon nga nagapangita sang mas barato pa gid nga tiket sa masunod nga mga semana ukon mga binulan pa gani. Ginagamit man sang WHQ Travel ang airline mileage nga gina-donate sang mga kauturan.

 Madamo nga estudyante ang nagakinahanglan sang visa para makasulod sa United States. Gani ginabuligan sila sang World Headquarters Legal Department nga makakuha sang student visa. Ang visa kag ang registration fee sang kada estudyante nagalab-ot sa $510 (U.S.).

 Paano kita nagabenepisyo sa paghanas sa sining mga estudyante? Si Hendra Gunawan isa ka gulang sa Southeast Asia. May ka-kongregasyon sia nga mag-asawa nga naggradweyt sa Gilead. Sia nagsiling: “Sadto, wala sing regular payunir sa amon kongregasyon. Pero sang nag-abot ining mag-asawa, nalatnan ang mga kauturan sang ila kapisan gani nagpayunir man sila. Sang ulihi, ang isa ka sister sa amon kongregasyon nag-eskwela pa gani sa School for Kingdom Evangelizers!”

 Kaupod sa obra ni Sergio Panjaitan sa isa ka Bethel sa Southeast Asia ang pila ka utod nga nakagradweyt sa Gilead. Nagsiling sia: “Indi lang sila ang nakapanginpulos sa paghanas sa ila, pati man kami. Kadamo gid sang ila natun-an! Pero imbes nga ipadayawdayaw ang ila natun-an, ginatudlo nila ini sa amon. Gani napalig-on nila kami, kag bilang resulta napalig-on man namon ang iban.”

 Sa diin nagahalin ang pondo nga ginagasto para sa sini nga eskwelahan? Sa mga donasyon sa worldwide work, nga ang kalabanan ginahatag gamit ang isa sa mga paagi nga makita sa donate.pr418.com. Salamat gid sa imo maalwan nga donasyon nga nagasuportar sa sining internasyonal nga eskwelahan.