“Sang una daw ka imposible gid pamensaron nga ang espirituwal nga pagkaon matigayon ta sa digital format.” Nagaugyon ka bala sa sina? Ginsiling ina ni Brother Geoffrey Jackson sa iya makapalig-on nga talk sa 2020 Update sang Nagadumala nga Hubon #6. Nagsiling pa sia: “Pero subong sigurado gid nga mamensar kita, Ano na lang ayhan ang matabo sa aton sa sining pandemic kon wala ang JW Library? Tinuig na gali kita nga ginahanda ni Jehova para sa mga hitabo kaangay sini.”

 Paano kita ginahanda ni Jehova? Ano ang nadalahig sa paghimo sang JW Library app, kag ano ang kinahanglan himuon para mamentinar kag mapanami pa gid ini?

 Sang Mayo 2013, ginpangabay sang Nagadumala nga Hubon ang MEPS Programming, isa ka department sa world headquarters, nga maghimo sing app kag ibutang sa sini nga app ang gin-revised nga New World Translation. “Sina nga tion, wala pa gid kami sing may nahimo nga mobile app nga ara sa bisan ano nga app store,” siling ni Paul Willies, nga nagatrabaho sa MEPS Programming. “Pero naghimo kami sing isa ka team, gin-untatan namon anay ang iban nga mga project, kag nagbuligay kami sang iban nga mga department para magdesinyo kag maghimo sing app kag sang mga unod sini. Pirme gid namon ini ginapangamuyo, kag pagligad lang sang lima ka bulan gin-release ini nga app sa annual meeting. Maathag nga ginbuligan gid kami ni Jehova!”

 Ang masunod amo ang paghimo sini nga app nga mangin library nga may mas madamo nga publikasyon kag mabasa sa mas madamo nga lenguahe. Sang Enero 2015, ang kalabanan naton nga publikasyon sa English available na sa sini nga app, kag pagligad lang sang anom ka bulan, ma-download na ini nga mga publikasyon sa ginatos ka lenguahe.

 Sugod sadto, ginpanami pa gid sang aton mga kauturan ang app. Ginbutang nila diri ang mga video, kag gintingob nila sa isa lang ka tab ang tanan nga publikasyon kag media nga ginagamit sa mga miting sa kongregasyon. Kag kon nagabasa ang isa sing Biblia, mabuksan na niya sing diretso ang mga reperensia sa Research Guide halin mismo sa bersikulo nga iya ginabasa.

 Ginabuksan ang JW Library sa 8 ka milyon ka gadyet kada adlaw kag sa sobra 15 ka milyon ka gadyet kada bulan! Ano ang mga kinahanglan himuon para padayon nga magamit ang app sa sina nga mga gadyet? Si Brother Willies nagsiling: “Indi gid matapos ang paghimo sang bisan ano nga mobile app. Pirme namon ginadugangan sang bag-o nga mga feature ang JW Library para mas ma-enjoy sang mga user ang paggamit sini. Bangod pirme gina-update ang mga operating system sang mga gadyet, kinahanglan man nga pirme namon i-adjust ang app para padayon ini nga mangin compatible sa bag-o nga mga operating system. Kinahanglan man namon nga mentinaron kag i-upgrade ang amon internal software samtang nagadugang ang mga publikasyon kag mga rekording sa JW Library.” Kon tingbon ang tanan nga lenguahe, may mga 200,000 na subong ka publikasyon kag sobra 600,000 ka audio kag video recording sa JW Library!

 Para padayon nga manghikot ang app, indi lang mga computer equipment ang kinahanglanon. Kinahanglan man magbakal sang pila ka software license. Ang isa ka license mahimo magbili sang $1,500 (U.S.) kada tuig. Dugang pa, kada tuig ang MEPS Programming nagagasto sing $10,000 (U.S.) sa mga gadyet halin sa sarisari nga mga manufacturer para siguraduhon nga ang app wala sing problema sa bag-o nga mga kompyuter, tablet, kag mga cell phone.

 Bangod sa JW Library nabuhinan ang aton ginagasto para sa pag-print, pag-bind, kag pagpadala sang mga literatura. Halimbawa, binagbinaga ang bukleta nga Pag-usisa sa Kasulatan Adlaw-adlaw. Halos 12 ka milyon ka kopya sang Pag-usisa sa Kasulatan Adlaw-adlaw—2013 ang gin-imprinta. Pero sang 2020, mga lima na lang ka milyon ka bukleta ang gin-imprinta naton, bisan pa nga sa sina nga tuig, ang mga manugbantala sa bilog nga kalibutan mas madamo sing mga 700,000. Ngaa nagbuhin? Kay kalabanan sa aton mga kauturan sa JW Library na nagabasa sing daily text. a

 Daku gid ang nabulig sang JW Library sa mga nagagamit sini. Si Geneviève, nga taga-Canada, nagsiling nga nakabulig gid sa iya ang app nga mangin regular sia sa iya personal study. “Sa tuod lang, kon kinahanglan ko pa tipunon ang tanan nga libro nga akon tun-an, sa banta ko indi gid ako maka-personal study kada aga,” siling niya. “Pero bangod sa app, ara na sa akon tablet ang tanan nga kinahanglan ko sa akon pagtuon. Bangod sa akon pagtuon, nagbakod pa gid ang akon pagtuo kag mas nangin suod pa gid ako kay Jehova.”

 Daku gid ang nabulig sang app labi na gid sa sining tion sang COVID-19 nga pandemic. Si Charlyn, nga taga-United States, nagsiling: “Bangod sa paglapta sang COVID-19 sa bilog nga kalibutan, sobra na isa ka tuig nga wala ’ko nakakita sang naimprinta nga bag-o nga mga publikasyon. Pero ginbuligan kita sang JW Library nga padayon nga mangin mabakod ang aton pagtuo, kag ginapasalamatan ko gid si Jehova sa sini nga regalo.”

 Madamo gid ang maka-relate sa ginsiling ni Faye, nga taga-Pilipinas. Nagsiling sia: “Ginagamit ko ini nga app para padayon ako nga mangin suod kay Jehova. Amo ini ang ginabasa ko pagbugtaw ko sa aga. Amo ini ang ginapamatian ko samtang nagaobra ako sang mga ulubrahon sa balay. Amo ini ang ginagamit ko sa pagtuon para sa mga miting. Amo ini ang ginagamit ko para maghanda sa akon mga Bible study. Kag kon tulutawhay ako nagatan-aw man ako sang mga video diri. Kag kon nagapila ako, nagabasa ako sing mga artikulo ukon sing Biblia diri. Daku gid ini nga bulig.”

 Daku man ang bulig sini nga app sa aton ministeryo. Halimbawa, samtang naga-preaching, gusto gamiton sang isa ka sister sa Cameroon ang teksto nga gingamit sang isa ka sister sang nagligad nga semana. Pero nalipat sia kon ano ’to nga teksto. Sia nagsiling: “Maayo lang gid kay nadumduman ko ang pila ka tinaga sa sini nga teksto. Ginbuksan ko ang app, nagkadto sa Biblia, kag gin-search ko ini nga mga tinaga. Dayon nakita ko ang teksto. Nakabulig gid sa akon ang app nga makita ang mga teksto nga kon kaisa nagakalipatan ko.”

 Bangod sa imo maalwan nga mga donasyon gamit ang sarisari nga paagi sa donate.pr418.com, nahimo namon ang JW Library app, namentinar ini, kag napanami para magamit sang mga kauturan sa bilog nga kalibutan. Salamat sa imo kaalwan.

1. Oktubre 2013—Gin-release ang app nga may unod nga gin-revised nga New World Translation

2. Enero 2015—Available na sa English ang iban nga mga publikasyon, kag sang ulihi may mga publikasyon naman nga available sa ginatos ka lenguahe

3. Nobiembre 2015—Gindugang ang feature nga puede na ma-highlight ang mga tinaga

4. Mayo 2016—Gindugang ang Meetings nga tab

5. Mayo 2017—Gindugang ang feature nga puede na maka-note

6. Disiembre 2017—Gindugang ang Study Bible

7. Marso 2019—Puede na maka-download sang mga audio recording, ma-stream ang video, kag ma-access ang mga reperensia sa Research Guide

8. Enero 2021—Gindugang ang matahom nga mga feature para sa Magkabuhi sing Wala Katapusan! nga libro