Gusto gid sang Nagadumala nga Hubon nga magtukod sang mga bilding para buligan kita sa pagbantala sang Ginharian nga hilikuton. Halimbawa sang 2023 nga tuig sang pag-alagad, ang mga korporasyon nga ginagamit sang branch office sang mga Saksi ni Jehova naggasto sang sobra 500 ka milyon ka dolyar para magbakal, magtukod, mag-renovate, kag magmentinar sang mga Kingdom Hall kag Assembly Hall sa bilog nga kalibutan. a Dugang ini sa gingasto sang mga kongregasyon sa bilog nga kalibutan para maatipan ang ila mga Kingdom Hall.

 Dugang pa, ang mga pondo nga gin-donate ginagamit man sa pagtukod kag pag-atipan sang mga pasilidad sang branch, nga nagabulig sa pag-organisar kag pagsuporta sa pagbantala nga hilikuton sa bilog nga kalibutan. Ginpasimple man ang mga hilikuton sa branch office para magamit ang iban nga pondo para suportahan ang pagtukod kag pag-renovate sang mga Kingdom Hall kag Assembly Hall. Pero, daku gihapon nga kuarta ang kinahanglan para kay-uhon, i-renovate, ukon isaylo ang mga pasilidad sang branch. Ngaa importante ini nga mga proyekto? Paano ginasuportahan sang mga branch ang importante nga hilikuton sa pagbantala? Hibaluon naton.

 Madamo nga mga branch office ang sobra na 30 ukon 40 ka tuig! Si Nicholas, halin sa Worldwide Design/Construction Department, nagsiling: “Bisan namentinar sing maayo ang bilding, nagadaan man ini. Ang pag-renovate nagabulig para magdugay ang mga bilding para magamit pa ini gihapon.”

 Ang mga bilding sang Bethel kinahanglan man i-renovate para masuportahan ang nagabag-o nga mga kinahanglanon sang organisasyon. Sa bilog nga kalibutan, madasig ang pagdamo sang mga manugbantala sa madamo nga lugar sang ginpatindugan sila sang mga branch office. Para masuportahan ini nga pagdamo, nagakinahanglan sang madamo nga volunteer para mag-obra sa sini nga mga opisina. Gani, ang mga bilding sa Bethel nga daw insakto lang ang kadakuon sang una, naggutok na subong!

 Importante man ang safety. Bangod nagakabuhi na kita sa katapusan nga mga adlaw sini nga sistema, mas nagadamo ang kalamidad nga posible makahalit sa aton. (Lucas 21:11) Kon gamiton naton ang pinakabag-o nga paagi sa pagpanukod, makabulig ini nga mangin safe ang pasilidad para sa mga nagatrabaho sa sini. Ini nga mga pagbag-o makabulig man nga mangin mas mahapos sa mga utod nga nagagamit sini nga mga bilding nga mag-organisar sang mga pagbulig kon may kalamidad kag padayon nga suportahan ang pagbantala nga hilikuton pagkatapos sang kalamidad.

 Paagi sa direksion sang Nagadumala nga Hubon, sang 2023 nga tuig sang pag-alagad, naghimo ang mga utod sang pila ka pagpanukod sa 43 ka branch. Buot silingon nga halos katunga sang tanan nga pasilidad sang Bethel sa bilog nga kalibutan ang may ginahimo nga pagpanukod. Ari ang pila ka halimbawa nga nagapakita nga importante ang pagpanukod nga ginahimo.

 Angola. Si Matt, miembro sang Branch Committee sa Angola, nagsiling: “May pribilehiyo kami nga makita nga nagakatuman ang tagna sa Hageo 2:7 sa espesyal nga paagi. Sa sulod lang sang pulo ka tuig, nagdamo ang amon mga manugbantala sing mga 60 porsiento! Para masuportahan ang mga manugbantala, dapat dugangan ang kadamuon sang pamilya Bethel sing tatlo ka pilo. Pero, bangod kulang ang mga pasilidad, limitado lang ang maimbitar namon para mag-obra diri. Bangod sini, madamo sang ginaobra ang mga Bethelite kag pirme sila naga-overtime.”

 May gin-asayn nga mga brother para hibaluon kon ano ang puede himuon para madugangan ang mga pasilidad sang branch. Sa primero, nagpensar sila nga ang madasig kag praktikal nga solusyon amo nga i-renovate ang bilding nga ginagamit na nga daan sang branch. Pero pagkatapos sang ila pag-research, narealisar nila nga ang pag-renovate, indi amo ang pinakamaayo nga paagi para magamit ang gin-donate nga mga pondo. Ginrekomendar nila nga baklon kag i-renovate ang bilding nga malapit lang sa branch. “Sang ginpresentar sa Branch Committee ang plano sa pagbakal kag pag-renovate sang sina nga bilding, nabalaka kami nga basi indi ini maggamit sing insakto pareho sa bilding nga kami mismo ang matukod,” siling ni Matt. “Pero subong nakita namon nga amo gid ini ang kinahanglan namon. Ginpakamaayo ni Jehova ini nga desisyon.”

 Sa ulihi, mahimo nga kinahanglan pa sang branch sa Angola ang dugang nga pasilidad. Pero, ang bag-o nga bilding, kag ang modular nga mga dalayunan sa Bethel kag ang gin-arkilahan nga mga apartment sa gua, nakabulig sa branch office para padayon nga suportahan ang madasig nga pagdamo sang mga manugbantala.

 Japan. Ang panguna nga mga bilding sa branch gintukod mga 40 ka tuig na ang nagligad kag ang kalabanan wala pa gid nakaagi renovate. Maayo man ang pagmentinar sa mga pasilidad, pero bisan pa sa sini, nagamit na ining mga bilding sing mas malawig nga tion sangsa gindesinyo sa sini. Amo sini ang rason kon ngaa may ginahimo nga daku nga renovation sa sini nga mga bilding.

 Nagbag-o man ang kabuhi sa Bethel pagligad sang mga tinuig. Antes sang 2015, ang tanan nga pagkaon ginahanda para sa pamilya Bethel. Gani, ang madamo nga mga kuarto sa Bethel sa Japan, may gamay lang nga “kusina.” Pero subong, ang mga Bethelite na ang nagaluto sang kalabanan nila nga pagkaon. Sang gin-renovate ini, gindugangan sang lugar para sa kusina ang mga kuarto sa Bethel para mas mahapos nga makaluto ang mga Bethelite. Si Kumiko, nga nagaalagad sa branch sa Japan, nagsiling, “Bangod sang kusina, pamatyag ko daw sa balay lang ko, kag nakabulig ini sa akon nga masuportahan pa gid ang bag-o nga mga kahimusan sang Bethel.”

 Ang hilikuton sa branch sa Japan importante gid nga bahin sang bug-os kalibutan nga hilikuton. (Mateo 28:19, 20) Isa ang Japan sa duha lang ka branch nga nagaimprinta sang kompleto nga Biblia. Gani, ang isa ka bahin sang ginahimo nga konstruksion amo ang pag-install sang trimming kag dust collection system para mangin safe ang tanan nga nagaobra sa Printery. Ang pagbakal kag ang pag-install sini nga makina nagabili sing halos isa ka milyon ka dolyar, pero ginasigurado sini nga makapadayon sa pag-imprinta kag pagpadala sang espirituwal nga pagkaon ang branch.

 Ginsigurado sang mga utod nga makapadayon sila sa pag-imprinta sang Biblia samtang ginahimo ang konstruksion. Si Trey, miembro sang Branch Committee sa Japan, nagsiling: “Sang nagapadayon ang konstruksion, ang aton organisasyon naga-release sang mas madamo nga mga translation sang Biblia, kag mas nagadamo pa ang mga tawo nga nagakinahanglan sang Biblia sa bilog nga kalibutan. Kinahanglan nga magbuligay ang sarisari nga mga department kag ang mga personnel para maiskedyul sing maayo ang pag-install sang bag-o nga kagamitan kag ang pag-imprinta sang mga publikasyon.” Bisan pa sa sini nga mga kabudlayan, halos 220,000 ka Biblia ang naimprinta kada bulan halin sang Marso asta Agosto 2023, sang ginahimo ang pinakadaku nga bahin sang konstruksion sa Printery. Tanan ini nahimo nga wala sing dugang nga gasto.

 Ang isa ka importante nga bahin sang proyekto sa pag-renovate amo ang pagkinot sa kuryente. May i-install kami nga bag-o nga mga solar panel, nga makabulig nga makakinot sing mga $120,000 sa gasto sa kuryente kada tuig. May i-install man nga triple-glazed nga mga bintana, nga makabuhin pa gid sa paggamit sang kuryente, kag makakinot sing mga $10,000 kada tuig. Bisan pa mahal ini, ginabanta nga makakinot sang sobra 3.5 ka milyon ka dolyar samtang ginagamit ini nga mga panel kag bintana. Mabuhinan man sini ang epekto sang mga bilding sa palibot.

 Ining duha ka proyekto sa branch nagapakita nga madamo pa sang kinahanglan himuon para masigurado nga masuportahan sang mga pasilidad sang Branch ang kinahanglanon sang mga manugbantala. Pero, wala pa natapos ang hilikuton. “Madamo na sang nahimo, pero madamo pa sang kinahanglan himuon,” siling ni Aaron, halin sa Worldwide Design/Construction Department. Paano ini makompleto? Nagsiling pa sia: “Wala labot sa maalwan nga mga donasyon, nga naghatag sang pondo para sa sining importante nga mga proyekto, ginapasalamatan man namon ang kahanda sang tanan nga boluntaryo sang una kag sa mga nagaplano nga magboluntaryo sa palaabuton. Ang pisikal kag pinansial nga suporta sang aton mga utod isa gid ka daku nga pamatuod nga ginapakamaayo ni Jehova ini nga proyekto.”—Salmo 110:3.

 Ang tanan naton nga mga proyekto sa konstruksion kag renovation ginasuportahan sang boluntaryo nga mga donasyon, nga ang kalabanan sini ginahimo paagi sa donate.pr418.com. Salamat gid sa imo padayon nga kaalwan.