Ginsilingan ni Jesus ang iya mga disipulo: “Mangin saksi ko kamo . . . tubtob sa pinakamalayo nga bahin sang duta.” (Binuhatan 1:8) Subong, mapisan nga ginatuman sang mga Saksi ni Jehova ini nga sugo. Pero, madamo nga lugar sa kalibutan ang wala pa gid nabantalaan. Ang iban sa sini nga mga lugar tuman ka lapad kag madamo katama ang populasyon. Kag sa iban nga pungsod diutay lang ang mga Saksi. (Mateo 9:37, 38) Ano nga pagpanikasog ang ginahimo naton para mabantalaan ini nga mga tawo?

 Gusto gid sundon sang Service Committee sang Nagadumala nga Hubon sang mga Saksi ni Jehova ini nga sugo. Gani, nag-asayn sila sang mga misyonero sa mga lugar sa kalibutan nga kinahanglan pa bantalaan. Subong, may 3,090 ka misyonero sa bilog nga kalibutan. a Ang kalabanan sa ila nakaeskwela sa mga Bible school, pareho sang School for Kingdom Evangelizers. Ginbayaan sang mga misyonero ang ila mga balay para mag-alagad sa iban nga pungsod kag nalipay gid sila nga himuon ini. Ini nga mga misyonero mga matutom gid, nahanas sila, kag madamo na sila sing eksperiensia. Gingamit nila ini para ibantala ang maayong balita kag mangin maayo nga halimbawa sa bag-uhan nga mga kauturan.

 Sa kada branch office, may Field Ministers Desk sa Service Department. Ini nga desk nagapangabudlay upod sa Branch Committee para maatipan ang kinahanglanon sang mga misyonero, pareho sang ila ilistaran, pagpabulong, kag insaktuhan lang nga allowance. Sang 2020 nga tuig sang pag-alagad, ang mga Saksi ni Jehova naggasto sing halos 27 million dollars (U.S.) para sa mga misyonero. Bangod sini, mas magamit sing maayo sang mga misyonero ang ila tion kag kusog sa ila ministeryo, kag sa pagpalig-on sa mga kauturan sa ila kongregasyon.

 Ano ang nahimo sang mga misyonero kon parte sa pagbantala nga hilikuton? Si Frank Madsen, nga miembro sang Branch Committee sa Malawi, nagsiling: “Nahanas gid ang mga misyonero gani may kaisog gid sila sa pagbantala. Nakabulig ini sa mga kongregasyon nga mabantalaan ang mabudlay nga teritoryo, pareho sang guardiado nga mga subdivision kag mga lugar nga madamo sing foreigner. Kag bangod nagpanikasog gid sila nga matun-an ang lenguahe kag kultura sa lugar diin sila gin-asayn, napalig-on gid ang iban nga kauturan. Ginbuligan man nila ang mga pamatan-on nga hunahunaon ang paggamit sang ila kabuhi paagi sa pag-alagad sing bug-os tion. Ginapasalamatan gid naton kay Jehova ini nga mga misyonero.”

 Ang isa pa ka Branch Committee halin sa isa ka pungsod nagsiling: “Ginpakita sang mga misyonero nga nahiusa ang katawhan ni Jehova sa bilog nga kalibutan. Natalupangdan bisan sang indi mga Saksi nga bisan sarisari ang aton kultura, nahiusa kita bilang pamilya ni Jehova bangod sa aton natun-an sa Biblia.”

 Paano nakabulig ang mga misyonero sa mga manugbantala? Nalipay gid si Paulo nga taga-Timor-Leste sang may gin-asayn nga mga misyonero sa ila kongregasyon. Nagsiling sia: “Puerte gid ka init sa amon lugar, kag ang mga misyonero nga gin-asayn sa amon halin sa matugnaw nga lugar. Pero bisan pa sini, nagpadayon sila gihapon sa pagbantala. Aga pa lang ara na sila sa miting para sa pag-alagad sa latagon. Pirme ko man sila makita nga naga-return visit bisan udtong-adlaw kag puerte ka init. Kag bisan gab-i na, nagaministeryo sila gihapon. Madamo sila sing nabuligan nga matun-an ang kamatuoran, kag isa na ako dira. Mapisan gid sila kag nanamian sa ila ginahimo, kag gingamit nila ang ila kabuhi sa pag-alagad kay Jehova. Bangod sini, napalig-on gid ang bilog nga kongregasyon nga mag-alagad man sing bug-os kay Jehova.”

 Ginsugid ni Ketti, nga isa ka regular payunir sa Malawi, kon paano ginbuligan sang mag-asawa nga misyonero ang iya pamilya. Nagsiling sia: “Pag-abot nila sa amon kongregasyon, ako pa lang ang Saksi sa amon pamilya. Ginbuligan gid ako sini nga mag-asawa, kag nangin suod gid sila sa amon pamilya. Nangin maayo gid sila nga halimbawa sa akon tatlo ka bata nga babayi. Naintiendihan sang akon mga bata nga mangin malipayon gid sila kag kontento kon mag-alagad sila kay Jehova. Nagapasalamat gid ako sa maayo nga halimbawa sini nga mga misyonero. Subong, regular payunir na ang akon tatlo ka bata kag naga-attend na sa mga miting ang akon bana.”

 Diin naghalin ang ginagasto para masuportahan ang ginahimo sini nga mga misyonero? Sa mga donasyon sa worldwide work nga ginahatag gamit ang sarisari nga paagi sa pag-donate paagi sa donate.pr418.com. Ginapasalamatan gid ang imo kaalwan.