Gusto ni Jehova nga tudluan ang iya katawhan. Gani, nagtukod ang iya organisasyon sang pila ka eskwelahan para hanason ang mga estudyante nga mahimo nila ang ila mga asaynment. Ang isa sa sini nga mga eskwelahan amo ang School for Kingdom Evangelizers (SKE). Sang nagligad nga mga tinuig, ginpanami sang organisasyon sang Dios ang kurikulum pati man ang mga pasilidad sini nga mga eskwelahan. Ang panguna nga katuyuan sini amo nga mangin mahapos para sa mga instruktor nga magtudlo kag mangin mas mahapos sa mga estudyante nga magtuon. Paano ang imo donasyon makabulig sa amon nga mahimo ini?

 Sa madamo nga tinuig, ang mga klase ginahiwat sa mga Kingdom Hall kag sa mga Assembly Hall. Gani ngaa nagtukod kami ukon nag-renovate sang pila ka pasilidad nga ginagamit para lang sa mga eskwelahan sang organisasyon? Binagbinaga ang tatlo ka rason.

 Mas daku nga kinahanglan. “Ang mga branch office nagreport nga kinahanglan nila ang mas madamo nga kauturan para magbantala,” siling ni Christopher Mavor, nga kabulig sa Service Committee sang Nagadumala nga Hubon. “Halimbawa sang 2019, ginbulubanta sang branch sa Brazil nga mga 7,600 ka dugang nga SKE graduate ang kinahanglan para magbantala sa teritoryo sang ila branch.” Ang United States branch nagreport nga kinahanglan ang madamo nga kalipikado nga mga payunir nga makahanas sa iban para sa special metropolitan public witnessing, harbor witnessing, kag prison witnessing. Nagakinahanglan man sang mga kauturan nga mag-alagad sa Local Design/Construction Department kag sa mga Hospital Liaison Committee. Ang mga naka-graduate sa SKE puede makabulig sa sini.

 Mas madamo nga estudyante. Madamo nga mga branch ang indi na makasarang sa pagbaton sang madamo nga aplikasyon nga nag-abot sa ila. Halimbawa, mga 2,500 ka aplikasyon para sa SKE ang nag-abot sa branch sa Brazil sa isa lang ka tuig. Pero bangod limitado ang mga pasilidad para sa eskwelahan, 950 lang ka estudyante ang ma-enroll sang branch.

 Mas manami nga dalayunan. Kon ang klase sang mga estudyante ara sa Kingdom Hall ukon sa Assembly Hall, sa masami nagadayon sila sa balay sang mga kauturan. Nami ini nga kahimusan sa mga pungsod nga diutay lang ang klase kada tuig. Pero kon madamo sang klase, mahimo indi posible para sa mga kauturan sa sina nga lugar nga magpadayon sa mga estudyante sa madamo nga bulan sa isa ka tuig. Gani nagpatindog sang mga pasilidad nga gindesinyo gid para sa mga estudyante kag malapit sa mga classroom.

 Ang gasto sa pasilidad nga may isa ka classroom, dalayunan sang mga instruktor kag sang mga 30 ka estudyante lakip ang kitchen, dining kag iban pa, posible maglab-ot sa pila ka milyon ka dolyar (U.S.), depende sa lokasyon kag iban pa nga rason.

 Sa masami, ang mga eskwelahan ara sa malinong nga lugar sa gua sang siudad pero lapit sa ruta sang mga salakyan. Ginabutang ini sa mga lugar sa diin madamo sang mga kauturan nga makabulig sa mga buluhaton kag sa pagmentinar sang mga bilding kag mga kagamitan.

 Ang mga pasilidad may mga library, lugar para makatuon, mga kompyuter, printer, kag iban pa nga mga gamit. Masami nga may dining room sa diin makakaon sing magkaupod ang mga estudyante kag ang mga instruktor. May ara man sang bastante nga lugar para maka-exercise kag makalingawlingaw sila.

 Ginplanuhan man namon sing maayo ang classroom. “Nagpabulig kami sa Theocratic Schools Department sa pagdesinyo sang mga classroom para mangin mahapos ang pagtuon sang mga estudyante,” siling ni Troy, nga naga-alagad sa Worldwide Design/Construction Department sa Warwick, New York. “Ginhatagan nila kami sang mga guideline kon ano kadaku ang mga classroom, kon paano ini iplastar, kag kon ano nga mga suga kag gamit sa audio-video ang kinahanglan.” Parte sa pag-install sang mga gamit para sa audio, si Zoltán nga isa ka SKE nga instruktor sa Hungary, nagsiling: “Sa umpisa, wala kami sang mga mikropono, gani pirme namon ginapahanumdom ang mga estudyante nga kusugon nila ang ila tingog. Pero subong, bangod may ara na sang mikropono sa kada desk, nasolbar na ang amon problema!”

 Ano ang epekto sining ginpanami nga mga pasilidad sa mga instruktor kag mga estudyante? “Malinong gid ini nga lugar,” siling ni Angela, nga nakaeskwela sa SKE sa Palm Coast, Florida, U.S.A. “Maayo gid ang pagplano sang tanan, lakip na ang pagplastar sang classroom kag sang amon mga kuarto, para makapokus gid kami sa klase kag sa pagtuon.” Si Csaba nga isa ka instruktor sa Hungary, nalipay gid nga makaupod ang mga estudyante sa pagkaon. Siling niya nga kon nagakaon sila, “ang mga estudyante masami nga nagaistorya parte sa ila kaugalingon kag parte sa ila mga eksperiensia. Gani mas nakilala pa gid namon ang mga estudyante. Bangod sini, mas mabagay namon ang kurikulum sa mga kinahanglanon nila.”

 Para sa mga estudyante kag mga instruktor, ang ginpanami nga pasilidad sang eskwelahan isa gid ka pagpakamaayo halin sa aton “Daku nga Instruktor,” nga si Jehova. (Isaias 30:20, 21) Amo sini ang ginsiling sang isa ka sister sa Pilipinas nga naka-eskwela sa pasilidad nga ginhimo nga eskwelahan para sa SKE: “Ang eskwelahan nagpahanumdom gid sa amon nga indi lang kami mga estudyante kundi mga espesyal nga bisita ni Jehova. Gusto niya nga malipay kami samtang ginatun-an namon sing maayo ang iya Pulong.”

 Ang mga pasilidad sa eskwelahan matukod, ma-renovate, kag mamentinar, bangod sang inyo donasyon, nga ang kalabanan ginahimo paagi sa donate.pr418.com. Madamo gid nga salamat sa inyo kaalwan.