Sang 2020, madamo nga kalamidad ang natabo kag nagsugod man ang COVID-19 nga pandemic sa bilog nga kalibutan. Paano ginbuligan sang mga Saksi ni Jehova ang naapektuhan sini nga mga hitabo?

 Sang 2020 nga tuig sang pag-alagad, a gin-aprobahan sang Coordinators’ Committee sang Nagadumala nga Hubon nga gamiton ang 28 million dollars b nga pondo sa pagbulig sa mga kauturan. Nabuligan sini ang mga kauturan nga nabiktima sang sobra 200 ka kalamidad—lakip ang COVID-19 nga pandemic, madamo nga mga bagyo, pagbaha sa Africa, kakulang sang pagkaon sa Venezuela, kag grabe ukon malawig nga tig-ilinit sa Zimbabwe. Ang mga gin-donate nga pondo gingamit para magbakal sang pagkaon, tubig, kag mga bayo. Gingamit man ini sa ilistaran, sa pagpabulong, kag sa pagbakal sang mga suplay para sa pagpaninlo, pagpangay-o, kag pagpatindog liwat sang naguba nga mga propiedad. Ari ang pila ka halimbawa sang pagbulig nga ginhimo.

 COVID-19. Sa bilog nga kalibutan, madamo nga kauturan ang nalatnan sang COVID-19. Naapektuhan man ang ila palangitan-an, gani madamo sa ila ang nagakabalaka gid. Para mabuligan sila, sobra sa 800 ka Disaster Relief Committee (DRC) ang gin-organisar sa bilog nga kalibutan. Ginamonitor sini nga mga committee kon ano gid ang kinahanglan sang mga kauturan kag ginareport nila ini dayon sa Coordinators’ Committee. Nakabulig ini sa Coordinators’ Committee nga mabal-an kon ano gid ang pinakamaayo nga paagi para mabuligan ang mga kauturan.

 Sa bilog nga tuig, ginbuligan sang DRC ang madamo nga kauturan nga makakita sang pagkaon, tubig, mga suplay sa pagpaninlo, kag mga bulong. Sa iban nga lugar, ang DRC nagpangabudlay upod sa mga gulang para buligan ang mga kauturan nga makabaton sang ayuda halin sa gobierno.

 Ang aton pagbulig nga ginahimo natalupangdan sang mga tawo nga indi Saksi. Halimbawa, ang district commissioner sang Nakonde, sa Zambia nga si Field Simwinga, nagsiling sa aton mga kauturan: “Nagapasalamat gid kami sa inyo pagbulig sa naapektuhan nga mga pamilya. Kinahanglan gid nila ini subong.”

 Kakulang sang Pagkaon sa Angola. Bangod sa COVID-19 nga pandemic, nagdiutay ang suplay sang pagkaon sa Angola kag grabe ang pagmahal sini. Gani madamo sa aton mga kauturan ang indi na makasarang sa pagbakal sang ila pagkaon.

 Ginpangabay ang branch sa Brazil nga magpadala sang pagkaon sa mga kauturan sa Angola. Para magamit sing maayo ang pondo, nag-research ang mga kauturan kon ano ang pinakamaayo nga paagi para makabakal sang pagkaon kag mapadala ini sa mga utod. Kag natalupangdan nila nga mas maayo kon magbakal sila sing tingob. Dayon, ginpang-repack nila ini kag ginputosputos. Ang isa ka putos nagabug-at sing 20 kilos kag $22 lang ang bili. May unod na ini nga pagkaon pareho sang bugas, beans, kag mantika. Sa kabilugan, 33,544 na ka putos ang napadala nga nagabug-at sing 654 ka tonelada. Bisan ang mga kauturan sa Angola nag-donate man sang mga pagkaon kag sang gintingob ini sa pagkaon nga halin sa Brazil, nakabulig ini sa sobra 50,000 ka kauturan!

 Ano ang ginbatyag sang mga kauturan sa bulig nga ila nabaton? Si Alexandre nga nagaistar sa malayo nga bahin sang Angola, nagsiling: “Napamatud-an ko nga palangga gid ako ni Jehova kag wala ako nagaisahanon. Nabatyagan ko man nga palangga ako sang organisasyon ni Jehova!” Si Mariza, nga nagasolo nga iloy, nagsiling: “Ginsabat gid ni Jehova ang akon pangamuyo. Nagapasalamat gid ako sa iya kag sa iya organisasyon!”

 Grabe kag Malawig nga Tig-ilinit sa Zimbabwe. Sang 2020 nga tuig sang pag-alagad, naeksperiensiahan sang Zimbabwe ang grabe kag malawig nga tig-ilinit. Bangod sini, minilyon ka tawo ang nag-antos sing gutom. Linibo man sa aton mga kauturan sa Zimbabwe ang wala sang pagkaon.

 May gin-organisar nga lima ka DRC para madal-an sang pagkaon ang aton mga kauturan. Ginatos ka utod ang nagbulig sa pagpang-repack sang pagkaon kag pagkarga sini sa mga salakyan, kag ang iban gani sa ila nagpahulam pa sang ila mga salakyan. c Sang 2020 nga tuig sang pag-alagad, $691,561 ang gingasto sa pagbakal sang pagkaon para sa sobra 22,700 ka kauturan.

 Ang iban nga kauturan naubusan na gid sang pagkaon antes mag-abot ang bulig. Sang nabaton nila ang pagkaon gindayaw nila si Jehova. Ang iban gani sa ila nagkanta pa sing mga Kingdom song.

 Sa isa ka lugar may gin-organisar nga miting para istoryahan ang paghatag sang pagkaon halin sa nongovernmental organization (NGO). Nag-attend man sa sini ang duha ka balo nga Saksi. Pero samtang nagamiting, natalupangdan sining duha ka balo nga sister nga may labot ini sa pulitika, kag indi nila mahimo ang ginapatuman para makabaton sing bulig. Gani naghalin sila nga duha. Gin-insulto sila sang mga tawo kag ginsilingan: “Andaman n’yo lang kon mangayo kamo sa amon. Indi gid kamo katilaw!” Pero pagligad lang sang duha ka semana, nag-abot ang mga kauturan nga may dala nga pagkaon kag ginhatagan nila ang aton duha ka sister. Mas nauna pa ini sangsa bulig sang NGO.

 Ang pagbulig nga ginhimo sa Zimbabwe nangin daku man nga panaksi. Halimbawa, binagbinaga ang eksperiensia ni Prisca nga nagaistar sa isa ka gamay nga baryo. Mabudlay gid ang kabuhi ni Prisca bangod sa grabe kag malawig na nga tig-ilinit sa ila lugar. Pero naga-preaching gihapon si Prisca kada Mierkoles kag Biernes bisan pa tig-alarado na. Gin-insulto sia sang mga tawo sa ila lugar kag ginsilingan sia: “Magutman gid ang imo pamilya kay sige ka lang preaching.” Si Prisca nagsabat: “Indi gid pagpabay-an ni Jehova ang iya mga alagad.” Wala madugay pagkatapos sini, nakabaton sia sing suplay sang pagkaon nga gindala sang mga kauturan. Nagbilib gid ang mga tawo sa ila lugar kag ginsilingan nila si Prisca: “Wala ka gid tuod ginpabay-an sang Dios, gani gusto namon nga makatuon man parte sa iya.” Pito niya subong ka kaingod ang nagapamati sa mga miting sang kongregasyon nga gina-broadcast sa radyo.

 Samtang nagalapit na gid ang katapusan, makaeksperiensia gid kita sang mga kalamidad. (Mateo 24:3, 7) Ginapasalamatan gid ang imo maalwan nga donasyon paagi sa donate.pr418.com. Makasalig ka nga gamiton gid ini sing maayo para buligan ang mga nagakinahanglan.