Gintagna sang Biblia nga sa aton panahon subong may mga inaway, linog, balatian, kag “makahaladlok nga mga talan-awon.” (Lucas 21:10, 11) Ini nga mga tagna, padayon nga nagakatuman sa 2022 nga tuig sang pag-alagad. a Halimbawa, wala gihapon natapos ang inaway sa Ukraine, kag minilyon ka tawo ang naapektuhan sini. Halos subong pa lang nagabangon ang kalibutan sa COVID-19 nga pandemic. Dugang pa, madamo gid ang naapektuhan sang mga kalamidad, pareho sang mga linog sa Haiti kag sang mabaskog nga mga bagyo sa Central America, sa Pilipinas, kag sa southeastern Africa. Ano ang ginhimo sang mga Saksi ni Jehova para mabuligan ang mga naapektuhan sini nga mga kalamidad?

 Sang 2022 nga tuig sang pag-alagad, naghimo ang aton organisasyon sang relief work para sa mga naapektuhan sang mga 200 ka kalamidad! Kon totalon, halos 12 ka milyon ka dolyar ang nagasto sa sini nga pagbulig. b Hibalua kon paano gingamit ang mga donasyon para buligan ang mga biktima sang duha ka kalamidad.

 Sang Agosto 14, 2021, gintay-ug sang magnitude 7.2 nga linog ang southern Haiti. Makapasubo nga tatlo ka Saksi ang napatay—duha ka sister kag isa ka brother. Ang mga nakaluwas sa linog nagaantos man sang kabudlayan sa pisikal kag pati sa ila emosyon. Ang isa ka brother nga si Stephane nagsiling: “Damudamo gid ang napatay sa amon siudad kay kadamo sang ginalubong kada semana sa sulod sang duha ka bulan.” Ang isa pa gid ka brother nga si Éliézer, nagsiling: “Madamo nga kauturan ang wala sang balay, wala sang bayo, wala sapatos, kag wala sang iban pa nila nga kinahanglanon. Halos pila ka bulan nga may aftershock gihapon gani madamo ang pirme lang ginakulbaan.”

 Nagbulig dayon ang aton organisasyon. Ang branch sa Haiti, nagpadala sang 53 ka tonelada sang pagkaon, pati man sang mga tent, trapal, kutson, kag mga solar charger para sa mga cellphone. Dugang pa, sang 2022 nga tuig sang pag-alagad, sobra 100 ka balay ang ginpatindog liwat ukon ginkay-o. Sobra isa ka milyon ka dolyar ang gingasto para sa pagbulig sa Haiti.

 Nagapasalamat gid sa sini ang mga kauturan. Si Lorette nagsiling: “Naguba gid ang amon balay sang naglinog kag pati man ang amon negosyo. Wala kami sing makaon. Pero wala gid kami ginpabay-an sang organisasyon ni Jehova. May ara gid kami pirme sang tanan namon nga kinahanglanon.” Si Micheline nagsiling: “Ginguba sang linog ang ginaistaran namon sang akon duha ka bata nga lalaki. Indi ’ko kabalo sang akon himuon gani nangamuyo ako nga buligan ako ni Jehova, kag ginsabat niya ako paagi sa iya organisasyon. Subong, may ara na kami sang mabakod nga balay. Gusto ko himuon ang tanan nga masarangan ko para ipakita kay Jehova ang akon pagpasalamat sa iya.”

 Natalupangdan sang gobierno ang ginahimo naton nga relief effort. Ang director sang city hall sa L’Asile nagsiling: “Kanami sa inyo kay kadasig sa inyo magbulig. Ginadayaw ko man kamo bangod ginarespeto gid ninyo ang mga awtoridad. Nalipay ako nga indi kuarta ang inyo motibo sa pagbulig. Gusto gid ninyo buligan ang mga tawo. Nagabulig kamo kay palangga ninyo sila.”

 Sang Enero 24, 2022, ang bagyo Ana nag-landfall sa Mozambique kag dayon nagpakatundan ini pakadto sa Malawi. Nagdala ini sang grabe kabaskog nga ulan kag hangin nga naglab-ot sa 100 kilometros kada oras. Natumba ang mga poste sang kuryente, naguba ang mga taytay, kag grabe gid ang pagbaha.

 Sobra 30,000 ka Saksi ang naapektuhan sa Malawi kag Mozambique. Si Charles, nga isa ka brother nga nagbulig sa relief work, nagsiling: “Sang nakita ko ang pag-antos sang mga kauturan, kag kon daw ano kadamo ang nadula sa ila, daw mabuka ang akon tagipusuon kag nasubuan gid ako.” Nadugangan pa gid kay ang diutay nga pagkaon kag pananom sang mga kauturan wala na bangod sang bagyo. Kalabanan sa ila wala na sing balay. Kag makapasubo, nga napatay ang asawa kag duha ka bata nga babayi sang isa ka brother sang nalumos sila sang nagbaliskad ang rescue boat nga ila ginasakyan.

 Makahaladlok gid ang bagyo. Sang mga ala-una sang kaagahon, sa Nchalo, Malawi, nabatian sang pamilya Sengeredo ang makahaladlok nga gahod sang nagadaludo nga tubig. Nag-awas ang duha ka suba! Nagdesisyon si Brother Sengeredo nga mabakwit sila. Maayo gid ini nga desisyon kay ginguba sang baha ang ila balay. Naguba ang ila mga kagamitan kag ang iban naanod. Nagkadto ang pamilya sa Kingdom Hall, nga mga 30 ka minutos lang tani nga lalakton halin sa ila balay. Pero subong, halos duha ka oras antes sila nakaabot. Basa sila kag kapoy gid, pero maayo lang kay safe sila.

 Gin-umpisahan dayon sang branch sa Malawi kag Mozambique ang pagbulig. Ginsugo nila ang mga manugtatap sang sirkito kag ang mga elder nga hibaluon kon ano ang kinahanglan sang mga kauturan nga nabagyuhan kag ginpalig-on man sila. Nag-asayn man sila sang madamo nga Disaster Relief Committee (DRC) para dumalahan ang relief work. Gilayon nga nagbulig ini nga mga committee para makakuha sang pagkaon kag sang iban pa nga kinahanglanon sang mga kauturan. Sobra $33,000 ang gingasto para sa humanitarian aid kag sobra $300,000 para sa pagkay-o kag pagpatindog liwat sang mga balay.

 Gingamit gid sing maayo sang mga DRC ang pondo. Importante ini bangod sa pagtaas sang inflation. Halimbawa, sa una nga pito ka bulan sang relief work, ang presyo sang corn flour nga panguna nga pagkaon sa Malawi, nagmahal sing mga 70 porsiento. Nagmahal man ang gasolina. Para makakinot, ginatingob sang mga kauturan kon magbakal sila sang pagkaon kag sang mga materyales para sa konstruksion sa ila lugar. Bangod sini, maka-discount sila kag makabulig man ini para indi gid daku ang ila gasto sa transportasyon.

 Natandog gid ang tagipusuon sang mga kauturan bangod sang relief work. Si Felisberto, nga isa ka brother sa Mozambique, nagsiling: “Wala ako sing nakita nga iban nga organisasyon nga amo sini kadaku ang ginbulig: halin sa mga materyales, transportasyon, mga kauturan sa konstruksion, pagkaon, kag mapinalanggaon nga paggiya. Sa sini nga relief work, makita gid ang gugma sang mga kauturan nga ginsiling ni Jesus sa Juan 13:34, 35.” Si Ester, nga isa ka balo sa Malawi nga nagub-an sing balay, nagsiling: “Indi ’ko kabalo sang himuon ko, wala man abi ako sang kuarta nga ipatindog sang bag-o nga balay. Gani sang nagkadto ang mga kauturan para patindugan ako sing balay, pamatyag ko sa Paraiso na ako.”

 Samtang nagalapit na gid kita sa ginpromisa nga bag-o nga kalibutan, mas madamo pa kita sang maeksperiensiahan nga mga kalamidad. (Mateo 24:7, 8) Pero salamat sa imo mga donasyon. Bangod sini, sigurado kita nga mabaton sang katawhan ni Jehova ang bulig nga ila kinahanglan kon may kalamidad. Ginapaathag sa donate.pr418.com ang mga paagi kon paano mag-donate. Madamo gid nga salamat sa imo kaalwan.