Ginatos ka milyon ka tawo ang nagaistar sa Latin America. Minilyon sa sini ang mga tumandok ukon mga tawo nga may kaugalingon nga lenguahe kag mga kustombre. Madamo sa sini nga mga tumandok mga kauturan naton, kag ginapabaloran nila ang ila mga kultura. Para mabuligan ang mga tawo nga matun-an ang mga kamatuoran sa Biblia, gina-translate sang mga Saksi ni Jehova ang ila mga publikasyon sa sobra 130 ka tumandok nga lenguahe sa Latin America kag ginapanagtag ini sa mga tumandok didto. a Pero, ang pila sa ila ginahingabot bangod nag-alagad sila kay Jehova kag wala na sila nagapakigbahin sa mga kustombre sa ila lugar nga wala nabase sa Biblia. Paano ang imo mga donasyon nakabulig sa ila?

 Sa Mexico, may mga kauturan kita nga Huichol kag nagaistar sila sa kabukiran sang Jalisco State. Matinahuron nila nga ginpaathag sa ila komunidad nga indi na sila mag-entra sa mga kustombre nga wala nabase sa Biblia. b Bangod sini, naakig sa ila ang iban nila nga mga katribo. Sang Disiembre 4, 2017, ginsalakay sang akig nila nga mga katribo ang isa ka grupo sang mga Saksi ni Jehova kag ang iban pa nila nga upod. Ginpalayas sila sa komunidad, ginguba ang ila mga propiedad, kag ginpahog sila nga pamatyon kon magbalik pa sila sa ila puluy-an.

 Gin-atipan sang mga Saksi sa kaingod nga mga banwa ang ginpalayas nga mga kauturan. Pero paano sila ginbuligan nga makabalik sa ila puluy-an? “Wala kami sing inugbayad sa abogado,” siling sang isa ka brother nga si Agustín, “kag indi kami kabalo kon kay sin-o kami mangayo sing bulig sa amon sitwasyon.”

 Bangod ang isyu diri amo ang kahilwayan sang aton mga kauturan sa pagsimba, may ginhimo dayon ang branch sa Central America para buligan sila. Una, ginpangabay nila ang lokal nga mga opisyal nga imbestigahan ang krimen nga natabo. Dayon, nangayo sila sang pahanugot sa Coordinators’ Committee sang Nagadumala nga Hubon sang mga Saksi ni Jehova nga mapabulig sila sa Legal Department sa world headquarters. Gusto nila nga magpasaka sing kaso sa ginhimo sa Huichol naton nga kauturan. Gin-aprobahan ini kag sang ulihi ini nga kaso nakalab-ot sa Supreme Court of Justice of the Nation, nga amo ang pinakamataas nga korte sa Mexico.

 Madamo nga abogado halin sa bilog nga kalibutan ang nagbuligay para maghimo sing isa ka argumento. Ginpaathag nila nga dapat respetuhon sang iban ang kultura sang tumandok nga mga komunidad. Pero dapat man respetuhon kag proteksionan sini nga mga komunidad ang kahilwayan sang ila mga katribo. Kay man, kinamatarong ini sang tanan nga tawo, tumandok man sila ukon indi.

 Sang Hulyo 8, 2020, ang tanan nga judge sa Supreme Court of Justice nagdesisyon pabor sa mga Saksi ni Jehova. Nagmando ang korte nga pasugtan nga makabalik sa ila komunidad ang tanan nga ginpalayas. Si Agustín, nga ginsambit kaina, kag ang iban pa nga kauturan nagapasalamat gid. Nagsiling sila: “Nagapasalamat gid kami sa ginhimo sang mga kauturan para sa amon. Nalipay gid kami kay kon wala nila kami ginbuligan wala gid kami sing nahimo.”

 Madamo nga tumandok nga mga tawo ang nagaistar sa Otavalo Valley sa Ecuador. Sa isa sa mga baryo sini nga San Juan de Ilumán, ginhingabot man ang mga kauturan. Sang 2014, pagkatapos makakuha sang kinahanglanon nga mga permit sa pagtukod sang Kingdom Hall, ginsugdan nila ang pagtukod. Pero, sa pagpanguna sang isa ka pari upod ang sobra isa ka gatos ka tawo, ginpauntat nila ang konstruksion. Dayon, nagmando ang komunidad nga untatan na sang mga Saksi ni Jehova ang ila pagtipon sing tingob para magsimba.

 Nagbuligay ang mga legal department sa branch sa Ecuador kag sa world headquarters para pangapinan ang kahilwayan sa pagsimba sang mga kauturan sa sini nga kongregasyon. Ginpasaka sang mga kauturan ini nga kaso sa korte. Bangod sini, gin-untatan sang komunidad ang pagpamatok sa mga kauturan kag ginpasugtan sila nga magtipon liwat para magmiting kag tapuson ang pagtukod sang Kingdom Hall. Pero para maproteksionan ang kinamatarong sang mga kauturan sa palaabuton, ginpangabay sang mga kauturan ang mga higher court nga maghimo sing desisyon parte sa importante katama nga isyu: Dapat bala respetuhon sang mga tumandok ang mga kasuguan parte sa kinamatarong sang tawo nga ginapatuman sa bilog nga kalibutan?

 Sang Hulyo 16, 2020, ginpamatian sang Constitutional Court of Ecuador, ang pinakamataas nga korte sa pungsod, ini nga kaso. Ang mga abogado nga kauturan sa Ecuador amo ang nangin abogado sang kongregasyon. Dugang pa, may apat ka kauturan nga international lawyer nga naghambal sa korte. Pero bangod sa COVID-19, naghambal sila sa korte halin sa lainlain nga pungsod paagi sa videoconference. First time ini nga natabo nga ginpasugtan sang korte ang mga abogado sang mga Saksi ni Jehova nga maghatag sang ila argumento bisan pa wala sila sa korte. c Ginsambit sang mga abogado ang mga kasuguan nga ginapatuman sa bilog nga kalibutan. Ginapakita sini nga mga kasuguan nga bisan pa ang isa miembro sang tumandok nga komunidad, indi buot silingon sini nga wala na sia sing kinamatarong bilang tawo.

 Ginahulat gid sang mga kauturan sa Otavalo Valley ang desisyon sang Constitutional Court. Samtang wala pa ini, nalipay gid sila sa bulig nga ila nabaton. Si César, nga isa ka gulang sa Ilumán Quichua Congregation, nagsiling: “Bisan pila lang ka kauturan ang bululigan, grabe gid ang ginahimo sang organisasyon para sa ila. Si Jehova lang ang makahimo sina.”

 Ang tanan nga abogado sa sini nga kaso mga Saksi ni Jehova, kag nalipay gid sila nga gamiton ang ila nahibaluan sa kasuguan para buligan ang mga kauturan. Ginhimo nila ini nga wala sing bayad. Pero, ang pagpasaka sing kaso, paghanda sa sini, kag ang pagpresentar sini sa korte nagakinahanglan sing tion kag kuarta. Sobra 380 ka oras ang gingamit sang aton mga abogado kag sang mga kauturan sa paghanda sa sini nga kaso, kag sobra 240 ka oras ang gingamit nila sa pag-translate sang mga dokumento para sa hearing sa Mexico. Sobra 40 ka abogado sa bilog nga kalibutan ang nagbulig sa kaso sa Ecuador kag ginatos ka oras ang ila gingamit sa sini. Diin naghalin ang kuarta nga gingamit para pangapinan ang aton mga kauturan? Sa imo mga donasyon nga ginhatag gamit ang sarisari nga paagi sa pag-donate sa donate.pr418.com. Salamat gid sa imo kaalwan.