Natun-an sang akon lolo kag lola ang parte sa promisa sang Ginharian ni Jehova sang 1906 wala lang madugay sa tapos mapatay ang isa nila ka bata nga lalaki bangod sang diphtheria. Ang ila doktor isa ka Estudyante sang Biblia, ang tawag sadto sa mga Saksi ni Jehova. Ginsugiran niya sila sang makapaumpaw nga mensahe sang Biblia, pati sang paglaum nga pagkabanhaw. Gani, ang akon lolo kag lola, ang akon nanay, kag ang akon tiya nangin mga Estudyante sang Biblia man.

 Sa sulod sang madamo nga tinuig, nangin matutom gid sila sa pag-alagad kay Jehova. Ang akon lola, si Nanay, kag ang akon tiya nangin usherette pa gani sang ginpagua ang “Photo-Drama of Creation” sa Chicago, Illinois, sa United States. Pero, masubo nga si Nanay lang ang nagpadayon sa pag-alagad kay Jehova. Indi gid ini mahapos para sa iya kay close gid ang ila pamilya, kag updanay sila sa pag-alagad asta sang dekada ’30. Daku gid ang epekto sa akon sang katutom kag pagtuman pirme ni Nanay kay Jehova, kag pati man sang halimbawa ni Tatay, nga matutom nga Estudyante sang Biblia.

 Natawo ako sang 1927, kag ako ang kamagulangan sa anom ka mag-ulutod. Tanan kami matutom gid sa pag-alagad. Si Tatay isa ka panday, kag may manami kami nga balay sa gua sang siudad sang Chicago. May malapad kami nga talamnan sang mga utan, kag nagasagod kami sang mga manok kag pato.

 Nanamian gid ako mag-obra. Ang isa sa akon obra, amo ang pagpanursi sang mga medyas. Wala na gawa sang nagapanursi subong; pero sang una, kon mabuslot ang medyas wala dayon ini ginahaboy kundi ginasursihan. Maayo gid nga natun-an ko magsursi, kay sang ulihi nangin mananahi ako.

 Ginsigurado gid ni Tatay nga ginauna sang amon pamilya ang pagsimba kay Jehova. Gani naga-attend kami sa tanan nga Cristianong mga miting, regular nga naga-preaching, kag nagabinagbinag kami sang teksto sa Biblia kada adlaw. Kon Sabado sang gab-i, naga-family study kami gamit ang Lalantawan.

 Para mapanaksihan namon ang amon mga kaingod, nagbutang si Tatay sang electric sign sa bintana sang amon salas. Ang mga kauturan man ang naghimo sini, kag gina-advertise sini nga sign ang isa ka pamulongpulong ukon ang isa sa aton mga publikasyon. May suga ini nga nagaigpat-igpat, amo nga matalupangdan ini sang mga nagalabay. Nagbutang man si Tatay sang duha ka sign sa amon salakyan.

 Kami nga mga bata gintudluan ni Tatay paagi sa iya ginahambal kag ginahimo kon ngaa importante nga magtuman kay Jehova. Pirme sia ginasuportahan ni Nanay. Nag-alagad man si Nanay kay Jehova bilang payunir sang ang akon kamanghuran nga utod nga babayi lima na ka tuig. Malawig ang kabuhi ni Nanay kag payunir sia asta sang napatay sia. Para sa akon sila gid ang pinakamaayo nga mga ginikanan.

 Lain gid ang kabuhi sadto sangsa subong. Wala kami sang TV, gani nagapungko kami nga mag-ulutod sa salog kag nagapamati sa manami nga mga drama sa radyo. Pero ang nanamian gid sang amon pamilya, amo ang base sa Biblia nga mga programa nga gina-broadcast sang organisasyon ni Jehova paagi sa radyo.

 Nanamian gid kami mag-attend sa mga kombension sang mga Saksi ni Jehova. Sa kombension sang 1935, nabal-an namon nga ang “daku nga kadam-an,” nga makalampuwas sa “dakung kapipit-an,” nga ginsambit sa Bugna 7:9, 14, may paglaum nga mabuhi sing wala katapusan sa Paraiso sa duta. Antes sang 1935, ang akon mga ginikanan nagakaon sang mga emblema sa Memoryal. Pero pagkatapos sina nga kombension, si Tatay na lang ang nagpadayon sa pagkaon sang emblema kay nangin maathag kay Nanay nga ang iya paglaum amo ang mabuhi sing wala katapusan sa duta, kag indi maggahom kaupod sang Cristo sa langit.

 Sang 1941, sa isa ka kombension sa St. Louis, Missouri, gin-release ang libro nga Children. Si Joseph Rutherford, ang nagapanguna sa hilikuton sadto amo ang nag-release sini. Malawig kag matunog kaayo ang pinalakpak! Katorse anyos ako sadto kag mga isa ka tuig na nga nabawtismuhan. Indi ko gid malipatan nga nagpila ako upod sa iban nga mga bata kag nagsaka sa stage para kuhaon ang akon libro.

 Sina nga tinuig, ang paagi sa pagbantala lain sangsa subong. Sang dekada ’30, may ginagamit kami nga portable nga radyo pono. Diri namon ginapatokar ang ginrekord nga mga pamulongpulong base sa Biblia para mabatian ini sang mga tagbalay. Antes kami manuktok sa balay, preparado na ang amon radyo pono kag naplastar na sing maayo ang plaka kag ang dagom sini. Kon maggua ang tagbalay, ihambal namon ang amon malip-ot nga presentasyon, patokaron ang apat ka minuto kag tunga nga pamulongpulong, kag dayon matanyag sang literatura. Ang mga tawo sa amon teritoryo nagapamati gid. Wala ako sang nadumduman nga may tagbalay nga namatok. Sang nagpayunir ako sang 16 anyos ako, ginhatagan ako ni Tatay sang akon kaugalingon nga radyo pono, kag gingamit ko gid ini pirme sa pag-preaching. Ang akon partner sa pagpayunir amo ang mabuot nga sister nga si Lorraine.

 Ang isa pa gid ka paagi nga ginahimo namon amo ang mga information marches. Ang mga kauturan nagaupdanay bilang grupo kag nagalakat sa mga kalye para mag-istorya sa mga tawo. Sang ulihi gintawag namon ini nga sandwich-sign parade bangod may ginasuksok kami nga duha ka plakard, isa sa atubang kag isa sa likod. Ini nga plakard may mga slogan pareho sang, “Religion Is a Snare and a Racket” kag “Serve God and Christ the King.”

 Natun-an namon sa mga miting kon paano handaan ang pagpamatok kag kon ano ang amon isiling para depensahan ang kamatuoran. Kag naeksperiensiahan gid namon ang pagpamatok. Halimbawa, sang nagtanyag kami sang mga magasin sa isa ka masako nga shopping area, ginpasakay kami sang pulis sa van kag gindala sa presinto. Pagligad sang pila ka oras ginpagua kami, kag nalipay kami nga ginhingabot bangod sa amon pagtuman kay Jehova.

 Sang ulihi, ginpakilala sa akon ni Lorraine ang isa ka brother nga si Eugene Rosam, nga nakilala niya sa isa ka assembly sa Minneapolis, Minnesota. Si Eugene nagdaku sa Key West, Florida. Sang Grade 10 sia, gin-expel sia sa eskwelahan kay wala sia nag-entra sa isa ka seremonya para sa pungsod. Nagpayunir sia dayon. Isa ka adlaw, naistorya niya ang isa ka babayi nga klasmeyt niya anay. Maalam nga estudyante si Eugene gani natingala gid ang iya klasmeyt kon ngaa gin-expel sia. Bangod gingamit ni Eugene ang Biblia sa pagsabat sa mga pamangkot sang iya klasmeyt, nag-Bible study ini kag sang ulihi, nangin isa ka matutom nga sister.

 Nagpakasal kami ni Eugene sang 1948. Dayon, nagpayunir kami sa Key West kag sang ulihi, gin-agda kami nga mag-eskwela sa ­ika-18 nga klase sang Gilead School. Naggradweyt kami sa una nga binulan sang 1952. Gintudluan kami sing Spanish, gani abi namon maasayn kami bilang misyonero sa pungsod nga nagahambal sing Spanish. Pero wala ina natabo. Kay sang nagaeskwela pa kami sa Gilead, natabo ang Korean War, kag ginpatawag si Eugene para magsoldado. Nakibot gid kami kay sang World War II, nagpasugot man ang gobierno nga indi sia magsoldado kay ministro sia. Ti, kay ginpatawag sia para magsoldado, ginsilingan kami nga indi maghalin sa United States. Naghibi gid ako kay indi na kami makalakat. Pagligad sang duha ka tuig, ginhatagan gid man sang exemption si Eugene. Natun-an namon sa sina nga eksperiensia ang isa ka importante nga leksion. Kon indi naton mabaton ang isa ka pribilehiyo, puede kita hatagan ni Jehova sang isa pa. Kinahanglan ta lang maghulat.

 Sang 1953, pagkatapos kami makapayunir sa isa ka Spanish nga kongregasyon sa Tucson, Arizona, gin-asayn kami nga mag-alagad sa sirkito. Sa pagligad sang tion, nakaalagad kami sa mga sirkito sa Ohio, California, kag New York City. Sang 1958, nag-alagad kami sa distrito a sa California kag sa Oregon. Nagadayon kami sa balay sang mga kauturan. Dayon, sang 1960, nagkadto kami sa Canada, kag didto nangin instruktor si Eugene sa Kingdom Ministry School para sa mga manugtatap sang kongregasyon. Nagtener kami sa Canada asta sang 1988.

 Ang isa sa indi ko gid malipatan sa Canada amo ang pamilya nga nakilala namon sang isa ka sister sang nagapamalaybalay kami. Una namon nga nakilala ang iloy, si Gail, nga nagsugid sa amon nga nasubuan gid ang iya mga bata kay napatay ang ila lolo. “Ngaa napatay sia?” pamangkot nila sa iya. “Diin sia nagkadto?” Wala sang isabat si Gail. Gani ginpakita namon sa iya ang sabat sang Biblia paagi sa pagbasa sa iya sang makapaumpaw nga mga teksto.

 Sina nga tion, si Eugene nagaalagad bilang manugtatap sa sirkito, gani isa lang kami ka semana sa sina nga kongregasyon. Pero, ginbalikan si Gail sang sister nga upod ko. Bilang resulta, ginbaton ni Gail ang kamatuoran, pati man sang iya bana nga si Bill, kag sang ila tatlo ka bata nga lalaki nga sanday Christopher, Steve, kag Patrick. Subong, si Chris isa na ka elder sa Canada. Si Steve instruktor sa isa ka Bible School facility sa Palm Coast, Florida, kag si Patrick miembro sang Branch Committee sa Thailand. Suod gid kami ni Eugene sa sini nga pamilya asta subong. Nalipay gid ako nga may gamay ako nga bahin sa pagbulig sa ila nga makilala si Jehova!

 Sang didto kami sa Canada, ginhatagan ni Jehova sang isa ka makalilipay kag importante nga asaynment si Eugene. Sugiran ko kamo parte sini.

 Sang nagligad nga tinuig, wala pa maintiendihan sang mga tawo kon ngaa wala kita nagapatughong sang dugo kag nagresulta ini sa malain nga mga balita parte sa aton. Ang mga newspaper sa bilog nga Canada nagasugid sang mga istorya nga ginapabay-an kuno sang mga ginikanan nga Saksi nga mapatay ang ila mga bata kay wala nila ini ginapatughungan sang dugo. May pribilehiyo ang akon bana nga makabulig nga pamatud-an nga sala ina nga mga istorya.

 Antes sang international nga assembly sang 1969 sa Buffalo, New York, si Eugene kag ang pila ka brother nagkadto sa dalagku nga mga ospital sa sina nga lugar para ipahibalo nga mga 50,000 ka Saksi halin sa Canada kag United States ang maga-attend sa kombension. Engkaso may matabo nga emergency, mas maayo kon naintiendihan na sang mga doktor ang aton panindugan sa dugo kag makita nila nga may basihan ini. Gani ginhatagan sang mga brother ang mga doktor sang mga artikulo halin sa kilala nga mga journal parte sa pagbulong nga wala nagagamit sang dugo. Maayo ang reaksion sang mga doktor. Bangod sini, ginsugdan ni Eugene kag sang iban pa nga brother ang pagkadto sa mga ospital sa Canada. Ginbuligan man nila ang lokal nga mga elder kon paano atubangon ang mga emergency sa pagpabulong.

 Amat-amat nga nakita ang maayo nga resulta sang ila mga panikasog. Ang matuod, wala gid namon ginpaabot nga umpisa lang gali ini.

 Sang tungatunga sang dekada ’80, gintawgan si Eugene ni Milton Henschel halin sa world headquarters sa Brooklyn, New York. Gusto sang Nagadumala nga Hubon nga ang isa ka program nga ginahimo na sa United States, himuon man sa iban nga lugar para maghatag sing impormasyon sa mas madamo nga doktor. Gani nagbalik kami ni Eugene sa Brooklyn, kag sang Enero 1988 ginbuksan sang Nagadumala nga Hubon ang isa ka department sa world headquarters nga ginatawag Hospital Information Services. Sang ulihi, ang akon bana kag ang duha pa ka brother, gin-asayn para mag-conduct sang mga seminar sa United States, kag sang ulihi, sa iban pa nga mga pungsod. Wala madugay, ginbutangan man sang Hospital Information Department ang mga branch, kag nagporma sang Hospital Liaison Committee sa madamo nga mga siudad. Sigurado ako nga nakabenepisyo gid sa sining mahigugmaon nga aman halin kay Jehova ang madamo nga Saksi kag ang ila kabataan. Samtang naga-conduct sang mga seminar kag nagakadto sa mga ospital si Eugene, ako naman ara sa Bethel kag nagaobra sa sewing room ukon sa kitchen.

 Sang 2006, naeksperiensiahan ko ang pinakamasakit nga bahin sang akon kabuhi. Napatay ang akon pinalangga nga si Eugene. Nahidlaw gid ako sa iya pagpalangga kag sa amon pag-updanay! Pero madamo ang nakabulig sa akon para makabatas. Halimbawa, padayon ako nga nangin malapit kay Jehova paagi sa pangamuyo kag regular nga pagbasa sang Biblia. Nagapamati ako sa paghinun-anon sa teksto kada adlaw sang pamilya Bethel. Ginabasa ko ang kapitulo sang Biblia nga ginkuhaan sang teksto. Kag padayon ako nga nangin masako sa akon asaynment sa Sewing Department sa Bethel. Ginakabig ko ini nga pribilehiyo. Sadto, nakabulig pa ako sa paghimo sang mga kurtina para sa mga Assembly Hall sa New Jersey kag New York. Nagaalagad ako subong sa Fishkill Bethel, diin nagapang-repair ako sang mga bayo kag iban pa nga gamay nga talahion. b

 Para sa akon, ang pinakaimportante sa kabuhi amo ang pagpalangga kay Jehova kag pagtuman sa iya kag sa iya organisasyon. (Hebreo 13:17; 1 Juan 5:3) Nalipay gid ako nga amo ini ang gin-una namon ni Eugene sa amon kabuhi. Bilang resulta, nagasalig gid ako nga padyaan kami ni Jehova sang wala katapusan nga kabuhi sa paraiso nga duta, lakip na ang kalipay nga magkitaay kami liwat.—Juan 5:28, 29.