Sang Agosto 1967, isa ka tuig kag tunga ang akon edad kag mapagros ako nga bata. Pero isa ka adlaw gulpi lang ako ginhilanat. Pagkaaga, pagbugtaw ko nabatyagan ko nga maluya na ang akon mga tiil. Ginpakita sang mga test sa ospital sa Freetown, Sierra Leone, diin ako nagaistar nga may ara ako sang polio. Isa ini ka makalalaton nga balatian nga makaparalisar sa lawas, labi na sa mga kabataan nga nagaedad sang lima ka tuig ukon mas bata pa. Wala nakabulig ang physiotherapy para magbaskog ang akon mga tiil. Amat-amat nga nagluya ang akon mga tiil asta nga indi na ako makalakat ukon makatindog. Sulitsulit nga ginasilingan ako ni tatay nga “indi ako normal” bangod sang akon diperensia. Bangod nagakamang lang ako kag nagabatyag nga wala sing pulos, kanubo gid sang pagtan-aw ko sa akon kaugalingon.

 Nagdaku ako sa isa ka compound upod sa akon nanay kag sa iban pa nga pigado nga pamilya. Bisan pa nanamian ang mga tawo sa akon, gusto ko nga palanggaon man ako sang akon tatay pero indi gid niya ako palangga. Ang iban nagapati nga ang akon kondisyon indi normal, kundi resulta sang pagpanghiwit. Ginsilingan sang iban si Nanay nga ibilin ako sa puertahan sang balay nga nagaatipan sang mga bata nga may diperensia. Nagsiling sila nga kon himuon ina ni Nanay, indi na sia mabug-atan sa pagsagod sa akon. Wala ina ginhimo ni Nanay, kundi nangabudlay gid sia para maatipan ako.

 Bangod indi ako makatindog ukon makalakat, nagakamang lang ako. Pero bangod sini, madamo ako sing mga pilas. Para indi ako mapilas, nagasuksok ako sang madamol nga mga bayo. Para maproteksionan ang akon mga kamot, nagagamit ako sang tsinelas bilang gloves. Sang ulihi, naggamit ako sang mga bloke sang kahoy para maproteksionan sing mas maayo ang akon mga kamot. Para makagiho, ginabutang ko ang mga bloke sang kahoy sa atubangan ko para makatukod kag ginabutong ko ang akon lawas paabante. Dayon, ginahabyog ko ang akon mga tiil sa sina nga direksion paagi sa pag-arko ko sang akon likod. Kon makaabante na ako sang isa ka “tikang,” ginasulit ko naman ining makakalapoy nga proseso. Grabe ini kakapoy para sa akon mga kamot kag abaga. Daku gid nga panikasog ang ginahimo ko para makagiho, gani talagsa lang ako nagagua sa amon compound. Wala ako makaeskwela kag indi man ako makahampang upod sa iban nga mga kabataan bangod sini. Nabalaka ako kon paano ako mabuhi kon wala si Nanay.

 Nangamuyo ako sa Dios. Ginpangabay ko sia nga buligan ako nga indi ako mangin manugpakilimos. Pamatyag ko kon mangin suod ako sa iya kag kon alagaron ko sia sa insakto nga paagi, atipanon gid niya ako. Gani, isa ka adlaw sang 1981, bisan pa nabudlayan gid ako, naggua ako sa compound kag nagkadto sa isa ka simbahan nga ara sa amon kalye. Indi ako komportable kay ginatulok gid ako sang mga tawo. Wala ako gin-abiabi sang pastor, kag gin-akigan niya si Nanay kay nagpungko ako sa pulungkuan nga ginbayran sang iban. Nagdesisyon ako nga indi na ’ko to magbalik.

 Isa ka aga sang 1984, sang 18 anyos ako, nagsaka ako para magkadto sa akon ginapungkuan kada adlaw sa tupad sang bintana. Didto ko makita ang mga nagakatabo sa gua. Pero nanaug ako sa gua nga bahin sang compound, nga sa masami wala gid sing tawo. Sang ato na ako didto, naistorya ko ang duha ka lalaki nga nagapamalaybalay. Ginsugiran nila ako sang matahom nga palaabuton nga magaayo na ang akon kondisyon. Ginbasa nila ang Isaias 33:24 kag Bugna 21:3, 4. Dayon, ginhatagan nila ako sang matahom nga brosyur nga Agoma ang Kabuhi sa Duta Sing Dayon! kag nagpromisa sila nga mabalik para tudluan ako sing dugang pa.

 Sa ila ikaduha nga pagbisita, ginsilingan nila ako nga updon nila ang bag-o lang nag-abot nga misyonero nga si Pauline, para mapadayon ang amon pag-istoryahanay. Ginhimo gid nila ini, kag ang amon relasyon ni Pauline daw nangin pareho sang nanay kag bata. Ginsuportahan sang akon nanay ang akon pag-Bible study upod sa akon “bag-o nga nanay,” nga nagpakita sang pagsakripisyo, pasensia, kaayo, kag interes sa akon. Pirme gid niya ako ginapangamusta. Gintudluan niya ako magbasa. Gingamit niya ang publikasyon nga Ang Akon Libro sang mga Sugilanon sa Biblia, para amat-amat ko nga makilala ang mapinalanggaon nga Amay nga akon ginapangita.

 Nalipay gid ako sa mga natun-an ko sa Biblia. Isa ka adlaw, ginpamangkot ko si Pauline kon puede ako maka-attend sa ginahimo nga Pagtinuon sa Libro sa Kongregasyon a sang mga Saksi ni Jehova. Ginahimo ini sa balay sang isa ka Saksi ni Jehova, nga isa ka bangga halin sa akon ginaistaran. Nagpasugot si Pauline. Sang masunod nga Martes, nagkadto sia kag ginhulat niya nga ako makatapos paligo kag makailis para dungan kami nga makatambong sa miting. May nagsiling nga dapat ko hambalon si Pauline nga sia ang mabayad sang taxi para sa akon, pero nagsiling ako, “Makadto ako didto gamit ang akon mga bloke sang kahoy.”

 Sang manughalin na kami, nagakabalaka si Nanay kag ang amon mga kaingod samtang nagatan-aw sa akon. Samtang nagakamang ako sa amon ugsaran, ang pila sa amon kaingod nagsinggit kay Pauline, “Ginapilit mo gid sia!”

 “Jay, gusto mo bala mag-upod?” Kalmado nga pamangkot ni Pauline. Amo na ini ang tion para ipakita ko nga nagasalig gid ako kay Jehova. (Hulubaton 3:5, 6) “Huo!” siling ko. “Amo ini ang akon desisyon.” Hipos nga nagatan-aw ang amon mga kaingod kag napahamtang na sila samtang nagapalapit ako sa gate. Sang nakagua na ako sa compound, nagsinggit sila sa kalipay.

 Nanamian gid ako sa miting! Makapaumpaw gid ini sa akon! Gin-abiabi ako sang tanan. Wala gid sang nagpakanubo sa akon. Komportable gid ako. Gani nag-attend ako sing regular. Wala madugay, namangkot ako kon puede ako makatambong sa dalagku nga mga miting nga ginahiwat sa Kingdom Hall sang mga Saksi ni Jehova. Pigado ako, kag duha lang ang akon bayo kag isa lang ka pares ang akon tsinelas. Pero nagasalig ako nga indi ako pagsikwayon sang katawhan sang Dios. Kag amo gid sini ang natabo.

 Ang pagkadto sa Kingdom Hall nagakinahanglan sang “paglakat” asta sa punta sang amon kalye kag dayon pagsakay sa taxi pakadto sa ubos sang bakulod diin ara ang Kingdom Hall. Dayon ginatuwangan ako sang mga utod pakadto sa Kingdom Hall.

 Bangod natilawan ko ang kaayo ni Jehova, gusto ko nga magdangop sa iya. Nagdesisyon ako nga mag-attend sing regular. (Salmo 34:8) Kon tingulan, pirme ako nagaabot nga basa kag puno sang lunang, gani nagailis ako sang bayo sa Kingdom Hall. Pero wala ko gid ini ginhinulsulan!

 Ang akon istorya mabasa sa 1985 Yearbook of Jehovah’s Witnesses. Sang mabasa sang isa ka Saksi nga si Josette nga taga-Switzerland ang akon istorya sa Yearbook, nagdesisyon sia nga padal-an ako sang wheelchair nga may tatlo ka ruweda. Kamot ang ginagamit sa pag-pedal sini, kag may manami ini nga mga mudguard kag madamo sing kolor nga mga reflector sa likod. Bangod sini, wala na ako mahuya kon maglagawlagaw ako. Nagdayaw gid sa sini ang mga bata kag nanamian gid sila nga makita ako nga nagasakay sa akon manami nga wheelchair. Indi ko na kinahanglan magkamang kag magbatyag nga wala sing pulos. Subong pamatyag ko daw rayna ako nga ginarespeto kag wala ginapakanubo.

 Mahapos sa akon nga mangin suod kay Jehova bangod simple na ang akon kabuhi kag matinlo ako sa moral. Bangod sang akon wheelchair maka-preaching na ako, kag sang Agosto 9, 1986, nabawtismuhan ako. Ginbag-o sang bawtismo ang akon kabuhi. Subong ko lang naeksperiensiahan nga kanami gid sang akon pamatyag. Nakabatyag ako sang matuod nga kalipay, pagkakontento, kag may pulos na ang akon kabuhi. May kompiansa naman ako sa akon kaugalingon bangod may Amay na ako nga nagapalangga sa akon kag napalibutan ako sang mga tawo nga matuod gid nga nagaulikid sa akon.

 Nangita ako sang paagi para mabalusan ko si Jehova. Ginpamensaran ko nga magpayunir pero indi ako sigurado kon bala masarangan ko ini. (Salmo 116:12) Ginpangamuyo ko ini kag nagdesisyon nga testingan ini. Nagpayunir ako sang Enero 1, 1988, kag asta subong payunir ako gihapon. Daku gid ini nga pagpakamaayo para sa akon! May mapinalanggaon ako nga mga kauturan nga nagabulig sa akon nga malab-ot ang akon goal kada bulan. Kag nakita ko kon paano ako ginsuportahan ni Jehova paagi sa iya balaan nga espiritu.—Salmo 89:21.

 Bangod payunir ako, pirme ako makalagawlagaw, kag daku ang nabulig sini sa akon mga tiil bisan pa maluya ini. Sang ulihi, nagkadto ako sa isa ka clinic nga bag-o lang nagbukas para magpa-physiotherapy kag para makaentra sa isa ka programa sa pag-exercise. Pero, ginsilingan ako sang nars didto nga indi na ako magbalik, kay sa indi madugay mapatay man lang kuno ako gihapon. Amo man sini ang ginsiling sang isa ka nars nga kaupod niya, gani naluyahan gid ako. Gani nagpauli ako kag nangamuyo kay Jehova para masarangan ko ang akon ginabatyag nga kasubo kag nangabay ako sa iya nga buligan ako para may ara man ako therapy.

 Ang pagministeryo amo ang isa sa nangin pinakamaayo nga therapy para sa akon. Bangod sini naka-exercise ako sing maayo. Pila ka tuig sang ulihi, ang isa sa mga nars nga nagsiling sa akon nga sa indi madugay mapatay man lang ako naglabay sa Kingdom Hall kag nakita niya ako. Nakibot gid sia sang nakita niya nga buhi pa ako!

 Bisan pa sang akon kondisyon, gintinguhaan ko nga mangin masako sa pag-alagad kay Jehova. Ginkomendahan ako sang mga kauturan sa akon kapisan kag pag-abot sing temprano sa mga miting. Pirme ko ina ginahimo para maabiabi ko ang mga kauturan kag para ipakita sa ila nga interesado ako sa ila.

 Natilawan ko gid ang kaayo ni Jehova, kag nakita ko ang madamo niya nga pagpakamaayo sa akon kabuhi. Nabuligan ko ang tatlo ka indibiduwal nga mabawtismuhan. Ang isa sa ila amo si Amelia, nga sang ulihi nakaeskwela sa ika-137 nga klase sang Gilead. Nakaeskwela man ako sa Pioneer Service School sing sobra isa ka bes, kag kanami gid sini nga probisyon halin kay Jehova! Ginbuligan ako ni Jehova nga mangin mas malipayon, may respeto sa kaugalingon, kag may kompiansa. Subong, ginarespeto na ako sang mga tawo. Wala ko na ginakahuya ang ako kaugalingon. May maayo ako nga mga abyan sa kamatuoran indi lang sa Freetown, sa diin ako nagaistar, kundi pati man sa bilog nga pungsod kag sa bilog nga kalibutan.

 Halos 40 ka tuig na ang nagligad sugod sang natun-an ko ang promisa sang Dios nga bag-ong kalibutan nga wala na sing may diperensia sa lawas. Padayon ini nga nagapalig-on sa akon, kag excited na ako nga matabo ini. Nagahulat gid ako kay nabal-an ko nga ang akon Dios nga si Jehova, wala gid nagakaulihi. (Miqueas 7:7) Bangod wala ako nangampo bisan pa sang mga kabudlayan, nakabaton ako sang madamo nga pagpakamaayo. Ginbuligan ako ni Jehova nga masarangan ang madamo nga problema kag mga kabudlayan. Ginahatagan gid niya ako sing bulig sa eksakto nga tion. Malipayon gid ako kag pirme nagayuhum kay ginkuha ako sa duta, diin nagakamang ako sang una, kag ginpakataas sa paagi nga wala ko ginapaabot.