Si Cecil isa ka brother nga mapainubuson gid kag nagaulikid sa iban. Ang iya halimbawa, pati man ang halimbawa ni Nanay kag sang iban pa nga matutom nga mga kauturan sa kongregasyon nagpukaw sang akon “handum . . . nga himuon kon ano ang iya nahamut-an,” ukon ihatag kay Jehova ang akon pinakamaayo. (Filipos 2:13) Iistorya ko sa inyo ang akon kabuhi.

 Natawo ako sang 1943. Ang akon mga ginikanan nagaistar sa isa ka uma malapit sa baybayon nga siudad sang Bundaberg, isa ka rehiyon nga sakop sang Queensland, Australia diin tubo ang ila panguna nga produkto. Ang mga taga-diri nanamian magkadto sa banwa kada Sabado sang gab-i para maglagawlagaw. Isa ka bes sang 1939, nakilala sang akon mga ginikanan ang duha ka payunir (bug-os tion nga mga ministro sang mga Saksi ni Jehova) nga nag-istorya sa ila parte sa Biblia. Natandog ang tagipusuon sang akon mga ginikanan sa ila natun-an sa Biblia, kag sang ulihi nangin Saksi ni Jehova sila. Gani, sang natawo kami sang akon magulang nga babayi nga si Jean, Saksi na ang amon mga ginikanan. Makapasubo nga napatay si Tatay kay nahulog sia sa hagdanan sang amon balay. Pito ka tuig pa lang ako sang napatay sia kag daw indi ko ini mabaton. Pero indi ko malipatan ang iya kapisan kag katarso. Excited na gid ako nga makita sia sa pagkabanhaw kag makilala pa gid sia!—Binuhatan 24:15.

 Si Nanay mabuot gid kag wala kami nahadlok sang akon magulang nga manugid sa iya sang amon ginahunahuna kag ginabatyag. Pero malig-on gid sia kon parte sa mga prinsipio sa Biblia kag pagsimba kay Jehova ang hambalan. Regular gid kami nga nagatambong sa Cristianong mga miting, kag pirme niya kami ginalaygayan nga limitahan ang pagpakig-upod sa indi Saksi nga mga kabataan kon wala na sing klase. (1 Corinto 15:33) Nagapasalamat gid ako nga gin-estriktuhan niya kami sadto.

 Mapisan man nga manugbantala sang Ginharian si Nanay kag pirme sia naga-vacation payunir (auxiliary payunir subong). Nadumduman ko pa nga pirme niya ginakadtuan ang sobra 50 ka balay para dul-ungan sila sang mga magasin nga Lalantawan kag Magmata! Bisan sang tigulang na sia kag maluya, gusto niya gihapon buligan ang mga interesado. Nakita namon ang pagpalangga niya sa iban, ilabi na sa amon nga iya kabataan, gani palangga gid namon sia kag gusto namon ilugon ang iya halimbawa. Sang 1958, sa edad nga 14, gindedikar ko ang akon kabuhi kay Jehova kag nagpabawtismo.

 Sang ulihi, ang kaupod ko sa kongregasyon nga si Rudolf, nga beintehon sadto, nabawtismuhan man. Halin sia sa Germany kag nagsaylo sia sa amon lugar. Kada Sabado sang aga, ginapanaksihan namon ni Rudolf ang mga tawo nga nagahulat sa ila salakyan samtang nagapamalaklon ang iban nga miembro sang ila pamilya.

 Si Rudolf isa gid ka mapisan nga brother, kag ginahagad niya ako nga mag-vacation payunir kami kon wala sing klase. Isa ka bes, nakaupdanay kami sing anom ka semana sa siudad sang Gladstone nga mga 190 ka kilometro sa aminhan sang Bundaberg. Nasadyahan gid ako sa akon pag-vacation payunir, kag bangod sa iya pagbulig sa akon, napalig-on ako nga mag-regular payunir. Sa edad nga 16, nalab-ot ko ang akon tulumuron nga mangin bug-os tion nga alagad ni Jehova.

 Ang akon una nga asaynment bilang payunir sa lugar sang Mackay, isa ka baybayon nga siudad sa aminhan sang Bundaberg malapit sa Great Barrier Reef. Pagligad sang mga isa ka tuig, sang 17 anyos ako, gin-asayn ako bilang espesyal payunir a sa malapad nga kaumhan sang Australia. Ang partner ko isa ka hinaplas nga brother. Ang ngalan niya si Bennett (Ben) Brickell, nga mas magulang sa akon sing sobra 30 ka tuig. b Daku gid nga pribilehiyo nga makaupod ining madugay na kag beterano nga payunir.

 Ang amon teritoryo sa aminhan-nakatundan sang Queensland amo ang Gulf Country—isa ka rehiyon nga dulunan sang Gulf of Carpentaria. Sadto nga tion, kami lang ni Ben ang mga Saksi sa sining lugar nga diutay lang ang nagaistar. Kon kaisa, inoras kami nga nagadrayb halin sa isa ka balay pakadto sa sunod nga balay. Sa sining malawig kag mayab-ok nga pagbiyahe, pirme ako ginasugiran ni Ben parte sa iya mga naeksperiensiahan sadto sa ministeryo. Nagabantala sila nga ginagamit ang de-trumpa nga mga salakyan c sa tion sang Bug-os Kalibutan nga Inaway II, sang gindumilian ang hilikuton sang mga Saksi ni Jehova sa Australia.

 Pagkatapos sang bilog nga adlaw nga pagministeryo, naga-camping kami kag nagapaligad sang gab-i sa higad sang dalan. d Nagatipon kami sang mga kahoy kag nagadabok para makaluto sang panyapon. Waterproof ang ginahapin ko sa akon hiligdaan, kag may mga habol ako kag ulunan. Nadumduman ko pa nga nagadayaw gid ako kay Jehova kay makita ko ang tama kadamo nga bituon kag kasanag gid sini kay wala sing mga suga sa palibot.

 Sa sining lugar nga malayo ang mga pamalay, delikado gid kon maaberiya ang imo salakyan. Isa ka bes, nautod ang ehe sang amon salakyan. Mainit gid sadto kag diutay na lang ang amon tubig. Para makabakal kami sang ehe, nag-upod si Ben sa naglabay nga salakyan pakadto sa banwa sang Cloncurry. Mga tatlo man ka adlaw ang hulat ko sa iya. Ilisipon lang ang salakyan nga nagaagi kada adlaw kag ginahatagan ako sang mga drayber sing tubig. May isa ka tawo nga naghatag sa akon sang daan nga libro. “Basaha ’ni To,” siling niya. “Basi makabulig ’ni sa imo.” Nakibot ako kay ang libro parte sa natabo sa mga Saksi ni Jehova sa mga Nazi concentration camp, pero ini nga libro indi iya sang aton organisasyon.

 Halos isa man ka tuig nga updanay kami ni Ben sa pagpayunir. Antes kami magbulagay, siling niya sa akon, “Padayon lang, utod ko.” Ang diosnon nga debosyon kag kapisan ni Ben nagpalig-on gid sa akon nga magpabilin sa bug-os tion nga ministeryo.

 Pagkatapos sang pila ka tuig nga pagpayunir sa malapad nga kaumhan, ginhatagan ako sing asaynment bilang manugtatap sang sirkito. Gani kinahanglan ko magtener sing isa ukon duha ka semana sa kada kongregasyon kag isolated group sa sina nga sirkito. Sa sulod sang pila ka tuig, naasayn ako sa apat ka sirkito. Sakop sina ang mga kongregasyon sa Queensland kag New South Wales. Dayon, sang 1971, gin-agda ako nga mag-eskwela sa ika-51 nga klase sang Gilead, ang eskwelahan sang mga Saksi ni Jehova para sa mga misyonero sa New York. Ang lima ka bulan nga maid-id nga pagtuon sa Biblia kag makapabakod nga mga classmate kag mga instruktor nakabulig sa akon para mangin handa sa akon masunod nga asaynment bilang misyonero sa Taiwan.

 Siam kami sa klase ang gin-asayn sa Taiwan, lakip si Ian Brown nga taga-New Zealand. Nangin partner ko sia sa pagmisyonero. Halos wala gid kami sang nahibaluan parte sa Taiwan. Wala gid kami gani sing ideya kon diin dapit ini nga lugar kon wala namon gintan-aw sa atlas.

 Lain gid ang Taiwan sa kaumhan sang Queensland! Ang una gid namon nga nabudlayan amo ang ila lenguahe nga Chinese. Sa umpisa, indi ako makaintiende sa mga ginatudlo sa Cristianong mga miting, diin mapalig-on kuntani ako sa espirituwal. Nabudlayan man ako magkomunikar sa mga kauturan. Nakabulig gid sa amon ni Ian ang natun-an namon sa Gilead para maatubang ini nga sitwasyon. Nakabulig man sa amon ang regular nga pagtuon sa Biblia kag ang hanuot nga pagpangamuyo para makapadayon kami sa amon asaynment. Kag bisan pa nabudlayan kami magkomunikar sa amon mga kauturan diri, napalig-on gid kami sa ila pagpalangga sa amon kag kay Jehova.

 Pag-abot namon sa Taiwan, may ginhimo nga maid-id pero malip-ot lang nga klase sa Chinese para sa tanan nga misyonero. Ang nagtudlo sa amon isa ka sister halin sa Australia nga si Kathleen Logan, e nga naggradwar sa ika-25 nga klase sang Gilead. Gintun-an gid namon sing maayo ang lenguahe kag gingamit namon dayon ang amon mga natun-an. Sa una nga adlaw sang amon ministeryo, may ginsaulo kami ni Ian nga malip-ot nga presentasyon. Sang nagapakadto na kami sa teritoryo, gin-istoryahan namon kon sin-o ang mahambal sa una nga balay. Bangod mas magulang ako kay Ian, ginlahugan ko sia nga sia ang mauna hambal. Ang tagbalay isa ka Chinese nga lalaki nga ka respetado tan-awon. Namati sia sa ginsiling ni Ian nga Chinese nga may samo nga English. Dayon namangkot sia kon ano ang kinahanglan namon kag nakibot gid kami kay kasagad sa iya mag-English! Dugay man ang amon istoryahanay, kag antes kami maghalin, ginhambalan niya kami nga padayunon lang namon ang amon pagtuon sang Chinese. Ang iya ginsiling naghatag sa amon sang kompiansa nga ‘magpadayon lang,’ pareho sa ginhambal ni Ben.

 Ang amon teritoryo amo ang daku nga bahin sang Taipei, ang kapital nga siudad. Kalabanan nga tawo diri wala pa nakabati sang mensahe parte sa Ginharian bangod diutay lang gid ang mga Saksi nga nagaistar diri sadto nga tion. Imbes nga maluyahan kami ni Ian, nangin mapisan kami sa pagbantala. Sadto nga tion, ginatos ka magasin ang amon mahatag sa isa ka bulan. May pila ka tawo nga nagabaton sang mga magasin kay curious lang sila kon ano ang amon ginahimo. Bisan pa sini, ginahimo namon ang amon bug-os nga masarangan para isab-ug ang binhi sang kamatuoran parte sa Ginharian kag nagasalig kami nga magatubo ini sa tagipusuon sang mga tawo nga nagabaton.

 Sa tion sang akon asaynment, nangin abyan ko ang isa ka Taiwanese nga sister nga si Wen-hwa. Ginapabaloran gid niya ang kamatuoran kag gusto niya nga makabenepisyo ang mga tawo sa pagtuon sa Biblia, pareho sa iya. Gani, nabuligan niya ang madamo nga misyonero, pati ako, nga mangin sagad pa gid sa paghambal sing Chinese. Ginpalangga ko ining matutom nga sister, kag nagpakasal kami sang 1974.

 Ginbuligan ni Wen-hwa ang mga misyonero nga mangin epektibo pa gid sa ministeryo. Halimbawa, ginbuligan niya kami nga maintiendihan ang mga kustombre kag ang paagi sang paghunahuna sang mga Taiwanese. Kag ginbuligan niya kami kon paano ipasibu ang amon presentasyon sa mga tawo, nga ang kalabanan mga Buddhist kag Taoist. Madamo man sa ila ang nagasimba sa ila mga katigulangan, kag ang kalabanan wala pa gid nakabasa sang Biblia ukon nakakita sini. Gani ginpokus namon ang amon presentasyon parte sa Manunuga—nga ang iya ngalan amo si Jehova kag kon ngaa makasigurado kita nga nagaluntad sia. Halimbawa, kon ang isa ka mangunguma ukon mangingisda magsiling, “Nagahulat lang kami sang ihatag sa amon nga pagkaon halin sa langit,” masiling kami: “Ti, sin-o inang Isa nga nagahatag sang tanan nga pagkaon? Indi ayhan nga sia ang Dios nga labing gamhanan, ang nagtuga sang tanan nga butang, kag ang dapat naton simbahon?”

 Pagligad sang mga tion, ginpakamaayo gid ang amon pagpangabudlay—nagtubo ang binhi sang kamatuoran sa tagipusuon sang mga tawo nga nagbaton. Gintinguhaan gid sang pila ka Bible study nga untatan ang butig nga mga panudlo kag kustombre nga tinuig na nila nga ginasunod. Paagi sa bulig sang mga misyonero kag mga manugbantala, nauntatan gid nila ini, kag nangin mas maayo ang ila kabuhi. (Juan 8:32) Sang ulihi, madamo nga brother ang nangin mga gulang kag ministeryal nga alagad, kag madamo man nga kauturan ang nangin bug-os tion nga alagad, kag ang iban sa ila nag-alagad sa branch office ukon sa Bethel.

 Sugod sang 1976, nakabaton ako sang pribilehiyo nga mag-alagad bilang Branch Committee sa Taiwan samtang nagamisyonero. Sang 1981, gin-agda kami ni Wen-hwa nga mag-alagad sa Bethel, kag padayon ako nga nag-alagad bilang branch committee sa sulod sang madamo nga tuig. Sobra na 60 ka tuig nga nagaalagad ako sing bug-os tion, ang sobra 50 ka tuig sini ara ako sa Taiwan, kag ang halos 50 ka tuig man sini kaupod ko ang akon pinalangga nga asawa. Ang akon abyan kag partner sang una sa pag-misyonero nga si Ian Brown, nagpabilin diri sa Taiwan kag padayon nga nag-alagad sing bug-os tion asta sa iya kamatayon sang 2013.

 Masako gid kami ni Wen-hwa sa amon mga hilikuton sa Bethel, sa amon Chinese congregation, kag sa ministeryo. Nagapasalamat gid kami kay Jehova sa sining hamili nga mga pribilehiyo. Ginhatagan niya ako sang handum kag kusog para maalagad ko sia sing bug-os tagipusuon halin sang bata pa ako, kag padayon niya ini nga ginahimo sa amon ni Wen-hwa, bisan tigulang na kami.