Aksidente ko nga nasipa sa ilong ang akon ka-sparring kag wala gid ’ko naglaum nga grabe ang iya injury. Ginkonsensia gid ako kag ginpamangkot ko ang akon kaugalingon kon dapat ko pa bala padayunon ang martial arts. Ngaa ini nga aksidente nagpahulag sa akon nga untatan ang sports nga nanamian ko gid? Antes ko ina sabton, isugid ko anay kon paano nagsugod ang akon kabuhi sa martial arts.

 Nagdaku ako upod sa akon malipayon nga pamilya malapit sa Buffalo, New York, U.S.A. Debotado nga Katoliko ang amon pamilya, amo nga nag-eskwela ako sa Katoliko nga mga eskwelahan kag nangin sakristan man ako. Gusto gid sang amon mga ginikanan nga maayo ang amon buas-damlag ni Manang. Gani ginpasugtan nila ako nga mag-entra sa sports pagkatapos sang klase ukon mag-obra sing part-time, basta ang importante maayo ang akon grado sa eskwelahan. Bangod sini, natun-an ko nga disiplinahon ang akon kaugalingon, bisan bata pa ako.

 Nagsugod ako ’tuon sang martial arts sang 17 anyos ako. Nagapraktis ako sing tatlo ka oras kada adlaw, anom ka adlaw kada semana, sa sulod sang madamo nga tinuig. Madamo man nga oras kada semana ang ginahinguyang ko para magpraktis sa akon hunahuna sing mga teknik kag mga giho kag magtan-aw sing mga video para magsagad pa gid ako. Nanamian gid ako magpraktis nga naka-blindfold, bisan pa may ginauyatan ako nga mga espada. Masarangan ko balion ang mga tapi ukon buk-on ang mga hollow blocks sa isa lang ka sumbag. Nakatigayon ako sang mga ranggo kag nakadaug sing mga trophy sa mga kompetisyon. Sa martial arts na nasentro ang akon nga kabuhi.

 Abi ko nalab-ot ko na ang akon mga handum sa kabuhi. Naggradweyt ako nga isa ka honor student sa isa ka unibersidad. Nag-obra ako sa isa ka daku nga kompanya bilang computer systems engineer. Nakabaton ako sing madamo nga benefits sa kompanya, may kaugalingon ako nga balay, kag may girlfriend. Daw kanami tulukon sang akon kabuhi, pero ang matuod indi ako malipayon kay madamo ako sing pamangkot parte sa kabuhi nga indi ko masabat.

 Para masabat ang akon mga pamangkot, nagasimba ako duha ka beses kada semana kag nagapangamuyo sa Dios nga buligan ako. Isa ka adlaw, may gin-istoryahan kami sang akon amigo nga nagpabag-o gid sang akon kabuhi. Ginpamangkot ko sia kon ano ang katuyuan sang kabuhi. Dayon nagsiling ako, “Indi na gid maagwanta ang mga problema, kag grabe na gid ang inhustisya!” Nagsiling sia nga amo man sina ang pamangkot niya sang una, kag nakita niya ang sabat sa Biblia. Ginhatagan niya ako sang libro nga Mahimu Ka Mabuhi sing Dayon sa Paraiso sa Duta. a Nagsiling man sia nga nagatuon sia sing Biblia upod sa mga Saksi ni Jehova. Sang primero, nangindi ako kay para sa akon indi ako dapat magbasa sang mga libro nga iya sang lain nga relihion. Pero bangod sa akon handum nga mabal-an gid ang sabat sa akon mga pamangkot, gin-usisa ko kon ano gid ang ginatudlo sang mga Saksi.

 Daw indi ako makapati sa ginatudlo sang Biblia. Natun-an ko nga ang orihinal gali nga katuyuan sang Dios amo nga ang mga tawo mabuhi sing wala katapusan sa duta, kag wala nagbag-o ini nga katuyuan. (Genesis 1:28) Nakibot ako sang nakita ko ang ngalan sang Dios, nga Jehova, sa akon mismo Biblia nga King James Version. Amo gali ini ang ngalan nga ginapangamuyuan ko kon mangadi ako sang Amay Namon. (Salmo 83:18; Mateo 6:9) Kag naintiendihan ko na gid man kon ngaa ginatugutan sang Dios nga mag-antos ang mga tawo subong. Nasabat gid man ang akon mga pamangkot, gani nalipay gid ako.

 Indi ko gid malipatan ang akon una nga pagtambong sa mga miting sang mga Saksi ni Jehova. Kamainabyanon gid sang mga tawo didto kag ginapangilala gid nila ako. Sa una nga miting nga gintambungan ko, ginpresentar ang isa ka pamulongpulong parte sa mga pangamuyo nga ginapamatian sang Dios. Interesado gid ako sa sini kay dugay na ako nagapangamuyo sa Dios nga buligan ako. Dayon nagtambong ako sa Memoryal sang kamatayon ni Jesus. Bilib gid ako kay sa tion sini nga mga miting, bisan ang mga bata nagabukad sang Biblia. Sang primero indi ako kabalo mangita sang teksto, pero ginbuligan ako sang mga Saksi nga mahibaluan kon paano bukaron ang Biblia.

 Sang sigesige na ako nga nagatambong sa mga miting, naapresyar ko nga maayo gid ang ginatudlo sang mga Saksi. Madamo gid ako sing natun-an sa kada miting, makapalig-on ini, kag naganami ang akon pamatyag kon makatambong ako. Dayon, ginpamangkot ako nila kon gusto ko mag-Bible study.

 Naobserbahan ko nga lain gid ang mga Saksi ni Jehova sangsa gindak-an ko nga relihion. Para sa akon, nahiusa sila kag sinsero gid nga mga tawo, nga nagapanikasog gid para pahamut-an ang Dios. Gani kumbinsido gid ako nga sila ang matuod nga mga Cristiano bangod sa ila gugma sa isa kag isa.—Juan 13:35.

 Samtang padayon ako nga nagatuon sa Biblia, madamo man ako sing ginahimo nga pagbag-o para masunod ang natun-an ko. Pero daw indi ko ’ya mauntatan ang martial arts. Nanamian gid ko ’ya magpraktis kag mag-entra sa mga kompetisyon. Sang ginsugid ko ini sa naga-Bible study sa akon, hambal n’ya, “Padayuna lang ang pagtuon, kay sa ulihi mahimo mo gid ang husto nga desisyon.” Napalig-on gid ako sa iya ginsiling. Samtang nagapadayon ang akon pagtuon, gusto ko pa gid pahamut-an si Jehova nga Dios.

 Nagbag-o gid ang akon kabuhi bangod sa aksidente nga ginhambal ko sa umpisa, sang nasipaan ko sa ilong ang akon ka-sparring. Bangod sadto nga aksidente nakapamensar gid ako kon puede bala mangin isa ka mahidaiton nga sumulunod sang Cristo ang isa nga nagaentra sa martial arts. Natun-an ko nga gintagna sa Isaias 2:3, 4 nga ang mga nagasunod sa sugo ni Jehova indi na ‘magtuon sa pagpakig-away.’ Kag gintudluan man ni Jesus ang mga tawo nga indi mangin bayolente bisan pa indi maayo ang pagtrato sa ila sang iban. (Mateo 26:52) Amo ina ang rason kon ngaa gin-untatan ko ang sports nga nanamian ko gid.

 Pagkatapos sina, ginsunod ko ang laygay sang Biblia nga “hanasa ang imo kaugalingon nga ang imo tulumuron amo ang diosnon nga debosyon.” (1 Timoteo 4:7) Ang tion kag kusog nga ginagamit ko sang una sa martial arts, ginagamit ko na subong sa pag-alagad sa Dios. Indi gusto sang akon girlfriend ang akon mga natun-an sa Biblia, gani nagbulagay kami. Nabawtismuhan ako bilang isa sa mga Saksi ni Jehova sang Enero 24, 1987. Wala madugay pagkatapos sini, nagboluntaryo ako sing bug-os tion sa pagtudlo sang Biblia sa iban, kag padayon ko ina nga ginahimo asta subong. May bes pa gani nga nakaalagad ako sa world headquarters sang mga Saksi ni Jehova sa New York, U.S.A.

 Sang nahibaluan ko ang kamatuoran parte sa Dios, nakita ko na ang kulang sa akon kabuhi. Subong, may katuyuan na ang akon kabuhi, may matuod na ako nga paglaum, kag malipayon gid ako. Pirme gihapon ako naga-exercise, pero indi na ina ang pinakaimportante sa akon kabuhi. Kay ang pinakaimportante na para sa akon amo ang pag-alagad kay Jehova nga Dios.

 Sang naga-martial arts pa ako, pirme ako alerto sa mga tawo sa palibot ko, kag ginahunahuna ko man ko paano ko depensahan ang akon kaugalingon kon may mag-atake sa akon. Subong, alerto man ako gihapon sa mga tawo sa palibot ko. Pero lain na ang rason—kay gusto ko sila buligan. Ginbuligan ako sang Biblia nga mangin maalwan kag mangin mas maayo nga bana sa akon matahom nga asawa nga si Brenda.

 Gusto ko gid ang martial arts. Pero ginbayluhan ko ini sang mas maayo nga butang. Base gid ina sa ginasiling sang Biblia: “Ang paghanas sa pisikal may diutay nga kapuslanan, apang ang diosnon nga debosyon mapuslanon sa tanan nga butang, kay nagasaad ini sang kabuhi karon kag sang kabuhi sa palaabuton.”—1 Timoteo 4:8.