Natawo ako sa Uganda sa distrito sang Gomba. Kalabanan sang mga tawo didto grabe gid ka pigado. Wala sing kuryente ang amon banwa, gani kon gab-i nagakingki lang kami.

 Ang akon mga ginikanan, nga mga mangunguma, nagsaylo sa Uganda halin sa Rwanda. Nagtanom sila sang kape kag saging, kag naghimo sila sang popular nga ilimnon nga halin sa saging nga ginatawag waragi. Nagsagod man sila sang mga manok, kanding, kag baka. Ginpadaku ako sa kultura nga ang mga asawa dapat magtuman sa ila mga bana sa tanan nga tion kag indi gid dapat maghambal sang ila opinyon.

 Sang 23 anyos ako, nagsaylo ako sa Rwanda, kag nagsugod sa pagkadto sa mga dance club upod sa mga kaedad ko. May isa ka club nga pirme ko gid ginakadtuan amo nga ginhatagan ako sang kard para makasulod ako nga wala sing bayad. Nanamian man ako magtan-aw sang mga pelikula nga grabe ang kapintas kag inaway. Bangod sa akon mga kaupdanan kag kalingawan, nangin mapintas ako, imoral, kag palahubog.

 Sang 2000, ginpuyo ko ang isa ka babayi nga si Skolastique Kabagwira, kag may tatlo kami ka bata. Halin sang bata ako, nagapati ako nga ang akon asawa dapat magluhod sa akon atubangan kon magbugno sia sa akon ukon kon may kinahanglan sia. Nagapati man ako nga ang tanan namon nga pagkabutang akon lang, kag pagusto ako kon ano ang himuon sa sini. Pirme ako nagalagaw kon gab-i kag nagapauli sing mga alas tres sa kaagahon kag hubog na. Kon manuktok ako kag indi dayon mabuksan ni Skolastique, ginakastigo ko sia.

 Sina nga tion, superbisor ako sang isa ka pribado nga security company, kag daku ang akon sueldo. Pirme ako ginahagad ni Skolastique nga mag-upod sa iya sa simbahan sang Pentecostal, kay nagapati sia nga mabag-o ako. Pero indi ako interesado kag nangerida pa gani ako. Bangod mapintas ako kag imoral, naglayas si Skolastique kag gindala ang amon tatlo ka kabataan kag nag-istar sa akon ugangan.

 Gin-istorya ako sang akon may edad nga abyan parte sa akon pagkabuhi. Ginhambalan niya ako nga mas maayo kon balikan ko si Skolastique kay dapat magdaku ang akon mga bata nga may tatay. Gani sang 2005, gin-untatan ko ang pagpahubog, ginbiyaan ang akon kerida, kag ginbalikan ko si Skolastique. Sang 2006, nagpakasal kami. Pero mapintas gihapon ako kag ginasakit ko ang akon asawa.

 Sang 2008, si Joël nga isa ka Saksi ni Jehova nagkadto sa balay kag namati ako sa iya mensahe. Sa sulod sang pila ka bulan, regular niya ako nga ginakadtuan upod sa isa pa ka Saksi nga si Bonaventure, kag serioso gid ang amon pag-istoryahanay sa Biblia. Kadamo gid sang akon pamangkot labi na parte sa libro sang Bugna. Pero ang matuod, gusto ko lang pamatud-an nga sala ang mga Saksi. Halimbawa, ginpamangkot ko sila kon ngaa nagapati sila nga ang “daku nga kadam-an” nga mabasa sa Bugna 7:9 magaistar sa duta, kay siling sang bersikulo ‘nagatindog sila sa atubangan sang trono sang Dios kag sa atubangan sang Kordero,’ nga si Jesucristo. Ginsabat tanan ni Joël ang akon mga pamangkot. Halimbawa, ginpabasa niya ang Isaias 66:1, sa diin gintawag sang Dios ang duta nga “palatungan sang [iya] mga tiil.” Gani ang daku nga kadam-an nagatindog gid man sa duta sa atubangan sang trono sang Dios. Dayon ginbasa ko man ang Salmo 37:29, nga nagasiling nga ang matarong magapuyo sa duta sa wala sing katubtuban.

 Sang ulihi, nagpasugot ako nga magtuon. Gani kami nga mag-asawa gintudluan ni Bonaventure sa Biblia. Samtang nagatuon kami, napahulag ako nga bag-uhon ang akon kabuhi. Natun-an ko kon paano respetuhon ang akon asawa. Indi ko na gusto nga magluhod sia sa akon atubangan kon ginabugno niya ako ukon kon may kinahanglan sia, kag wala ko naman ginakabig nga ang tanan namon nga pagkabutang akon lang. Wala naman ako nagatan-aw sang mapintas nga mga pelikula. Pero nabudlayan gid ako magbag-o kay dapat ko kontrolon ang akon kaugalingon kag magpaubos.

 Mga pila ka tuig antes sini, ginpaistar ko ang akon subang nga si Christian sa akon mga paryente sa Uganda. Pero sang nabasahan ko ang Deuteronomio 6:4-7, narealisar ko nga responsibilidad namon sang akon asawa nga atipanon ang amon kabataan kag tudluan sila sang ginasiling sang Biblia parte sa Dios. Nalipay gid kami kag ang amon bata sang gindala namon sia pabalik sa balay!

 Natun-an ko nga maluluy-on gid nga Dios si Jehova, kag nagapati ako nga ginpatawad na niya ako sang akon mga ginhimo sadto. Nalipay gid ako nga nag-upod man si Skolastique sa akon sa pagtuon sang Biblia. Gindedikar namon ang amon kabuhi kay Jehova kag dungan kami nga ginbawtismuhan sang Disiembre 4, 2010. Subong, ginasaligan na namon ang isa kag isa, kag malipayon kami nga ginaaplikar ang mga prinsipio sa Biblia sa amon pamilya. Nalipay gid ang akon asawa kay nagadiretso na ako pauli pagkatapos sang akon obra, ginarespeto ko na sia, wala na ako nagainom, kag indi na ako mapintas. Sang 2015, gintangdo ako nga gulang para magbulig sa pag-atipan sang amon kongregasyon. Kag tatlo sa lima namon ka bata ang nabawtismuhan na.

 Sang nagtuon ako sa Biblia upod sa mga Saksi ni Jehova, wala ako dayon nagpati sa mga gintudlo nila sa akon mientras nga indi ko ini mapamatud-an. Pero nagdayaw gid ako kay ginasabat nila pirme ang akon mga pamangkot paagi sa Biblia. Natun-an namon ni Skolastique nga ang mga nagasiling nga nagasimba sa matuod nga Dios dapat magkabuhi suno gid sa iya mga sugo kag indi lang magpinagusto kon ano lang ang tumanon. Nagapasalamat gid ako kay gintugutan ako ni Jehova nga magpakig-abyan sa iya kag mangin bahin sang iya organisasyon. Kon balikan ko ang akon kabuhi sang una, kumbinsido ako nga sa bulig sang Dios, ang bisan sin-o nga sinsero nga tawo puede gid magbag-o para mapalipay sia.