Natawo ako sa siudad sang Calgary sa Alberta, Canada. Sang lapsag pa ako nagdiborsio ang akon mga ginikanan, gani nagsaylo kami ni Nanay sa akon lolo kag lola. Palangga gid kami ni Lolo kag ni Lola, kag malipayon gid ako nga bata. Nalipay gid ako kon madumduman ko ang malinong nga tinuig sang bata pa ako.

 Sang pito ka tuig ako, nagsugod nga maglain ang akon kabuhi. Nagpakasal liwat si Nanay kag si Tatay kag nagsaylo kami sa St. Louis, Missouri, sa United States. Diri ko nadiskobrehan nga mapintas gali si Tatay. Halimbawa, pagpauli ko halin sa una ko nga adlaw sa akon bag-o nga eskwelahan, nabal-an ni Tatay nga gin-bully ako pero wala ako nagbato. Naakig gid sia kag mas grabe pa ang pagkastigo niya sa akon sangsa ginhimo sang mga nag-bully sa akon. Gintandaan ko gid ato gani pito pa lang ako ka tuig sang una nga tion ako nga nagbato sa akon mga kontra.

 Naugot si Nanay kay pirme lang nagapangakig si Tatay gani pirme lang sila nagasinggitanay. Sang 11 anyos ako, nagsugod ako sa pag-drugs kag pag-inom. Nagdugang pa gid ang akon pagkamaakigon kag pirme ako nagaentra sa riot sa kalye. Paggradweyt ko sa hayskul, bayolente na gid ako katama.

 Sang 18 anyos ako, nag-entra ako sa U.S. Marine Corps. Labi pa gid ako nga nangin bayolente bangod sa paghanas sa akon nga magpamatay. Pagligad sang lima ka tuig, naghalin ako sa military para magtuon sing psychology kay gusto ko mag-obra sa Federal Bureau of Investigation. Una ako nga nag-eskwela sa unibersidad sa United States kag pagbalik ko sa Canada ginpadayon ko ini.

 Sa unibersidad, nadula gid ang tanan ko nga paglaum parte sa kalibutan kag sa mga tawo. Para sa akon, ginauna lang sang mga tawo ang ila kaugalingon, ang tanan nga butang wala sing pulos, kag daw wala sing solusyon ang mga problema. Nagpati gid ako nga wala sing mahimo ang tawo para mabag-o ang kalibutan.

 Bangod wala man sing katuyuan ang akon kabuhi, nagpokus ako sa pag-inom, pag-drugs, pagpangita sing kuarta, kag pag-sex. Pirme lang ako naga-party kag sarisari ang akon mga babayi. Bangod nahanas ako sa military, pirme lang ako may kontra. Pamatyag ko, bal-an ko kon ano ang insakto kag sala, gani nagaentra gid ako kon may makita ako nga ginadaugdaug sang iban. Pero ang matuod, ako mismo kontrolado na sang akon pagkabayolente.

 Isa ka bes ara kami sang akon amigo sa basement sang akon balay. Lalong kami nga duha sa drugs, kag nagahanda sang amon inugbaligya nga marijuana sang gulpi lang ako ginpamangkot sang akon amigo kon bala nagapati ako sa Dios. Sabat ko, “Kon ang Dios ang responsable sa tanan nga pag-antos sa kalibutan, indi ko sia gusto makilala!” Pagkaaga, sa una ko nga adlaw sa akon bag-o nga obra, ginpamangkot ako sang akon upod nga isa sa mga Saksi ni Jehova, “Sa banta mo, ang Dios bala ang responsable sa tanan nga pag-antos sa kalibutan?” Nakibot gid ako bangod sa akon ginsiling sang nagligad nga adlaw, gani nangin interesado ako. Sa nagsunod nga anom ka bulan, pirme kami nagaistoryahanay, kag ginpakita niya sa akon ang sabat sang Biblia sa pila ko ka mabudlay nga pamangkot parte sa kabuhi.

 Ang akon nobya, nga gina-live ko sadto, indi gusto nga sugiran ko sia sang akon natun-an. Isa ka Domingo, ginsilingan ko sia nga makadto ang mga Saksi sa balay para tudluan kami sing Biblia. Pagkaaga, pagpauli ko halin sa obra, nakita ko nga wala na ang tanan nga gamit sa balay kag ginbiyaan na niya ako. Naggua ako kag naghilibion. Nagpangamuyo man ako sa Dios kag nakitluoy nga buligan niya ako. Sa una nga tion, gingamit ko ang personal nga ngalan sang Dios, nga Jehova, sa akon pangamuyo.—Salmo 83:18.

 Pagligad sang duha ka adlaw, nagtuon ako sing Biblia sa una nga tion, upod sa mag-asawa nga Saksi ni Jehova. Paglakat nila, padayon ko nga ginbasa ang amon ginatun-an nga libro nga Mahimu Ka Mabuhi sing Dayon sa Paraiso sa Duta, kag naubos ko ini basa sina nga gab-i. a Ang akon natun-an parte kay Jehova nga Dios kag sa iya Anak, si Jesucristo, nagtandog gid sa akon tagipusuon. Nakita ko nga si Jehova mainawaon kag nasakitan sia kon nagaantos kita. (Isaias 63:9) Natandog gid ako sa gugma sang Dios sa akon kag sa sakripisyo nga ginhimo sang iya Anak para sa akon. (1 Juan 4:10) Narealisar ko ang pagpasensia ni Jehova sa akon “bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (2 Pedro 3:9) Nabatyagan ko nga ginabuyok ako ni Jehova.—Juan 6:44.

 Sina mismo nga semana, nagsugod ako sa pagtambong sa mga miting sang kongregasyon. Malaba ang akon buhok, may aritos ako, kag makahaladlok ang akon hitsura, pero ginkabig ako sang mga Saksi nga daw paryente lang nila nga dugay na nila nga wala makita. Matuod gid sila nga mga Cristiano. Pamatyag ko daw nagpauli lang ako sa akon lolo kag lola, pero sa mas matahom nga kahimtangan.

 Wala madugay, amat-amat ako nga nagbag-o bangod sa akon mga natun-an sa Biblia. Ginpautdan ko ang akon buhok, gin-untat ang akon imoral nga pagkabuhi, kag gin-untatan ko man ang pag-drugs kag pag-inom. (1 Corinto 6:9, 10; 11:14) Gusto ko gid nga malipay si Jehova sa akon. Gani sang matun-an ko nga ang akon mga ginahimo indi niya gusto, wala ako nagpangita sing balibad. Ginakonsensia ako, kag nagasiling sa akon kaugalingon, ‘Dapat untatan ko na ini.’ Gani, insigida ko nga ginabag-o ang akon panghunahuna kag buhat. Bilang resulta, nakita ko ang mga benepisyo sang pagtuman kay Jehova. Sang Hulyo 29, 1989—anom ka bulan pagkatapos sang una ko nga pagtuon sa Biblia—ginbawtismuhan ako bilang isa sa mga Saksi ni Jehova.

 Ginbuligan ako sang Biblia nga mabag-o ang akon personalidad. Sang una, nagapangakig ako dayon kag bayolente kon makasugata ako sang malain nga mga tawo. Pero subong ginatinguhaan ko gid nga mangin ‘mahidaiton sa tanan nga tawo.’ (Roma 12:18) Indi ko gid ini mahimo kon ako lang, gani ginapasalamatan ko gid kay Jehova ang makapabag-o nga gahom sang iya Pulong kag sang iya balaan nga espiritu.—Galacia 5:22, 23; Hebreo 4:12.

 Gin-untatan ko na ang pag-drugs, pagkabayolente, kag imoral nga mga buhat. Ginatinguhaan ko gid nga mapalipay si Jehova nga Dios kag ihatag sa iya ang akon pinakamaayo. Nalakip sa sini ang pagbulig sa iban nga makilala man sia. Pila ka tuig sa tapos ako mabawtismuhan, nagsaylo ako sa iban nga pungsod para magbantala sa mga lugar nga nagakinahanglan sing madamo nga manugbantala. Sa sulod sang mga tinuig, nalipay gid ako sa pagtudlo sa madamo nga tawo kag masaksihan kon paano man ginpabag-o sang Biblia ang ila kabuhi. Nalipay man ako nga si Nanay nangin isa man sa mga Saksi ni Jehova, kag isa sa mga rason sini amo ang pagbag-o sang akon batasan kag paggawi.

 Sang 1999, naggradwar ako sa ginatawag na subong nga School for Kingdom Evangelizers sa El Salvador. Ina nga eskwelahan naghanas kag nagbulig sa akon nga manguna sa pagbantala nga hilikuton kag pag-atipan sa kongregasyon. Sina man nga tuig, ginkasal kami sang akon pinalangga nga asawa, si Eugenia. Kag bug-os tion kami nga nagabantala sa Guatemala.

 Subong, imbes nga madulaan sing paglaum sa kabuhi, malipayon gid ako. Ang pagsunod sa mga panudlo sang Biblia nakabulig sa akon nga mauntatan ang imoral nga pagkabuhi kag pagkabayolente kag naghatag sa akon sing kabuhi nga may matuod nga gugma kag kalinong.