Natawo ako sa La Ceiba, Honduras. Kinagot ako sa lima ka mag-utod, kag bugtong ako nga lalaki. Ako lamang ang apa sa amon pamilya. Ang amon pamilya nagaistar sa magamo nga lugar, kag kapigado gid sa amon. Naglala pa gid ang amon kabuhi sang napatay ang akon amay bangod sa aksidente sa trabaho sang mga apat pa lang ako ka tuig.

 Gintinguhaan gid sang akon iloy nga maatipan kami nga mag-ulutod, pero sa masami indi niya masarangan nga baklan ako sing bayo. Kon mag-ulan gani, pirme lang ako ginapanugnawan kay wala ako sing madamol nga bayo.

 Samtang nagadaku ako, gintun-an ko ang Honduras Sign Language (LESHO), amo nga makakomunikar ako sa iban nga apa. Pero indi kabalo ang akon iloy kag mga utod sang LESHO, kag nagakomunikar sila sa akon paagi sa pila ka gin-imbento nga pagsenyas. Pero palangga gid ako ni Nanay kag ginaproteksionan niya ako. Bisan pa diutay lang nga pagsenyas ang iya nabal-an, ginapaandaman niya ako nga likawan ang mga bisyo pareho sang pagpanigarilyo kag pagpahubog. Gani, nagapasalamat gid ako sa iya kay nalikawan ko ini nga mga bisyo.

 Sang bata pa ako, pirme ako ginaupod ni Nanay sa simbahan sang Katoliko, pero wala gid ako sing may naintiendihan kay wala sing may naga-interpret sa akon sa sign language. Natak-an ako amo nga sang dies anyos ako, wala na ako nagsimba. Pero, gusto ko gihapon mahibaluan ang parte sa Dios.

 Sang 1999, sang 23 anyos ako, nakilala ko ang isa ka babayi halin sa United States nga miembro sang evangelical nga simbahan. Gintudluan niya ako sa Biblia kag sang American Sign Language (ASL). Nanamian gid ako sa akon natun-an amo nga nagdesisyon ako nga magpastor. Gani, nagsaylo ako sa Puerto Rico para magtambong sa Christian training center para sa mga apa. Sang nagpauli ako sa La Ceiba sang 2002, nagtukod ako sang simbahan para sa mga apa kag ginbuligan ako sang akon mga abyan. Kag isa sa ila amo si Patricia, nga sang ulihi nangin asawa ko.

 Bilang pastor sang amon simbahan, nagawali ako gamit ang LESHO, nagapakita sang mga piktyur sang mga istorya sa Biblia, kag nagaarte sang mga istorya para maintiendihan sang mga apa. Ginabisitahan ko man ang mga apa sa kaingod nga mga banwa para palig-unon sila kag buligan sa ila mga problema. Nagmisyonero pa gani ako sa United States kag Zambia. Pero ang matuod, diutay lang gid ang akon nahibaluan parte sa Biblia. Ginatudlo ko lang sa ila ang mga ginsiling sa akon kag kon ano ang akon naintiendihan sa mga piktyur. Pero sa tuod lang, mas madamo ang akon pamangkot sangsa mga sabat.

 Isa ka adlaw, ginhimuhimuan ako sang butig nga istorya sang pila ka miembro sang akon simbahan. Siling nila, palahubog kuno ako kag nagaluib sa akon asawa. Naglalain gid ako kag naakig. Wala madugay, naghalin kami ni Patricia sa simbahan.

 Pirme nagabisita ang mga Saksi ni Jehova sa amon, pero pirme namon sila ginapalayas. Pero sang naghalin kami sa amon simbahan, nagpasugot si Patricia nga magtuon sing Biblia upod sa Saksi nga mag-asawa—si Thomas kag si Liccy. Nagdayaw gid ako sa ila kay bisan indi sila apa, kahibalo sila mag-sign language. Gani nag-upod ako kay Patricia sa pagtuon.

 Sa sulod sang pila ka bulan, nagatuon kami gamit ang mga video sa ASL. Pero sang ginsilingan kami sang pila namon ka abyan nga ang mga Saksi ni Jehova kuno nagasunodsunod lang sa mga tawo, nag-untat kami sa pagtuon sa Biblia. Bisan pa nga ginpaathag sa akon ni Thomas nga ang mga Saksi ni Jehova wala sing lider nga tawo nga ginasunod, wala ko sia ginpatihan.

 Pila ka bulan sang ulihi, sang grabe gid ang depresyon ni Patricia, nangamuyo sia sa Dios nga pabalikon ang mga Saksi ni Jehova sa amon balay. Wala madugay, ang amon kaingod nga isa sa mga Saksi ni Jehova nagbisita kay Patricia kag nagsiling nga pangabayon niya si Liccy nga magbisita sa iya. Nangin matuod gid nga abyan si Liccy. Ginabisitahan niya si Patricia kada semana para palig-unon kag tun-an sa Biblia. Pero, ginaduhaduhaan ko gihapon ang mga Saksi.

 Sang 2012, ang mga Saksi ni Jehova naghimo sing pinasahi nga kampanya nga nagatanyag sing video nga Gusto Mo Bala Mahibaluan ang Kamatuoran? sa LESHO. Gindal-an kami ni Liccy sini nga video. Sang gintan-aw ko ini, nakibot gid ako kay ang madamo nga doktrina nga ginatudlo ko sang una, pareho sang kalayuhon nga impierno kag imortal nga kalag, wala gali ginatudlo sang Biblia.

 Pagkasunod nga semana, nagkadto ako sa Kingdom Hall sang mga Saksi ni Jehova para istoryahon si Thomas. Ginsilingan ko sia nga gusto ko tudluan ang mga apa sang kamatuoran parte sa Biblia, pero indi bilang isa sa mga Saksi ni Jehova. Ang tulumuron ko amo nga magtukod sang bag-o kag lain nga simbahan para sa mga apa. Ginkomendahan ni Thomas ang akon kakugi pero ginpakita niya sa akon ang ginsiling sang Efeso 4:5, nga nagapadaku sang paghiusa sang matuod nga Cristianong kongregasyon.

 Ginhatagan man ako ni Thomas sing video nga Jehovah’s Witnesses—Faith in Action, Part 1: Out of Darkness sa ASL. Ginpakita sa video kon paano ang gamay nga grupo sang mga lalaki nag-usisa sing maayo sang Biblia para maintiendihan ang kamatuoran parte sa panguna nga mga panudlo. Samtang gintan-aw ko ang video, nakita ko ang akon kaugalingon sa sini nga mga lalaki. Pareho sa ila, ginapangita ko man ang kamatuoran. Ato nga video nagkumbinsi gid sa akon nga ang ginatudlo sang mga Saksi kamatuoran kay ginabase gid nila ang ila mga panudlo sa Biblia. Gani nagtuon ako liwat sang Biblia, kag sang 2014, nabawtismuhan kami ni Patricia bilang mga Saksi ni Jehova.

 Nanamian gid ako sa kongregasyon sang mga Saksi ni Jehova kay matinlo ini, bangod matinlo ang Dios. Ang mga nagasimba diri matinlo sa ila ginahambal kag sa ila pagpakig-angot sa iban. Mahidaiton sila nga mga tawo kag ginapalig-on nila ang kada isa. Nahiusa gid ang mga Saksi kag bisan diin man nga lugar ukon bisan ano man nga lenguahe, palareho lang nga kamatuoran sa Biblia ang ila ginatudlo.

 Nanamian gid ako sa akon natun-an sa Biblia. Halimbawa, natun-an ko nga si Jehova amo ang Labing Gamhanan nga Dios, kag Soberano sa bug-os nga duta. Palangga niya ang mga apa kag ang mga indi apa. Ginapakabahandi ko gid ang pagpalangga sang Dios sa akon. Natun-an ko man nga ang duta sa ulihi mangin matahom nga paraiso kag may kahigayunan kita nga mabuhi sing wala katapusan nga may perpekto nga panglawas. Ginahandum ko na gid nga mag-istar sa sini nga kalibutan!

 Nanamian gid kami ni Patricia nga mag-istorya sa iban nga apa parte sa Biblia. Ang iban nga miembro anay sang amon simbahan naga-study na sa Biblia upod sa amon. Subong, wala na ako sing pamangkot parte sa akon mga ginatudlo, indi pareho sang una sang pastor pa ako. Nasabat gid man ang akon mga pamangkot paagi sa pagtuon sang Biblia upod sa mga Saksi ni Jehova.