“Kon gusto mo gid makilala ang Dios, magpadayon ka sa pagtuon sa mga Saksi ni Jehova.” Nakibot gid ako sang mabatian ko ini. Nagatuon na ako sadto upod sa mga Saksi ni Jehova. Para mahangpan ninyo ang akon reaksion, isaysay ko anay sing makadali ang akon nagligad.

 Natawo ako sa Quezaltepeque, isa ka banwa sa El Salvador. Ikan-om ako sa 15 ka kabataan. Gintinguhaan sang akon mga ginikanan nga mangin tampad ako kag matinumanon sa kasuguan. Dugang pa, ginakadtuan kami kon kaisa ni Leonardo kag sang iban pa nga mga Saksi ni Jehova, para tudluan kami parte sa Biblia. Pero ginbalewala ko ang ila ginatudlo kag nagahimo pirme ako sang sala. Sang 14 anyos ako, nagapahubog na ako kag nagadroga upod sa akon mga klasmeyt. Nag-untat sila sa pag-eskwela kag nagsulod sa gang, gani gin-ilog ko man sila. Bilog nga adlaw kami nga nagaistambay sa kalye, nagapangilkil, kag nagapangawat para may igasto kami sa amon bisyo.

 Ginkabig ko na nga pamilya ang gang. Pamatyag ko dapat ko sila unungan. Halimbawa, bangod nakadroga ang isa ka miembro sang amon gang, ginkastigo niya ang isa ko ka kaingod. Nabaklid sang akon kaingod ang akon abyan kag nakatawag sia sang pulis. Naakig ako amo nga ginlampusan ko sang baratiha ang salakyan sang akon kaingod para buy-an niya ang akon abyan. Nagapakitluoy ang akon kaingod nga mag-untat na ako samtang isaisa ko nga ginalampusan ang mga bintana sang iya salakyan, pero wala ako namati.

 Sang 18 anyos ako, nakig-away kami sa mga pulis. Sang ihaboy ko na kuntani ang bomba nga ginhimo namon, naglupok ini sa akon kamot—ambot kon ngaa. Nadumduman ko lang nga nakita ko ang akon kamot nga nagwasaag antes ako nalipong. Pagbugtaw ko sa ospital, nakumpol na ang akon tuo nga kamot, bungol na ang akon tuo nga dulunggan, kag halos nabulag na ang akon tuo nga mata.

 Pero bisan amo sini ang natabo sa akon, paggua ko sa ospital, nagbalik ako gihapon sa amon gang. Wala madugay, gindakop ako sang mga pulis kag ginpriso. Nangin close pa gid kami sang mga miembro sang amon gang. Updanay kami sa bilog nga adlaw, magpamahaw, mag-marijuana, asta magtulog.

 Sang sa prisuhan ako, ginkadtuan ako ni Leonardo. Samtang nagaistorya kami, gintudlo niya ang pika sa akon tuo nga butkon. “Nakabalo ka bala kon ano ang buot silingon sinang tatlo ka tipulon nga pika?” pamangkot niya. Siling ko, “Kabalo e,” “sex, drugs, kag rock and roll.” Pero si Leonardo nagsabat: “Sa akon ’ya, ang buot silingon sina ospital, prisuhan, kag kamatayon. Naospital ka, kag ari ka subong sa prisuhan. Nabal-an mo na ang masunod.”

 Nakamarasmas ako sa ginsiling ni Leonardo. Husto sia. Sa akon ginahimo, daw pareho lang nga nagakutkot ako sang akon lulubngan. Ginsilingan ako ni Leonardo nga matuon kami sa Biblia, kag nagpasugot ako. Bangod sa akon natun-an sa Biblia, gusto ko magbag-o. Halimbawa, ang Biblia nagasiling nga “ang pagpakig-upod sa malain nga mga tawo nagaguba sang maayo nga moral.” (1 Corinto 15:33, footnote) Gani ang una ko nga dapat ko himuon amo ang pagpangita sing bag-o nga mga abyan. Gin-untatan ko ang pagtambong sa mga miting sang gang, kag nagtambong na lang ako sa mga miting sang mga Saksi ni Jehova sa sulod sang prisuhan. Diri ko nakilala ang priso nga si Andrés, nga nabawtismuhan bilang isa sang mga Saksi ni Jehova diri sa prisuhan. Gin-agda niya ako nga updanay na lang kami mamahaw kada adlaw. Gani, wala na ako naga-marijuana kon aga. Sa baylo, ginabinagbinag namon ni Andrés ang isa ka bersikulo sang Biblia.

 Natalupangdan dayon sang mga miembro sang gang ang akon pagbag-o. Gani ginpatawag ako sang isa sang mga lider sang gang. Kinulbaan gid ako. Wala ko kabalo kon ano ang iya himuon sa akon, kay daw indi gid puede magbulag sa gang. Nagsiling sia: “Wala ka na nagatambong sa aton mga miting kundi didto ka ’ya sa mga Saksi ni Jehova. Ano plano mo?” Ginsilingan ko sia nga gusto ko magpadayon sa pagtuon sa Biblia kag magbag-o. Nakibot ako sang magsiling sia nga respetuhon ako sang gang kon gusto ko gid mangin Saksi ni Jehova. Nagsiling pa sia: “Kon gusto mo gid makilala ang Dios, magpadayon ka sa pagtuon sa mga Saksi ni Jehova. Paabuton namon nga indi ka na maghimo sing malain. Nalipay gid ako kay husto ang imo ginahimo. Mabuligan ka gid sang mga Saksi. Nagatuon ako sadto upod sa ila sa United States, kag Saksi ni Jehova ang pila ko ka paryente. Indi mahadlok kag padayuna ang imo ginahimo.” Nalipay gid ako bisan pa ginakulbaan gihapon. Ginpasalamatan ko gid si Jehova nga Dios. Daw pareho ako sa pispis nga nakagua sa hawla, kag nahangpan ko ang ginsiling ni Jesus: “Mahibaluan ninyo ang kamatuoran, kag ang kamatuoran magahilway sa inyo.”—Juan 8:32.

 Pero ginatanyagan ako sang droga sang pila ko ka abyan sadto para testingan ako. Nagakasulay gid ako kon kaisa. Pero sang ulihi, paagi sa sigesige nga pangamuyo, nauntatan ko gid man ang akon mga bisyo.—Salmo 51:10, 11.

 Sang makagua ako sa prisuhan, abi sang iban mabalik ako sa akon malain sadto nga pagkabuhi, pero nagsala sila. Sa baylo, nagakadto ako pirme sa prisuhan para isugid sa iban nga priso ang akon natun-an sa Biblia. Sang ulihi, nakumbinsi gid man ang akon mga abyan sadto nga nagbag-o na ako. Pero ang makapasubo, akig gihapon sa akon ang akon mga kaaway sadto.

 Isa ka adlaw samtang nagabantala, ako kag ang akon upod ginlibutan kag gintayaan sang armado nga mga miembro sang kaaway ko sadto nga gang, kag gusto nila nga patyon ako. Matinahuron pero may kaisog nga ginpaathag sang akon upod sa ila nga indi na ako miembro sang gang. Gintinguhaan ko nga mangin kalmado. Pagkatapos nga ginkastigo ako kag ginpaandaman nga indi na magbalik sa sina nga lugar, ginpalakat kami. Ginpabag-o gid ako sang Biblia. Sadto, gusto ko gid magbalos. Pero subong ginasunod ko na ang laygay sang Biblia sa 1 Tesalonica 5:15: “Pat-ura nga wala sing magbalos sang kahalitan sa kahalitan kay bisan sin-o, kundi himua pirme ang maayo sa isa kag isa kag sa tanan.”

 Sang nangin Saksi ni Jehova na ako, gintinguhaan ko gid nga mangin tampad. Kabudlay gid sini. Pero ginbuligan ako ni Jehova nga Dios, sang laygay sang Biblia, kag sang akon mga abyan, amo nga nahimo ko ini. Indi ko gid gusto nga magbalik sa akon sadto pagkabuhi.—2 Pedro 2:22.

 Mapintas gid ako sadto. Sigurado nga patay na ako subong kon wala ako magbag-o. Ginpabag-o gid ako sang akon natun-an sa Biblia. Nauntatan ko ang akon mga bisyo. Natun-an ko nga mangamigo sa akon mga kaaway sadto. (Lucas 6:27) Kag subong may mga abyan ako nga nagbulig sa akon nga mangin maayo. (Hulubaton 13:20) Malipayon na ako kag may direksion na ang akon kabuhi, nga amo ang pag-alagad sa Dios nga nagpatawad sa akon malain nga mga buhat sadto.—Isaias 1:18.

 Sang 2006, nakaeskwela ako sa pinasahi nga eskwelahan para sa indi minyo nga Cristianong mga ebanghelisador. Pila ka tuig sang ulihi, napangasawa ko ang akon matahom nga asawa, kag ginaatipan namon ang amon bata nga babayi. Nagatudlo na ako pirme sa iban sang mga prinsipio sa Biblia nga nakabulig sa akon. Gulang man ako sa isa ka kongregasyon, kag ginabuligan ko ang mga pamatan-on nga likawan ang akon ginhimo sadto. Sa baylo nga magkutkot sang akon lulubngan, nagapanikasog ako nga matigayon ang ginsaad sang Dios nga palaabuton suno sa Biblia.