Ginpadaku ako nga Katoliko sa Rochester, New York. Nagbulagay ang akon ginikanan sang walo ka tuig pa lang ako. Kon Lunes asta Biernes ara ako sa akon iloy nga nagaistar sa apartment para sa mga pigado. Dayon, kon Sabado kag Domingo, ara ako sa akon amay nga nagaistar sa isa ka manggaranon nga lugar. Nakita ko kon daw ano kabudlay para sa akon iloy nga magpadaku sing anom ka kabataan, gani naghandum gid ako nga magmanggaranon para mabuligan ko ang akon pamilya.

 Gusto gid sang akon amay nga mangin maayo ang akon kabuhi, gani ginpabisita niya ako sa isa ka kilala nga eskwelahan nga nagatudlo sing hotel management. Nanamian gid ako sa eskwelahan gani nagpa-enrol ako didto. Napensaran ko nga basi amo na ini ang sabat sang Dios sa akon pangamuyo nga magmanggaranon kag mangin malipayon. Nagtuon ako sang hotel administration, business law, kag corporate finance sing lima ka tuig samtang nagatrabaho sa isa ka casino hotel sa Las Vegas, Nevada.

 Sang 22 anyos ako, nangin assistant vice president ako sang isa ka casino hotel. Para sa iban, manggaranon na ako kag madinalag-on kay pirme ako nagakaon sang pinakamaayo nga pagkaon kag nagainom sang malahalon gid nga mga ilimnon. Siling sang akon mga amigo nga negosyante, “Dumduma nga ang kuarta amo ang pinakaimportante nga butang sa kalibutan.” Para sa ila, amo ini ang sekreto sa matuod nga kalipay.

 Lakip sa akon obra ang pag-abiabi sa manggaranon katama nga mga tawo nga nagakadto sa Las Vegas para magsugal. Pero, nakita ko nga bisan tuman sa ila ka manggaranon, daw indi sila malipayon. Bisan ako amat-amat man nga nangin indi malipayon. Sa tuod lang, samtang nagadamo ang akon kuarta, nagadamo man ang akon kabalaka kag indi na ako maayo makatulog kon gab-i. Nakapamensar pa gani ako nga maghikog na lang. Nadulaan gid ako sing paglaum, gani namangkot ako sa Dios, “Diin ko makita ang matuod nga kalipay?”

 Sa sina nga tion, ang duha ko ka utod nga babayi nga nangin Saksi ni Jehova nagsaylo sa Las Vegas. Bisan wala ko ginbaton ang mga literatura nga ginahatag nila sa akon, nagpasugot ako nga basahon ang akon Biblia upod sa ila. Sa akon Biblia, ang tanan nga ginhambal ni Jesus naimprinta sa pula. Nagapati gid ako sa tanan nga ginhambal ni Jesus, gani amo ina ang ginagamit sang akon mga utod nga babayi sa pagpakig-istorya sa akon. Personal ko man nga ginabasa ang akon Biblia.

 Nakibot gid ako sa akon mga nabasahan. Halimbawa, nagsiling si Jesus: “Kon mangamuyo kamo, indi ninyo pagsulitsulita ang inyo ginasiling, subong sang ginahimo sang mga tawo sang mga pungsod, kay nagahunahuna sila nga pamatian sila sang Dios kon madamo ang ila ginasiling.” (Mateo 6:7) Pero, may ginhatag sa akon ang pari nga piktyur ni Jesus kag siling niya nga kon mangamuyo ako sa sina nga piktyur sing napulo ka Amay Namon kag napulo ka Maghimaya ka Maria, ihatag sang Dios ang bisan ano kadaku nga kuarta nga kinahanglan ko. Pero, indi bala ginasulitsulit ko ang akon pangamuyo? Nabasa ko man ang siling ni Jesus: “Indi man kamo magtawag nga amay kay bisan sin-o sa duta, kay isa lang ang inyo Amay nga yara sa langit.” (Mateo 23:9) Gani nagpensar ako, ‘Ngaa kami nga mga Katoliko, “Father” ang tawag namon sa amon mga pari?’

 Sang nabasa ko ang libro sang Santiago sa Biblia, ginpamalandungan ko ang akon kabuhi. Sa kapitulo 4 sini, ginsulat ni Santiago: “Wala bala kamo makahibalo nga ang pagpakig-abyan sa kalibutan pagpakig-away sa Dios? Gani, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Santiago 4:4) Kag mas natandog pa gid ako sa ginsiling sang bersikulo 17: “Gani, kon nahibaluan sang isa kon paano himuon ang husto apang wala niya ini ginahimo, nakasala sia.” Gintawgan ko dayon ang akon mga utod nga babayi kag ginsilingan nga mauntat na ako obra sa casino hotel kay indi ko na gusto nga madalahig sa sugal kag mangin mahunahunaon pirme sa kuarta.

 Gusto ko nga mangin maayo na ang akon kaangtanan sa Dios pati na sa akon ginikanan kag mga utod. Para mahimo ini, nagdesisyon ako nga pasimplehon ang akon kabuhi. Pero, ang paghimo sini nga mga pagbag-o indi gid mahapos. Halimbawa, may mga offer nga i-promote ako sa casino hotel kag doblehon ukon triplehon pa gani ang akon sueldo. Pero sa tapos ko mapangamuyuan ini, nagdesisyon ako nga indi amo sini ang kabuhi nga gusto ko. Naghalin ako sa akon obra, kag nag-istar sa garahe sang balay sang akon iloy, kag nang-laminate sing mga menu sang mga restaurant.

 Bisan ginbuligan ako sang Biblia nga maghimo sing maayo nga mga desisyon, indi ko gihapon gusto magtambong sa mga miting sang mga Saksi ni Jehova. Sang ginpamangkot ako sang mga utod ko nga babayi kon ngaa wala ako nanamian sa mga Saksi ni Jehova, nagsabat ako: “Kay ginaguba sang inyo Dios nga si Jehova ang mga pamilya. Wala kamo ‘ya nagaselebrar sing Krismas kag birthday kag para sa akon amo lang ina ang tion nga makaupod ko kamo.” Naghibi ang isa ko ka utod nga babayi kag ginpamangkot niya ako: “Kon indi Krismas kag wala sing birthday diin ka kon gusto ka namon makaupod?” Daw ginkumos ang akon dughan sa akon nabatian, kag naghibi man ako.

 Narealisar ko nga sala ako, kag palangga gid sang mga Saksi ni Jehova ang ila mga pamilya. Gani, nagdesisyon ako nga magtambong sa Kingdom Hall. Didto ko nakilala si Kevin, isa ka eksperiensiado nga manunudlo sa Biblia. Gintun-an ako ni Kevin sa Biblia.

 Simple lang kag balanse ang kabuhi ni Kevin kag sang iya asawa kay gusto nila nga mas madamo ang ila tion sa pagtudlo sa iban parte sa Biblia. Ang iban sang ila kita ginagamit nila para makakadto sa Africa kag Central America para magbulig sa pagtukod sang mga branch office sang mga Saksi didto. Malipayon gid sila kag palangga gid nila ang isa kag isa. Dayon siling ko, “Amo man sina nga kabuhi ang gusto ko.”

 Ginpatan-aw ako ni Kevin sang isa ka video parte sa kalipay sa pag-alagad bilang misyonero kag nagdesisyon ako nga amo man sina ang himuon ko. Sang 1995, sa tapos matun-an sing maayo ang Biblia sa sulod sang anom ka bulan, ginbawtismuhan ako bilang isa ka Saksi ni Jehova. Imbes nga mangamuyo nga magmanggaranon, nangamuyo ako nga, “Indi ako pagpaimula ukon pagpamanggara.”—Hulubaton 30:8.

 Manggaranon na gid ako subong—indi sa kuarta kundi sa espirituwal. Nakilala ko ang akon matahom nga asawa nga si Nuria sa Honduras kag magkaupod kami nga nag-alagad bilang misyonero sa Panama kag sa Mexico. Matuod gid ang ginasiling sang Biblia: “Ang pagpakamaayo ni Jehova amo ang nagapamanggad sa tawo, kag wala Sia nagadugang sing kasakit sa sini”!—Hulubaton 10:22.