Nagdaku ako sa malinong nga uma sa Tampere, Finland. Indi relihioso ang amon pamilya, pero importante sa amon ang edukasyon kag maayo nga pamatasan. German si Nanay, kag sang gamay pa ako, nagabakasyon ako kon kaisa sa ila ni Lolo kag ni Lola sa West Germany.

 Bata pa ako, nanamian na ako sa sports. Tanan na lang nga klase sang sports ginaentrahan ko, pero sang 14 anyos ako, nagkonsentrar ako sa tennis. Sang nag-16 anyos ako, duha ukon tatlo ka beses ako nga nagapraktis kada adlaw—duha ka sesyon sang propesyonal nga paghanas kag dayon nagapraktis pa gid ako pagkagab-i. Nanamian gid ako sa tennis kay kinahanglan ko gamiton ang akon pensar kag makapoy ini nga hampang. Nanamian ako makig-upod sa akon mga abyan kag mag-inom-inom man kon kaisa, pero wala gid ako nagdroga kag nagpahubog. Ang akon kabuhi nasentro sa tennis—amo ini ang pinakaimportante sa akon.

 Nagsugod ako hampang sa ATP sang 17 anyos ako. a Sang nagdaug ako sa pila ka tournament, nangin bantog ako sa amon pungsod. Sang 22 anyos ako, isa ako sa 50 nga pinakamaayo nga player sa tennis sa bilog nga kalibutan.

 Sa sulod sang tinuig, nagakadto ako sa sarisari nga pungsod para maghampang sang tennis. Nakita ko ang manami nga mga lugar, pero nakita ko man ang madamo nga problema sa kalibutan lakip ang krimen, pag-abuso sa droga, kag paghalit sa palibot. Halimbawa, sang didto ako sa United States, ginsilingan kami nga indi magkadto sa pila ka lugar kay delikado. Naakig gid ako. Isa pa, bisan nanamian ako sa akon ginahimo, daw may kulang gid sa akon kabuhi.

 Ang akon nobya nga si Sanna nagtuon sa Biblia upod sa mga Saksi ni Jehova. Daw naham-ot ako magtan-aw sa iya, pero wala ko sia ginpunggan sa pagtuon. Sang 1990, nagpakasal kami kag nabawtismuhan sia bilang isa sa mga Saksi ni Jehova pagkasunod nga tuig. Indi ako relihioso, pero nagapati ako nga may Dios. Nadumduman ko pa nga pirme ako ginabasahan sang una ni Lola sang Biblia kag gintudluan niya ako mangamuyo.

 Isa ka adlaw, sang nagbisita kami ni Sanna sa mag-asawa nga Saksi, ginpakita sa akon sang bana nga si Kari ang tagna sa Biblia parte sa “katapusan nga mga adlaw.” (2 Timoteo 3:1-5) Nagdayaw gid ako, kay narealisar ko nga amo gali ini ang rason kon ngaa malain ang sitwasyon sang kalibutan. Sadto nga adlaw, wala namon gawa maistoryahan ang parte sa relihion. Pero sugod sadto, nagaistoryahanay na kami ni Kari parte sa Biblia, kag insakto man ang tanan ko nga natun-an. Bangod masako ako kag pirme nagabiyahe, indi kami regular nga makakitaay ni Kari, pero wala sia nangampo. Ginasulatan niya ako para sabton ang akon mga pamangkot kon magtuon kami. Ang tanan ko nga mabudlay nga pamangkot nasabat paagi sa Biblia, kag amat-amat ko nga nakita ang tema sang bilog nga Biblia—nga ang Ginharian sang Dios amo ang magapahanabo sang katuyuan sang Dios. Daku gid ang epekto sa akon sang nahibaluan ko nga ang ngalan sang Dios amo si Jehova kag kon ano na ang nahimo niya para sa aton. (Salmo 83:18) Natandog gid ako sa paghatag niya sang halad gawad—indi lang ini kahimusan ukon pormalidad lang kundi pagpakita ini sang Dios sang iya pagpalangga. (Juan 3:16) Natun-an ko man nga puede ako mangin abyan sang Dios kag magkabuhi sing wala katapusan sa malinong nga paraiso. (Santiago 4:8) Gani nakapamensar ako, “Paano ko mapakita ang akon pagpasalamat?”

 Gin-usisa ko ang akon kabuhi. Natun-an ko sa Biblia nga mas mangin malipayon kita kon nagahatag, gani gusto ko isugid ang akon mga ginapatihan sa iban. (Binuhatan 20:35) Bilang propesyonal nga atleta, wala ako sa balay sing mga 200 ka adlaw kada tuig bangod nagaentra ako sa mga tournament. Ang kabuhi sang amon pamilya nasentro lang sa akon paghampang sing tennis. Narealisar ko nga kinahanglan ko magbag-o.

 Nahibaluan ko nga madamo ang indi makaintiende kon bayaan ko ang tennis bangod sa relihion. Pero mas daku ang balor sang kahigayunan nga makilala pa gid si Jehova kag mabaton ang kabuhi nga wala sing katapusan sangsa bisan ano nga padya nga mahatag sang paghampang ko sang tennis, gani wala ako nabudlayan sa pagdesisyon. Determinado ako nga indi pagsapakon ang ginahambal sang iban, kay akon ini desisyon. Ang bersikulo sa Biblia nga nakabulig gid sa akon amo ang Salmo 118:6: “Si Jehova yara sa akon tupad; indi ako mahadlok. Ano ang mahimo sang tawo sa akon?”

 Sadto nga tion, mas dalagku pa gid ang ginatanyag sa akon nga maghampang sa propesyonal nga tennis, nga indi na ako magpalibog pa sa akon kabuhi sa masunod nga tinuig. Pero nakadesisyon na ako, gani wala ko ini ginbaton kag nag-untat ako hampang sa ATP. Padayon ako nga nagtuon sa Biblia, kag sang Hulyo 2, 1994, nabawtismuhan ako bilang Saksi ni Jehova.

 Sa akon bahin, indi trahedya ang nagpahunahuna sa akon parte sa Dios. Daw wala ko man ginpangita ang kamatuoran. Daw kanami na kag kompleto sang akon kabuhi. Pero sa wala ginapaabot, daw ginpangita ako sang kamatuoran, natun-an ko nga may katuyuan ang kabuhi, kag nangin mas maayo ang akon kabuhi! Nangin mas suod ang amon pamilya. Kag nalipay gid ako nga ang tatlo ko ka bata nga lalaki nag-ilog man sa akon, indi bilang player kundi bilang Cristiano.

 Nagahampang gihapon ako sang tennis. Sa sulod sang tinuig, nangin trabaho ko ini, halimbawa, bilang coach kag manedyer sang tennis center. Pero ang kabuhi ko wala na nasentro sa sports. Sadto, nagapraktis ako sing inoras para mangin sagad pa gid ako nga player kag magkampeon. Pero bilang bug-os tion nga manugbantala subong, nalipay ako nga gamiton ang akon tion sa pagbulig sa iban nga mahibaluan kag maaplikar ang mga prinsipio sa Biblia nga nagpabag-o sa akon. Nalipay gid ako kay gin-una ko ang akon relasyon kay Jehova nga Dios kag nasugid ko sa iban ang akon paglaum sa matahom nga palaabuton.—1 Timoteo 6:19.