May mga tawo nga madugay gid antes nakatuon sa ila mapait nga mga eksperiensia. Amo ako sina. Natawo ako kag nagdaku sa Barcelona, ang ikaduha sa pinakadaku nga siudad sa Spain. Ang akon pamilya nagaistar sa lugar nga ginatawag Somorrostro, kag sakop sini ang daku nga bahin sang baybayon sang siudad. Ang Somorrostro kilala bilang lugar nga madamo sing kriminal, drug pusher, kag mga adik.

 Siam kami ka mag-ulutod, kag ako ang kamagulangan. Pigado gid kami, gani ginapaobra ako ni Tatay bilang manugpamulot sing bola sa isa ka tennis club. Dies anyos pa lang ako pero napulo man ka oras ang akon obra kada adlaw. Gani, indi ako makaeskwela pareho sa iban nga mga bata nga kaedad ko. Sang 14 anyos ako, nag-obra ako bilang opereytor sang makina sa isa ka metal shop.

 Sang 1975, ginpatawag ako nga magsoldado, kay amo ini ang ginapatuman sa Spain. Adbenturero ako, gani nagboluntaryo ako nga mag-entra sa Spanish Foreign Legion sa Melilla, nga ginaistaran sang mga Espanyol sa North Africa. Sa sini nga tion, grabe gid ang akon pagkaadik kag pagkapalahubog.

 Sang maghalin ako sa Legion, nagpauli ako sa Barcelona kag nagporma sing isa ka gang. Bisan ano lang ginakawat namon. Dayon, ginabaligya namon ang amon mga kinawatan para masuportahan ang amon bisyo sa droga. Nagsugod ako sa paggamit sing LSD kag amphetamines, kag nagpaayaw ako sa pag-sex, pagpahubog, kag pagsugal. Ginguba gid sini ang akon kabuhi, kag labi ako nga nangin mapintas. Pirme ako nagadala sing kutsilyo, wasay, ukon talibong, kag wala ako nahadlok nga gamiton ini kon kinahanglan.

 Isa ka bes, may ginkawat kami sang akon gang nga salakyan kag ginlagas kami sang mga pulis. Daw eksena lang ini sa pelikula. Mga 30 kilometros na ang amon nadalagan, kag nagpaniro ang mga pulis. Ginbunggo na lang sang amon drayber ang salakyan para makapalagyo kami tanan. Sang mabal-an ini ni Tatay, ginpalayas niya ako sa balay.

 Sa masunod nga lima ka tuig, sa kalye ako nag-istar. Nagatulog ako sa gua sang mga puertahan, sa trak, sa mga pulungkuan sa parke, kag sa mga patyo. Nakaistar pa gani ako sa kueba. Wala sing katuyuan ang akon kabuhi, gani pamatyag ko indi importante kon bala mabuhi ukon mapatay ako. Nadumduman ko pa nga ginlaslas ko ang akon pulso sang isa ka bes nga high gid ako sa droga. Ara gihapon ang pinalian sini asta subong.

 Sang 28 anyos ako, ginpangita ako ni Nanay kag ginsilingan nga magpauli sa balay. Nagpasugot ako kag nagpromisa ako sa iya nga mabag-o na ako, pero madugay pa antes ko natuman ina nga promisa.

 Sang isa ka hapon, may duha ka Saksi ni Jehova nga nagpanuktok sa amon puertahan. Namati ako sa ila, pero nagsinggit si Tatay halin sa sulod sang balay nga sirahan ko sang puertahan ang mga Saksi. Indi ko gid gusto nga ginamandaran ako, gani wala ko gintuman si Tatay. Gintanyagan ako sang mga Saksi sing tatlo ka gamay nga libro, kag ginbaton ko ini. Ginpamangkot ko kon diin sila nagatipon, kag pagligad sang pila ka adlaw, nagkadto ako sa Kingdom Hall pero wala ako anay nagsulod.

 Ang una ko gid nga natalupangdan amo ang ila mahipid nga pamayo. Lain gid ini sa akon malaba nga buhok, nagagumon nga bungaros, kag daan nga bayo. Maathag nga lain gid ako sa ila, gani wala ako nagsulod. Pero nakibot ako kay nakita ko didto si Juan, ang akon upod sadto sa gang kag nakaamerikana na sia. Nabal-an ko sang ulihi nga mga isa ka tuig na gali sia nga nangin Saksi ni Jehova. Bangod ara sia, nagbakod ang akon buot nga magsulod kag magtambong sa ila pagtinipon. Diri nagsugod ang akon pagbag-o.

 Nagpasugot ako nga magtuon sing Biblia kag naintiendihan ko gilayon nga kon gusto ko nga malipay ang Dios sa akon, dapat ko bag-uhon ang akon pagkapalaakig kag imoral nga pagkabuhi. Pero indi ini mahapos. Natun-an ko nga para mapalipay ko si Jehova, dapat ko ‘bag-uhon ang akon panghunahuna.’ (Roma 12:2) Natandog gid ako sa kaluoy sang Dios. Bisan pa madamo ako sing sala nga nahimo, nabatyagan ko nga ginahatagan niya ako sing kahigayunan nga magsugod liwat. Ang akon natun-an parte kay Jehova nga Dios nagdulot gid sa akon tagipusuon. Nag-athag gid sa akon nga may Manunuga nga nagaulikid sa akon.​—1 Pedro 5:6, 7.

 Bangod sini, amat-amat ako nga nagbag-o. Halimbawa, sang natun-an ko ang parte sa pagpanigarilyo, nagsiling ako sa akon kaugalingon, ‘Gusto ni Jehova nga Dios nga mangin bug-os ako nga matinlo kag wala sing higko, gani dapat untatan ko ang pagpanigarilyo!’ (2 Corinto 7:1) Ginhaboy ko dayon ang akon sigarilyo sa basurahan.

 Dapat ko man untatan ang paggamit kag pagbaligya sang droga. Indi ini mahapos kag kinahanglan gid ang panikasog. Para mahimo ko ini, kabalo ko nga dapat ko untatan ang akon koneksion sa mga upod ko sang una. Ang ila impluwensia nagapugong sa akon nga mag-uswag sa espirituwal. Pero amat-amat ko nga natun-an nga magsalig sing labi sa Dios kag sa bulig sang bag-o ko nga mga abyan sa kongregasyon. Sa ila ko lang nabatyagan ang klase sang pagpalangga kag interes nga wala ko gid mabatyagan sadto. Sa pagligad sang binulan, nauntatan ko gid man ang pagdroga kag ‘nasuklob ko ang bag-o nga personalidad,’ nga magabulig sa akon nga mapalipay ang Dios. (Efeso 4:​24) Sang Agosto 1985, ginbawtismuhan ako bilang isa sa mga Saksi ni Jehova.

 Ginbag-o gid sang Biblia ang akon kabuhi. Ginhilway ako sini sa klase sang pagkabuhi nga nagaguba sang lawas kag nagadula sang dignidad. Sa tuod lang, sobra 30 sa mga upod ko sadto ang hoben pa nga nagkalamatay bangod sa AIDS ukon sa iban pa nga balatian nga resulta sang pagdroga. Maayo lang kay nagtuon ako sa Biblia, amo nga wala ko madangatan ang masakit nga natabo sa ila.

 Parte na lang sang akon nagligad nga isa ako ka maakigon nga pamatan-on nga nagadala sing mga kutsilyo kag wasay. Daw indi ako makapati nga maabot ang tion nga Biblia ang dala ko kag ginagamit ko ini para buligan ang mga tawo. Subong, kami sang akon asawa nagagamit sang madamo namon nga oras sa pagtudlo sang Biblia sa iban, bilang mga Saksi ni Jehova.

 Wala nangin Saksi ni Jehova sanday Tatay kag Nanay. Pero ginapasalamatan gid nila ang maayo nga epekto sa akon sang pagtuon ko sa Biblia. Ginaapinan pa gani ni Tatay ang mga Saksi sa atubangan sang iya mga kaupod sa obra. Nakita gid niya nga nagbag-o ako bangod sa akon natun-an sa Biblia. Pirme nagahambal si Nanay nga tani sadto pa ako nagtuon sa Biblia, kag insakto gid sia.

 Natun-an ko sa akon mga inagihan sa kabuhi nga wala gid sing pulos ang kalipay nga ginahatag sang droga kag iban pa nga bisyo. Subong, nabatyagan ko ang matuod nga kalipay paagi sa pagsugid sa iban sang ginatudlo sang Pulong sang Dios. Amo ini ang panudlo nga nagluwas sang akon kabuhi.