Natawo ako sa Montreal, ang pinakadaku nga siudad sa probinsia sang Quebec sa Canada. Apat kami nga mag-ulutod. Ginpadaku kami sang amon mapinalanggaon nga mga ginikanan sa matahom nga lugar sa Rosemont kag malinong ang amon pagkabuhi.

 Sang bata ako, interesado ako sa Biblia. Nadumduman ko sang 12 anyos ako, nanamian ako magbasa sang Bag-ong Katipan parte sa kabuhi ni Jesus. Gusto ko sundon ang pagpalangga kag kaluoy ni Jesus sa iban. Galing amat-amat nga nadula ini nga handum samtang nagadaku ako kay nakig-upod ako sa indi maayo nga mga tawo.

 Ang akon amay maayo mag-saxophone. Ginpapanubli niya sa akon indi lang ang iya saxophone kundi ang iya man interes sa musika kag amo ini ang nangin sentro sang akon kabuhi. Hilig ko gid ang musika amo nga sang ulihi nakatuon man ako maggitara. Wala madugay, nagporma ako sing banda upod sa mga amigo ko, kag nagatokar kami sa pila ka mga show. Natalupangdan ini sang pila ka kilala nga prodyuser sang musika kag nagtanyag sila nga i-promote ang akon musika. Nagpirma ako sing kontrata sa isa ka daku nga record company. Nagsikat ang akon musika kag pirme ini ginapatokar sa radio station sa Quebec.

 Daw ara na sa akon ang tanan. Bataon ako, sikat, damo kuarta, kag nanamian gid ako sa ginahimo ko. Kon adlaw, naga-gym ako, nagapa-interbyu, nagapirma sang mga autograph, kag naga-guest sa TV. Kon gab-i, nagatokar ako kag naga-atend sa mga party. Nagahatag sing stress ang pag-atubang sa madamo nga tawo. Gani para maghaganhagan ini, nagsugod ako sa pag-inom kag sang ulihi nagdroga ako. Wala ako sing labot kon ano ang matabo sa iban kag imoral ang akon pagkabuhi.

 Ang iban nahisa sa akon kay malipayon ako kon tan-awon. Pero ang matuod, nasubuan gid ako ilabi na kon nagaisahanon ako. Pamatyag ko daw may kulang sa akon. Nadepres ako kag madamo sing ginakabalak-an. Sang nagasikat na ako, ang duha sang akon mga prodyuser napatay sa AIDS. Naglalain gid ako! Bisan pa nanamian ako sa musika, indi ko gid gusto ang klase sang pagkabuhi sang mga tawo sa sini nga obra.

 Bisan pa daw ara na sa akon ang tanan, nahibaluan ko nga indi gid maayo ang nagakatabo sa kalibutan. Ngaa wala sing katarungan bisan diin? Nagapalibog ako kon ngaa ginapabay-an lang ini sang Dios. Ang matuod, pirme kon ini ginapangamuyo sa Dios. Isa ka bes, samtang wala pa kami sing concert, ginbasa ko liwat ang Biblia. Bisan pa indi ko maintiendihan ang kalabanan sang ginabasa ko, nakasiling ako nga malapit na gid ang katapusan sang kalibutan.

 Isa ka bes, nabasahan ko sa Biblia nga si Jesus nagpuasa sa desyerto sing 40 ka adlaw. (Mateo 4:1, 2) Abi ko kon magpuasa man ako, basi pa lang magpakita ang Dios sa akon. Gani nag-set ako sang petsa kon san-o ako mapuasa. Duha ka semana antes sini, may duha ka Saksi ni Jehova nga nanuktok sa puertahan. Ginpasulod ko sila dayon. Gintulok ko sa mata ang isa sa mga Saksi nga si Jacques, kag ginpamangkot, “Paano naton mabal-an nga nagakabuhi na kita sa katapusan nga mga adlaw sini nga kalibutan?” Ginbuksan niya ang Biblia kag ginbasa ang 2 Timoteo 3:1-5. Ginpaarakan ko sila sing pamangkot. Kumbinsido gid ako sa ila simple kag maathag nga mga sabat kay base gid ini sa Biblia. Sa tapos sang pila ka beses nga pagbisita nila, narealisar ko nga indi ko na kinahanglan nga magpuasa.

 Nagtuon ako sing regular sa mga Saksi. Sang ulihi, ginpautdan ko ang akon malaba nga buhok kag nagtambong sa tanan nila nga pagtilipon sa ila Kingdom Hall. Ang maayo nga pag-abiabi nila sa akon nagkumbinsi pa gid sa akon nga nakita ko na ang kamatuoran.

 Pero kinahanglan ko maghimo sing daku nga mga pagbag-o sa akon kabuhi para masunod ang natun-an ko sa Biblia. Dapat ko untatan ang paggamit sing ilegal nga droga kag ang akon imoral nga pagkabuhi. Kinahanglan ko man bag-uhon ang akon batasan nga kaugalingon ko lang ang ginapamensar ko. Sa baylo dapat ako magpakita sing pag-ulikid sa iban. Bilang nagasolo nga ginikanan, dapat ko man atipanon ang emosyonal kag espirituwal nga kinahanglanon sang akon duha ka bata. Gani nag-untat ako sa pagkamusikero kag nag-obra sa isa ka pabrika nga gamay ang sueldo.

 Indi mahapos himuon ini nga mga pagbag-o. Sang gin-untatan ko ang pagdroga, naglalain gid ako sa mga withdrawal symptom sini kag pila ka beses ako nga nagbalik liwat sa pagdroga. (Roma 7:19, 21-24) Mabudlay man bag-uhon ang akon imoral nga pagkabuhi. Daw naluyahan pa gid ako kay ang akon obra makakalapoy kag kagamay lang sang sueldo. Ang sueldo ko sa tatlo ka bulan nga obra, duha ka oras ko lang ina sang musikero pa ako.

 Ang pangamuyo nakabulig sa akon nga mabatas ang mga kabudlayan sang mga pagbag-o nga ginhimo ko. Nakabulig man ang regular nga pagbasa sang Biblia. Ang pila ka bersikulo sa Biblia nagpalig-on gid sa akon. Isa sini ang 2 Corinto 7:1, nga nagapalig-on sa mga Cristiano nga ‘tinluan ang ila kaugalingon sa tanan nga nagapahigko sang lawas kag tagipusuon.’ Ang isa pa ka bersikulo nga nagpasalig sa akon nga masarangan ko nga untatan ang akon mga bisyo amo ang Filipos 4:13. Ini nagsiling: “Sa tanan nga butang may kusog ako paagi sa isa nga nagapabakod sa akon.” Ginsabat ni Jehova nga Dios ang akon mga pangamuyo kag ginbuligan niya ako nga maintiendihan ang kamatuoran sa Biblia kag sundon ini. Gani gindedikar ko ang akon kabuhi sa iya. (1 Pedro 4:1, 2) Ginbawtismuhan ako bilang isa sa mga Saksi ni Jehova sang 1997.

 Kon ginpadayon ko ang akon imoral nga kabuhi sang una, sigurado patay na ako. Wala ko kuntani maeksperiensiahan ang malipayon nga kabuhi subong! Isa gid ka pagpakamaayo sa akon ang akon mabuot nga asawa nga si Elvie. Daku nga tion ang ginagamit namon sa pagtudlo sing Biblia sa mga tawo. Amo ini ang rason kon ngaa malipayon gid ako kag kontento sa akon kabuhi. Nagapasalamat gid ako kay Jehova nga ginbuyok niya ako sa iya.—Juan 6:44.