Ang akon pamilya halin sa Tonga, isa ka pungsod nga ginahuman sang mga 170 ka isla, nga ara sa bagatnan-nakatundan sang Pacific. Pigado lang ang amon pagkabuhi sa Tonga, wala kami sang kuryente ukon salakyan. Pero ang balay namon may suplay sang tubig kag may ginasagod kami nga mga manok. Kon wala kami sing klase sang akon duha ka utod nga lalaki, nagabulig kami sa amon tatay sa pag-atipan sang amon uma, diin nagatanom kami sang saging, ube, palawan, kag balinghoy. Ginabaligya sang amon tatay ang amon mga pananom kag may iban pa sia nga obra para masuportahan kami. Pareho sang iban nga nagaistar man sa isla, ang amon pamilya nagatahod gid sa Biblia, kag regular man kami nga nagasimba. Bisan pa sa sini, nagapati kami nga ang paagi lang para mag-ayuhan ang amon kabuhi amo ang pagsaylo sa mas manggaranon nga pungsod.

 Sang 16 anyos ako, ang amon pamilya ginpasaylo sang akon tiyo sa California, U.S.A. Nabudlayan gid kami sa bag-o nga kultura didto! Bisan nag-ayoayo ang amon pangabuhi, nag-istar kami sa pigado nga lugar nga madamo sing krimen kag mga adik. Pirme kami makabati sang mga lupok sang pusil kon gab-i, kag kalabanan sa amon mga kaingod nahadlok sa mga gang sang kriminal. Madamo nga tawo ang nagadala sang pusil para proteksionan ang ila kaugalingon ukon solbaron ang mga binaisay. Isa ka bes, naigo ako sang nagtiniruhay bangod sang pagbinaisay kag asta subong ara pa ang bala sa akon dughan.

 Sang hayskul na ako, gusto ko mangin pareho sa iban nga mga tin-edyer. Amat-amat ako nga nabuyo sa magansal nga mga party, grabe nga pag-inom, pagpamintas, kag paggamit sang ilegal nga droga. Sang ulihi, naadik man ako sa cocaine. Para may ibakal sang droga, nagsugod ako sa pagpangawat. Bisan pa palasimba ang akon pamilya, wala gid nila ako ginbuligan nga mabatuan ang impluwensia sang akon mga kaupdanan nga maghimo sing malain. Madamo nga beses ako nga gindakop tungod sang akon masingki nga mga ginahimo. Wala na ako sing kontrol sa akon kabuhi! Sang ulihi, napriso ako.

 Isa ka adlaw sang 1997, samtang yara ako prisuhan, nakita sang isa ka priso nga may ginauyatan ako nga Biblia. Krismas sadto, tion nga sagrado gid para sa kalabanan nga Tongan. Ginpamangkot niya ako kon nakahibalo ako kon ano gid ang ginasiling sang Biblia parte sa pagkabun-ag sang Cristo, pero wala ako kabalo kon ano ang ginasiling sini. Ginpakita niya sa akon ang simple nga rekord sang Biblia parte sa pagkabun-ag ni Jesus, kag nakita ko nga madamo sa mga tradisyon sang Krismas ang wala sa Biblia. (Mateo 2:1-12; Lucas 2:5-14) Nakibot gid ako, kag namensar kon ano pa ang iban nga ginasiling sang Biblia. Ang amo nga tawo nagatambong kada semana sa mga miting sang mga Saksi ni Jehova nga ginahiwat didto sa prisuhan, kag nagdesisyon ako nga mag-upod sa iya. Ginabinagbinag nila ang libro sa Biblia nga Bugna. Bisan gamay lang ang naintiendihan ko sa ila gin-istoryahan, narealisar ko nga tanan nga ginatudlo nila halin gid sa Biblia.

 Sang gintanyagan ako sang mga Saksi nga magtuon sa Biblia, malipayon ako nga nagpasugot. Sa una nga tion, natun-an ko ang parte sa promisa sang Biblia nga paraiso nga duta sa palaabuton. (Isaias 35:5-8) Nangin maathag sa akon nga para mapahamut-an ang Dios, kinahanglan ko maghimo sang daku nga mga pagbag-o sa akon kabuhi. Narealisar ko nga indi ako pasudlon ni Jehova nga Dios sa Paraiso kon indi ko pag-untatan ang akon mga bisyo. (1 Corinto 6:9, 10) Gani namat-od ako nga kontrolon ang akon pagkamaakigon, untatan ang pagpanigarilyo, kag indi na gid liwat magbalik sa grabe nga pag-inom kag pag-abuso sa droga.

 Sang 1999, antes natapos ang akon sentensia sa prisuhan, ginsaylo ako sang mga awtoridad sa immigration camp. Sa sulod sang sobra isa ka tuig, wala ako may naistorya nga Saksi. Pero determinado ako nga bag-uhon ang akon kabuhi. Sang tuig 2000, wala na ako ginpahanugutan sang gobierno nga magpabilin sa United States, gani gin-deport pabalik ako sa Tonga.

 Pagbalik ko sa Tonga, nangita ako dayon sang mga Saksi ni Jehova kag nagpadayon sa pagtuon sa Biblia. Nalipay gid ako sa akon natun-an kag nagdayaw gid ako sang nakita ko nga ginabase sang mga Saksi sa isla ang ila ginatudlo sa Kasulatan, pareho sa ginahimo sang mga Saksi sa United States.

 Kilala ang akon tatay sa komunidad bangod mataas ang iya posisyon sa simbahan. Sa umpisa, ang akon pamilya namroblema kag naugot sa akon pag-upod-upod sa mga Saksi ni Jehova. Pero, sang ulihi, ang akon mga ginikanan nanamian nga nakabulig sa akon ang mga prinsipio sang Biblia para tadlungon ang akon kabuhi.

 Isa sa nabudlayan ko gid amo ang parte sa ilimnon nga ginaabuso sa amon kultura. Madamo nga lalaki sa Tonga ang nagahinguyang sang inoras kada semana sa pag-inom sang kava, isa ka makapahubog nga ilimnon nga ginhimo halin sa gamot sang pepper plant. Sa amon lugar, ginsunod ko ang kustombre nga pagkadto sa kava club halos kada gab-i para mag-inom sang kava asta nga madulaan ako sing animo. Isa sa mga nag-impluwensia sa akon amo ang akon mga abyan nga wala nagatahod sa mga talaksan sang Biblia. Sang ulihi, nakita ko nga ang akon paggawi wala nagapahamuot sa Dios. Naghimo ako sing mga pagbag-o para matigayon ko ang pagpakamaayo sang Dios kag kahamut-an niya.

 Nagsugod ako sa pagtambong sa tanan nga miting sang mga Saksi ni Jehova. Ang pagpakig-upod sa mga nagatinguha nga pahamut-an ang Dios nakabulig sa akon nga mabatuan ang mga pagsulay. Sang 2002, nabawtismuhan ako bilang isa sa mga Saksi ni Jehova.

 Nakabenepisyo ako sa pagkamapinasensiahon sang Dios nga ginpakita sa Biblia: “Mapailubon [si Jehova] sa inyo bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (2 Pedro 3:9) Sigurado gid nga puede niya kuntani tapuson ining malain nga daan nga sistema sang una, pero gintugutan pa niya nga maglawig ini para ang mga tawo kaangay ko may kahigayunan nga mangin abyan niya. Nanamian ako mamensar nga mahimo man niya ako gamiton para buligan ang iban nga magbag-o man.

 Sa bulig ni Jehova, nakontrol ko liwat ang akon kabuhi. Wala na ako nagapangawat para may igasto sa akon makamamatay nga mga bisyo. Sa baylo, ginatinguhaan ko nga buligan ang akon mga isigkatawo nga mangin abyan man ni Jehova. Paagi sa akon pagpakig-upod sa mga Saksi ni Jehova, nakilala ko ang akon matahom nga asawa nga si Tea. Kaupod ang amon bata nga lalaki, malipayon gid ang amon kabuhi subong pamilya. Ululupod namon nga ginatudluan ang iban kon ano ang ginasiling sang Biblia parte sa paglaum sa palaabuton nga mabuhi sing walay katapusan sa malinong nga paraiso.