“Wala gid ’ko nagpensar nga maalagad ko si Jehova sing subong sini.” Amo sini ang ginhambal ni Gwen, nga halin sa England, parte sa iya pagsaylo sa Albania para magbulig sa pagbantala nga hilikuton. a

 Si Gwen isa sa madamo nga Saksi nga nagsaylo sa Albania para magbulig sa pagtipon sang “malahalon nga mga butang sang tanan nga pungsod.” (Hageo 2:7) Ano ang nagpahulag sa ila nga himuon ini? Ano nga mga adjustment ang ila ginhimo agod makasaylo sila? Ano nga makalilipay nga eksperiensia ang nakabulig sa ila nga makapadayon bisan pa sa mga kabudlayan?

 Pareho lang ang rason sang tanan nga manugbantala nga nagkadto sa Albania para magbulig: Palangga nila si Jehova kag gusto nila buligan ang iban nga makilala sia.

 Antes sila magsaylo, may ginhimo sila nga mga pagbag-o para maalagad nila si Jehova sa iban pa nga paagi, kag nakabulig ini sa ila nga maka-adjust sa mga kabudlayan sang nagsaylo na sila sa iban nga pungsod. Si Gwen nagsiling: “Una anay, nagsaylo ako sa grupo nga nagahambal sing Albanian sa amon lugar. Dayon nag-attend ako sa isa ka kombension sa Albania. Sang ulihi, nagbisita ako liwat sing makadali didto, para matun-an ko sing mas maayo ang lenguahe.”

 Sang 23 anyos si Manuela, nagsaylo sia sa lain nga lugar sa ila pungsod sa Italy para magbulig sa isa ka gamay nga kongregasyon. Sia nagsiling: “Nag-alagad ako didto sa sulod sang apat ka tuig. Dayon nabal-an ko nga mas nagakinahanglan sang dugang nga manugbantala sa Albania. Gani nagpayunir ako didto sa sulod sang pila ka bulan.”

 Pito pa lang ka tuig si Federica sang nabatian niya ang isa ka report parte sa Albania sa isa ka kombension. Sia nagsiling: “Ang utod nga nagahatag sang report nagsiling nga ang mga manugbantala sa Albania madamo sing ginasugdan nga Bible study kag ang mga interesado nagatambong sa miting. Ginsilingan ko ang akon mga ginikanan nga gusto ko magkadto sa Albania. Nakibot gid sila, pero nagsiling si Dad nga, ‘Ipangamuyo ini, kag kon kabubut-on ini ni Jehova, pamatian ka niya.’ Pagligad sang pila ka bulan, gin-agda ang amon pamilya nga mag-alagad sa Albania!” Madamo na nga tinuig ang nagligad. Subong si Federica may bana na nga si Orges. Upod sila nga nagaalagad bilang bug-os tion nga mga ministro sa Albania.

 Sang magretiro si Gianpiero, nagsaylo sila sang iya asawa nga si Gloria, sa Albania. Sia nagsiling: “Ginpadaku namon ang amon mga bata nga lalaki sa Italy. Ang tatlo sa ila nagsaylo sa iban nga pungsod nga nagakinahanglan sang dugang nga manugbantala. Napalig-on gid kami sang isa ka artikulo sa Lalantawan nga natig-uluhan ‘Makatabok Ka Bala sa Macedonia?’ Gani gin-istoryahan namon sing maayo kon paano namon mabadyet ang akon pension para makaalagad kami sa Albania.”

 Ang mga gusto magsaylo para makaalagad sa iban nga pungsod dapat magplano sing maayo, kag maghimo sing mga adjustment para makasaylo sila. (Lucas 14:28) Lakip sa dapat nila binagbinagon, amo kon bala masuportahan nila ang ila kaugalingon. Sang ara pa sia sa England, si Gwen nga ginsambit kaina, nag-istar anay sa balay sang iya magulang nga babayi para makakinot sia. Si Sophia kag si Christopher nga halin man sa England, nagsiling: “Ginbaligya namon ang amon salakyan kag pila ka kagamitan. Gusto namon nga makatener sa Albania bisan isa lang ka tuig.” Sing makalilipay, nakaalagad sila didto sing mas madugay.

 Ang iban nga manugbantala nagaalagad sa Albania sa sulod sang pila ka bulan, dayon nagabalik sila sa ila pungsod para mag-obra kag magsupot sing kuarta, kag dayon mabalik naman sa Albania. Amo sina ang ginhimo ni Eliseo kag ni Miriam. Si Eliseo nagpaathag: “Si Miriam nagaistar sa isa ka lugar nga tourist spot sa Italy. Gani mahapos lang magpangita sang part-time nga obra. Nagapauli kami sa ila lugar kon tingadlaw kag nagaobra sing tatlo ka bulan kag dayon mabalik kami sa Albania para mag-alagad sa sulod sang siam ka bulan. Ginhimo namon ini sa sulod sang lima ka tuig.”

 Kon makasaylo na sila, kinahanglan nila mag-adjust sa ila bag-o nga sitwasyon kag nakabulig gid sa ila ang laygay kag halimbawa sang mga Saksi sa lugar nga ila ginsayluhan. Si Sophia nga ginsambit kaina nagsiling: “Kon winter sa Albania, mas matugnaw sangsa amon ginhalinan nga lugar. Gani ginapanilagan ko kon ano ang ginasuksok sang mga sister kag ginailog ko sila.” Si Grzegorz kag ang iya asawa nga si Sona, naghalin sa Poland. Nagsaylo sila sa matahom nga banwa sang Prizren sa Kosovo. b Si Grzegorz nagsiling: “Ang mga kauturan diri mapainubuson, mabuot, kag may pasensia! Ginabuligan nila kami nga matun-an ang lenguahe kag ang iban pa nga butang. Halimbawa, ginatudluan nila kami kon diin nga balaligyaan ang nagabaligya sing mas barato, kag kon paano magpamakal sa merkado.”

 Ang mga nagsaylo sa iban nga duog nakakita sing suod nga mga abyan sa lokal nga mga Saksi kag nakatuon parte sa ila. Si Sona nagpaathag: “Nakita ko kon paano ang gugma ni Jehova nagbag-o sang kabuhi sang mga tawo. Ini nga mga kauturan nagpabakod gid sang akon pagtuo kay nakita ko nga nagbag-o gid ang ila mga pagpati kag ang ila kabuhi sang nakilala nila si Jehova. Nakita man namon nga kinahanglan kami sa kongregasyon kag may mabulig kami. Nagaalagad kami diri upod sa amon mga kauturan nga amon na mga abyan.” (Marcos 10:29, 30) Si Gloria nagsiling: “Madamo diri sang mga sister nga nagbatas sang mapintas nga paghingabot sang mga tawo sa komunidad nga kontra sa mga Saksi. Napalig-on gid ako nga makita nga palangga gid nila si Jehova.”

 Natun-an man sining mga kauturan nga nagsaylo sa iban nga pungsod ang importante nga mga leksion nga posible wala gid nila matun-an kon wala sila magsaylo. Halimbawa, nabatyagan nila ang dugang nga kalipay sang ginhimo nila ang bag-o nga mga butang nga indi mahapos para sa ila. Si Stefano nagsiling: “Sa amon pungsod, sa intercom lang ako pirme nagahambal kon naga-preaching ako, gani malip-ot lang ang akon ginahambal. Pero diri sa Albania, nanamian mag-istorya ang mga tawo samtang nagapangape. Galing mahuluy-on ako, gani sang primero indi ’ko kabalo sang akon ihambal. Pero natun-an ko nga magpakita sing interes sa mga tawo, amo nga subong nanamian na ako makig-istorya sa ila. Nabatyagan ko nga mas naga-enjoy ako subong sa akon pag-preaching.”

 Si Leah nga halin sa United States nagsaylo sa Albania upod sa iya bana nga si William. Nagsiling sia: “Sang magsaylo kami diri, nagbag-o ang amon pagtan-aw sa madamo nga butang kag sa amon pagkabuhi. Madamo kami sing natun-an parte sa pagkamaabiabihon, pagrespeto, kag pag-abyanay! Natun-an namon ang bag-o nga mga paagi sa pagbantala, paggamit sang Biblia sa pagpangatarungan, kag kon paano ihambal ang amon opinyon ukon balatyagon.” Si William nagsiling: “Ang kalabanan nga nagakadto sa Albania nanamian gid sa matahom nga mga baybayon. Ako ’ya, nanamian mag-hiking sa Albanian Alps. Pero ang gusto ko gid diri amo ang mga tawo. Madamo nga baryo sa amon teritoryo ang na-preachingan lang sang may ginhimo nga mga preaching campaign. Sang magkadto kami sa sini nga mga lugar, nanamian gid makig-istorya sing malawig ang mga tawo, gani pila lang ka pamilya ang amon maistorya sa isa ka adlaw.”

 Pero nabatyagan gid sining mga kauturan nga nagsaylo ang grabe nga kalipay kon may mga tawo nga magbaton sang maayong balita. (1 Tesalonica 2:19, 20) Bilang halimbawa, si Laura nga isa ka dalaga kag nagsaylo man sa Albania, nagsiling: “Nag-alagad ako sa Fier. Sa sulod lang sang duha ka tuig kag tunga, 120 ang mga bag-uhan nga nangin kalipikado sa pagbantala! Kag 16 sa ila ang mga Bible study ko!” Ang isa pa gid ka sister nga si Sandra, nagsiling: “May na-preachigan ako nga babayi sa merkado. Nangin Saksi sia kag nagpauli sia sa ila baryo. Ang ulihi ko nga balita sa iya, may 15 na sia ka Bible study.”

 Ang pila sa mga kauturan nga nagsaylo sa Albania nagtener na didto sing tinuig, kag nalipay gid sila sa ila pag-alagad. Kon kis-a, daw indi sila makapati kon mabalitaan nila nga ang ila gin-preachingan sadto nagbaton sang kamatuoran sang ulihi. (Manugwali 11:6) Si Christopher nga ginsambit kaina, nagsiling: “Nakasugod ako sing Bible study sa isa ka lalaki sang una ako nga nagkadto diri sa Albania. Sang magkitaay kami liwat, nalipay gid ako nga nadumduman pa niya ang amon mga gin-istoryahan sadto parte sa Biblia. Subong, sia kag ang iya asawa bawtismado na nga mga alagad ni Jehova.” Si Federica nga ginsambit man kaina, nagsiling: “Sa isa ka kongregasyon, may sister nga nagpalapit sa akon kag namangkot kon nadumduman ko pa sia. Siling niya, ako kuno ang nag-preaching sa iya siam ka tuig na ang nagligad. Sang magsaylo ako sa iban nga banwa, nagsugod sia sa pag-Bible study kag nabawtismuhan. Abi ko, wala gid sing nagbaton sang kamatuoran sa amon una nga mga tinuig sa Albania. Nagsala gid gali ako!”

 Ang mga kauturan nga nagsaylo sa Albania ukon sa Kosovo nagapasalamat gid nga ginpakamaayo ni Jehova ang ila mga panikasog kag nangin malipayon gid ang ila kabuhi. Pagligad sang madamo nga tinuig nga pagtener niya sa Albania, ginsumaryo ni Eliseo ang iya eksperiensia. Sia nagsiling: “Bilang mga tawo, abi naton may seguridad lang ang aton kabuhi kon ara sa aton ang mga butang nga ginasaligan sang mga tawo sa sini nga kalibutan. Pero indi ina matuod. Kay ang mga prinsipio ni Jehova amo ang makahatag sa aton sing katuyuan kag seguridad. Ang akon pag-alagad diri sa iban nga pungsod nakabulig gid para indi ko ina malipatan. Nabatyagan ko nga may mabulig ako diri kag ginaapresyar ako. Ari man diri ang akon matuod nga mga abyan kag pareho man sa akon ang ila mga goal.” Ugyon man sa sini si Sandra. Sia nagsiling: “Sang magsaylo ako diri, nabatyagan ko nga ginhatagan ako ni Jehova sing kahigayunan nga matuman ang madugay ko na nga ginahandum, ang mangin misyonero. Wala gid ako maghinulsol nga nagsaylo ako diri sa Albania. Malipayon gid ako diri.”