Ang mga Saksi ni Jehova sa Bulgaria masako gid sa pagtudlo sa iban sang kamatuoran parte sa Dios kag sa iya Pulong, ang Biblia. Sugod sang tuig 2000, ginatos ka mga Saksi halin sa iban nga pungsod ang nagsaylo sa Bulgaria para magbulig sa pagbantala. Ano nga mga kabudlayan ang naeksperiensiahan sang mga nagsaylo sa iban nga pungsod? Ang ila bala mga sakripisyo takus sa mga pagpakamaayo nga ila nabaton? Ari ang ginsiling sang pila ka kauturan nga nagsaylo sa Bulgaria.

 “Madugay na namon nga gusto nga mag-alagad sa iban nga pungsod nga nagakinahanglan sang dugang nga manugbantala,” siling ni Darren, nga nagaistar sa England. “Pagkatapos namon ginkasal ni Dawn, nagsaylo kami sa London para magbulig sa pagtudlo sang Biblia sa Russian nga lenguahe. Pila ka beses na namon nga ginplano nga magsaylo sa iban nga pungsod, pero bangod sa sarisari nga rason indi ini pirme madayon. Abi namon indi na gid ini matabo. Pero ginpalig-on kami sang amon abyan, kag ginsilingan niya kami nga nagbag-o na ang amon sitwasyon. Gani puede na namon mahimo ang amon goal.” Nangita dayon si Darren kag si Dawn sang pungsod nga nagakinahanglan sang dugang nga manugbantala kag puede nila sayluhan. Sang 2011, nagsaylo sila sa Bulgaria.

 May iban naman nga sa umpisa wala sing goal nga magsaylo sa iban nga pungsod. Pero sang nakita nila nga malipayon gid ang mga utod nga nagsaylo sa iban nga pungsod, napalig-on sila nga himuon man ini. “May nakilala ako nga mapisan nga mga Saksi nga malipayon gid nga nagaalagad sa South America kag sa Africa,” siling ni Giada, nga nagaistar sadto sa Italy upod sa iya bana nga si Luca. “Nakita ko nga malipayon gid sila kag napalig-on gid ako sa ila mga eksperiensia. Nakabulig ini sa akon nga mamensar man kon ano pa ang akon puede mahimo sa pag-alagad kay Jehova.”

 Sang 2015, si Tomasz kag si Veronika naman nga nagaistar sa Czech Republic, nagsaylo sa Bulgaria upod sa ila duha ka bata nga si Klara kag si Mathias. Ngaa nagsaylo sila? Si Tomasz nagsiling: “Ginpamensaran namon sing maayo ang halimbawa sang pila ka kauturan nga nagsaylo sa iban nga pungsod, kag ang pila sa ila mga paryente namon. Ginpamalandungan man namon ang ila mga eksperiensia. Pirme namon ini ginaistoryahan sa balay, kag gusto man namon nga mabatyagan ang ila nga kalipay.” Ang bilog nga pamilya ni Tomasz malipayon na subong nga nagaalagad sa ila bag-o nga teritoryo sa siudad sang Montana sa Bulgaria.

 Ang isa pa ka Saksi nga nagsaylo sa Bulgaria amo si Linda. Nagsiling sia: “Nagkadto ako sa Ecuador mga pila ka tuig na ang nagligad, kag nakilala ko ang pila ka utod nga nagsaylo didto para magbulig sa pagbantala. Sugod sadto, pirme ko ginapamensar nga basi isa ka adlaw puede man ako mangin pareho sa ila.” Pirme man ginaistoryahan ni Petteri kag ni Nadja, nga mag-asawa sa Finland, ang halimbawa sang iban. Nagsiling sila: “Sa amon kongregasyon sadto, may mga eksperiensiado nga kauturan nga nakaagi saylo sa iban nga lugar para magbulig sa pagtudlo sa mga tawo parte sa Biblia. Pirme nila ginaistorya ang masadya nila nga eksperiensia. Nagsiling sila nga amo ’to ang pinakamalipayon nga tinuig sang ila kabuhi.”

 Ang pag-alagad sa iban nga pungsod nagakinahanglan sang maayo nga pagplano. (Lucas 14:28-30) Si Nele nga taga-Belgium, nagsiling: “Sang gusto ko na gid mag-alagad sa iban nga pungsod, ginpangamuyo ko ini kag nag-research ako sa aton mga publikasyon parte sa pag-alagad sa iban nga pungsod. Gintun-an ko ini sing maayo kay gusto ko gid mabal-an kon ano ang dapat ko himuon para handa na ako magsaylo.”

 Si Kristian kag si Irmina, nga taga-Poland, sobra na siam ka tuig nga nagaistar sa Bulgaria. Antes sila magsaylo sa Bulgaria, naga-attend sila sa isa ka grupo sa Poland nga nagahambal sing Bulgarian kag nakabulig ini sa ila. Ginpalig-on sila sang mga kauturan kag ginbuligan nga makatuon sang Bulgarian. Si Kristian kag si Irmina nagsiling: “Naeksperiensiahan namon nga kon handa ka magpagamit kay Jehova nga Dios, atipanon gid niya ang imo mga kinahanglanon. Kag kanami gid sini nga balatyagon. Kon hambalan mo si Jehova nga ‘Yari ako! Ipadala ako!’ mahimo mo ang mga butang nga abi mo indi mo masarangan.”—Isaias 6:8.

 Si Reto kag si Cornelia, nga mag-asawa nga taga-Switzerland, nagdesisyon nga magkabuhi lang sing simple para makahanda sila kag makasupot sing kuarta. Nagsiling sila: “Isa ka tuig antes kami nagsaylo sa Bulgaria, nagbisita kami anay didto sing isa ka semana para may ideya kami kon ano ang kabuhi didto. Naistorya namon didto ang mag-asawa nga misyonero kag may pila sila ka praktikal nga panugda nga ginhatag sa amon.” Ginsunod gid ni Reto kag ni Cornelia ini nga mga panugda kag subong 20 ka tuig na sila nga nagaalagad sa Bulgaria.

 Madamo sing kabudlayan nga naeksperiensiahan ang mga nagsaylo sa iban nga pungsod. (Binuhatan 16:9, 10; 1 Corinto 9:19-23) Para sa madamo sa ila ang isa sa pinakamabudlay amo ang pagtuon sang bag-o nga lenguahe. Si Luca nga ginsambit kaina, nagsiling: “Nanamian gid kita magkomento sa Cristianong mga miting. Pero sang primero, nabudlayan gid kami nga mag-asawa nga maghanda bisan sang isa lang ka simple nga komento sa Bulgarian. Daw mga bata lang kami liwat. Sa tuod lang, mas nami pa gani ang komento sang mga bata didto, sangsa amon mga komento.”

 Si Ravil nga taga-Germany, nagsiling: “Kakapoy magtuon sang lenguahe. Pero pirme ko ginapamensar, ‘Indi mangutos kon magsala ka, kag kadlawkadlawi lang ini.’ Para sa akon, indi problema ini nga mga kabudlayan, kundi bahin sang akon sagrado nga pag-alagad kay Jehova.”

 Si Linda nga ginsambit kaina nagsiling: “Nabudlayan gid ako magtuon sang bag-o nga lenguahe. Kabudlay gid tun-an sang Bulgarian kag pila ka beses ako nga namensar nga mag-untat. Masubuan ka gid kon indi ka makaistorya sa mga tawo kag indi mo maintiendihan ang ila ginahambal. Gani, para padayon nga magbakod ang akon kaangtanan kay Jehova, Swedish ang akon ginagamit kon naga-personal study ako. Sang ulihi, sa bulig sang akon pinalangga nga mga kauturan, natun-an ko gid man maghambal sing Bulgarian.”

 Mabudlay man kon malayo ka sa imo pamilya kay hidlawon ka gid sa ila. Kag amo sina ang nabatyagan sang mga nagsaylo sa iban nga pungsod kay ginbiyaan nila ang ila mga paryente kag mga abyan. Si Eva nga nagsaylo sa Bulgaria upod sa iya bana nga si Yannis, nagsiling: “Sang primero, nasubuan gid ako kay nahidlaw ako sa akon pamilya. Gani pirme kami nagatawag sa amon mga abyan kag mga pamilya, kag ginatinguhaan man namon nga makakita sang bag-o nga mga abyan diri sa Bulgaria.”

 May iban pa gid nga mga kabudlayan. Si Robert kag si Liana, nga halin sa Switzerland, nagsiling: “Ginbudlayan gid kami sa lenguahe kag sa kultura. Kag wala gid namon gin-expect nga grabe gid katugnaw ang winter diri.” Pero gintinguhaan nila nga mangin positibo lang kag kadlawan bisan ang mabudlay nga mga sitwasyon. Nakabulig ini sa ila nga mag-alagad sing matutom sa Bulgaria sa sulod na sang 14 ka tuig.

 Ginapalig-on gid ni Lilly ang iban nga magbulig sa mga lugar nga nagakinahanglan sang dugang nga manugbantala. Nagsiling sia: “Sang nagsaylo ako sa iban nga pungsod, naeksperiensiahan ko ang pagbulig ni Jehova. Wala ko tani ini naeksperiensiahan kon wala ako nagsaylo. Nangin masako ako sa pagbulig sa iban. Nakabulig ini sa akon nga mangin suod pa gid kay Jehova, mangin malipayon, kag mangin kontento.” Amo man sini ang nabatyagan sang iya bana nga si Ravil. Nagsiling sia: “Amo ini ang pinakamaayo nga kabuhi. May makilala ka nga mapisan nga mga kauturan nga halin sa iban nga pungsod nga madamo sing eksperiensia sa pagtudlo sang kamatuoran sa Biblia. Madamo gid ako sing natun-an sa ila.”

 Bangod madamo ang naghalad sing kinabubut-on sang ila kaugalingon, nabantala ang “maayong balita sang Ginharian . . . sa bug-os nga duta.” (Mateo 24:14) Ang mga nagsaylo sa Bulgaria handa gid nga magbulig sa iban. Gani, naeksperiensiahan nila kon paano ginhatag ni Jehova ang handum sang ila tagipusuon kag ang kadalag-an sang tanan nila nga plano.—Salmo 20:1-4.