Si Artur nga isa ka manugtatap sang sirkito sa Armenia, nagaduaw sadto sa isa ka kongregasyon sang mga Saksi ni Jehova. Nabal-an niya nga wala pa sila naga-public witnessing, gamit ang mga cart nga may mga literatura sang Biblia. Para mapalig-on sila sa sini nga klase sang pagpanaksi, gin-updan ni Artur kag sang iya asawa nga si Anna ang isa pa ka Saksi nga si Jirayr, nga mag-cart sa isa ka gamay nga banwa. Nagpuesto sila sa isa ka lugar nga madamo sing nagalabay.

 Nangin interesado gid ang mga tawo nga nagalabay kag nagkuha sila sing mga literatura. Pero wala magdugay, natalupangdan ini sang mga manugpamatok. May duha ka pari nga nagpalapit sa cart, kag wala namunamo nga gulpi lang ginsipa sang isa ka pari ang cart. Dayon gintampa niya si Artur, amo nga nagtabog gid ang antipara sini. Gintinguhaan gid nga pakalmahon ni Artur, ni Anna, kag ni Jirayr ang mga pari pero akig gihapon ining mga pari. Dayon ginlapaklapak sang mga pari ang cart kag ginpangwasaag ang mga literatura. Ginbuyayaw nila ang mga Saksi, ginpahog sila, dayon naghalin.

 Nagkadto si Artur, si Anna, kag si Jirayr sa presinto para magreklamo. Ginpaathag nila ang natabo kag nagpanaksi man sila sa mga pulis kag mga tawo nga nagaobra sa presinto. Dayon gindala nila ining tatlo ka Saksi sa ila opisyal. Sa umpisa gusto lang niya hibaluon kon ano ang natabo. Pero sang nabal-an niya nga si Artur, nga maskulado nga tawo, wala nagbalos sang gintampa, wala na namangkot ang opisyal sang mga pulis parte sa natabo kundi namangkot na parte sa ginapatihan sang mga Saksi. Nagdugay sing apat ka oras ang ila pag-istoryahanay! Nagdayaw gid ang opisyal sa iya nabatian amo nga nagsiling sia: “Kanami nga relihion ba! Gusto ko mag-entra sa inyo!”

 Pagkasunod nga adlaw, sang nag-public witnessing liwat si Artur, ginpalapitan sia sang isa ka tawo nga nakakita sang natabo sang nagligad nga adlaw. Ginkomendahan sang tawo si Artur sa pagpabilin nga kalmado kag wala gid nagbalos. Nagsiling sia nga bangod sang iya nakita nadula na gid ang iya respeto sa mga pari.

 Sina nga gab-i ginpatawag liwat sang opisyal sang mga pulis si Artur sa presinto. Pero wala nila gin-istoryahan ang kaso kundi madamo sia sing pamangkot parte sa Biblia. Nag-upod sa pag-istoryahanay ang duha pa ka pulis.

 Pagkasunod naman nga adlaw, ginbisitahan liwat ni Artur ang opisyal, para ipatan-aw sa iya ang aton base sa Biblia nga mga video. Gintawag sang opisyal ang iban pa nga pulis para magtan-aw man.

 Bangod sa malain nga ginhimo sang mga pari, madamo nga pulis ang napanaksihan sa una nga higayon. Naghatag ini sing maayo nga reputasyon sa mga Saksi ni Jehova.