“Natawo ako sa pamilya nga nagaalagad kay Jehova,” siling ni Rachel nga nagaistar na subong sa Dominican Republic. “Pero kasubo gid kay sang pito ka tuig ang akon edad, nag-untat sa pagpakig-upod sa mga Saksi ni Jehova ang akon tatay kag mapintas niya nga ginpamatukan ang kamatuoran. Ginpabudlayan gid niya ako sa akon pagsimba kay Jehova. Halimbawa, kon kaisa may ginatanyag sia sa akon pareho sang cell phone, paglagaw sa Disneyland, ukon bisan sang credit card para lang mag-untat ako sa pag-alagad kay Jehova. Kon kaisa ginakastigo pa gani niya ako para indi na ako mag-alagad kay Jehova. Nagsiling pa sia nga kon indi ako makalakat ukon makahambal, indi man ako makakadto sa mga miting. Wala gid ini nakapugong sa akon. Determinado gid ako pirme nga mag-attend sa mga miting.

 “Ginasigurado ni Tatay nga wala si Nanay kon sakiton niya ako. Nagsiling sia nga sakiton niya si Nanay kon manugid ako nga ginasakit niya ako. Lainlain nga rason ang ginahambal niya kon ngaa may mga lagob ako. Nagasiling sia nga resulta ini sang martial arts nga ginapilit niya nga itudlo sa akon.

 “Bata pa gid ako kag nakulbaan ako nga isugid kay nanay ang ginahimo ni Tatay. Gani kay Jehova ako nagapanugid. Nagalakatlakat ako sing malawig sa kakahuyan sa likod sang amon balay sa Maryland, U.S.A. Sa sini nga kakahuyan, may ara sang matahom nga kahoy nga oak kag ginasaka ko ini. Kag sa isa ka sanga sini nga komportable ako, gina-istorya ko si Jehova. Ginapangamuyo ko ang akon nabatyagan kag ang mga gusto ko himuon para sa iya kon magdaku na ’ko, basta buligan niya ako nga malampuwasan ang mga ginahimo ni Tatay sa akon. Ginasugid ko man sa iya ang akon himuon sa bag-ong kalibutan, ang mangin pamilya ko didto, kag ang kalinong kag kalipay nga akon mabatyagan nga wala sing kasakit kag kahadlok.

 “Kon ginatinguhaan ni Tatay nga pauntaton ako sa pag-alagad sa Dios paagi sa mga ginahatag niya ukon pagpanakit sa akon, nabatyagan ko gid pirme ang bulig ni Jehova para paumpawan kag pabakuron ako. Ginbuligan ako ni Jehova nga magpabilin nga mainunungon kag mabakod.

 “Nabawtismuhan ako sang dies anyos ako, kag nagpayunir duha ka tuig sang ulihi. Sa umpisa, wala kabalo si Tatay parte sini. Sang nabal-an niya ini, ginsumbag niya ako kag nagliw-as ang akon sag-ang.

 “Ang iban naglaygay sa akon nga bata pa ako para magpayunir, kag nabalaka sila nga basi wala ko maintiendihan gid kon ano ka serioso ini nga desisyon. Pagligad sang tion, nakita ko nga madamo nga pamatan-on nga Saksi sa amon lugar ang wala nagapokus sa pag-alagad kay Jehova. Pirme sila naga-party kag nagalingawlingaw. Kag daw kasadya man sang ila ginahimo. Kon kaisa daw gusto ko man himuon ang ila ginahimo. Pensar ko, ‘Ano abi kon mauntat ako sa pag-preaching kag maglingawlingaw man pareho sang mga kaedad ko?’ Pero kon amo na ang ginabatyag ko, gina-istorya ko si Jehova parte sini.

 “Sang mga 15 anyos ako, ginkontak ako sang isa ka kilala nga modeling agency. Ang ila mga opisina ara sa Milan, Italy kag gintanyagan nila ako sang daku sing sueldo nga kontrata. Kanami gid batyagon nga may nagsiling nga puede ako mangin model, maggua sa mga magasin, kag magsuksok sang mahal nga mga bayo sa mga fashion show. Halos tatlo ka tuig na ako nga naga-regular payunir, kag siling ko, ‘Makabulig gid ini nga trabaho sa akon sa pinansial kag makapadayon ako sa pagpayunir sa malawig nga tion!’ Ginbiyaan kami ni Tatay, gani nagpensar ako nga makabulig ini nga kuarta sa mga galastuhan ni Nanay.

 “Ginpangamuyo ko ini. Gin-istorya ko si Nanay, nga madamo na nga tuig nga nagapayunir, kag gin-istorya ko man ang isa ka pinalangga kag ginatahod nga gulang. Pareho sang ginahimo ko pirme, nagkadto ako sa akon kahoy kag nagpangamuyo pa gid. Ginsabat ni Jehova ang akon mga pangamuyo paagi sa ginasiling sang teksto sa Biblia nga ginpabasa sa akon sang gulang. Mabasa ini sa Manugwali 5:4, nga nagasiling: ‘Kon magpanaad ka sa Dios, indi pagpadugaya ang pagtuman sini. Kon ano ang ginpanaad mo, tumana ini.’ Nagpromisa ako nga alagaron gid si Jehova, kag nabalaka ako nga ini nga trabaho makaguba sang akon relasyon kay Jehova. Gani nagdesisyon ako nga indi pagbatunon ini nga trabaho.

 “Bisan pa sa mga natabo sa akon sang bata pa ako, nalampuwasan ko ini! Subong, malipayon kami sang akon bana nga si Jaser, kag sang amon bata nga lalaki nga si Connor, nga siam ka tuig ang edad. Isa ka elder si Jaser, kag unbaptized publisher naman si Connor. Halos 27 ka tuig na ako sa bug-os tion nga pag-alagad.

 “Pirme ko gid ginapanumdom ang akon pagpakig-istorya kay Jehova sa kahoy nga oak sa kakahuyan sa likod sang amon balay. Ginpangabay ko si Jehova nga buligan ako, kag ginhimo niya ini sa dalayawon nga paagi. Ginpabakod niya ako, ginpaumpawan, kag gingiyahan. Sa bilog ko nga kabuhi, sulitsulit nga ginpakita ni Jehova sa akon nga isa sia ka dalayawon gid nga amay. Nalipay gid ako nga gin-alagad ko sia sa bug-os ko nga tagipusuon. Amo ini ang pinakamaayo nga desisyon nga ginhimo ko.”