Si Clodean isa sa mga Saksi ni Jehova nga nagaistar sa South Africa. Nagpaospital sia bangod kinahanglan himuon sa iya ang isa ka serioso nga operasyon. Madamo sing komplikasyon ang iya balatian kag kinahanglan niya magdesisyon kon ano nga pagpabulong ang gamiton niya. Antes kag pagkatapos sang operasyon, nakabatyag sia sing pagpalangluya, kasakit, kag stress. Sang nakapauli na sia, indi gihapon sia makasarang magpungko bisan pagligad sang halos pulo ka semana. Indi man sia puede bisitahon bangod sang COVID-19 nga pandemic.

 Indi gusto ni Clodean nga mangin makaluluoy lang sia gani nagpangayo sia sing kusog sa Dios para malugpayan niya ang iban. Gani sang makapungko na sia, ginkontak niya ang manghod nga babayi sang iya kaingod. Ining manghod nagtuon anay sadto sa Biblia upod sa mga Saksi pero nag-untat. Ginsugiran sia ni Clodean sang isa ka makapalig-on nga mensahe sa Pulong sang Dios, amo nga ginpadayon niya ang iya pagtuon. Ginpaathag man ni Clodean ang mga benepisyo sang pagtambong sa Cristianong mga miting kag ginsigurado niya nga makakonek sa videoconference sang ila kongregasyon ang iya estudyante. Nagkonek ang babayi sa miting kag nagkomento pa sa tion sang pamangkot-kag-sabat nga bahin sang programa.

 Gin-istorya man ni Clodean ang manghod nga babayi sang iya estudyante, kag gusto man niya magtuon sa Biblia. Ginsugiran pa gani niya si Clodean parte sa iban nga basi interesado man. Ang resulta? Apat pa ka babayi ang nasugdan ni Clodean sang pagtuon sa Biblia. Pero may mas maayo pa gid nga natabo!

 Bangod sa sinsero nga interes ni Clodean sa iban, nakasugod sia sa pagtuon sa Biblia sa pulo ka babayi, sa tion sang pandemic. Sa kabilugan, 16 tanan ang iya nasugdan sing pagtuon! Ang iban sa ila regular na nga nagatambong sa Cristianong mga miting paagi sa videoconference. Bangod masako si Clodean sa pagbulig sa iban nga makatuon parte kay Jehova, wala sia nagapokus sa iya problema sa panglawas. Nabatyagan man niya nga bangod si Jehova, “ang Dios nga nagahatag sang tanan nga sahi sang lugpay,” naglugpay sa iya sa iya mga pagtilaw, nalugpayan man niya ang iban.—2 Corinto 1:3, 4.

 Ano ang ginabatyag sang mga estudyante ni Clodean parte sa ila natun-an? Ang isa sa ila nagsiling: “Madamo ako sing nabaton nga benepisyo. Pero ang pinakaimportante sa sini amo nga nabal-an ko ang ngalan sang Dios. Nakabulig ini sa akon nga mangin suod kay Jehova.” Ang una nga babayi nga naistorya ni Clodean nagalaum nga magpabawtismo sa indi madugay. Ini nga mga eksperiensia nagpahalipay gid kay Clodean. Kag nag-ayo na sia sa iya operasyon.