Sang 2005, napatay ang bana ni Sowbhagya nga taga-India. Maayo gid ang iya pag-atipan kay Sowbhagya kag sa ila tatlo ka tuig nga bata nga babayi nga si Meghana. Gani sang wala na ang iya bana, nabudlayan si Sowbhagya nga makapangita sang kuarta para mabuhi sila sang iya bata.

 Naglala pa gid ang sitwasyon kay ginabalewala sila sang iban. Si Sowbhagya kag ang iya bata ginatrato sang iya pamilya bilang manugpakilimos, kag sulitsulit nga ginasilingan nga salaguron lang sila. Nangita sia sang paumpaw, gani nag-attend sia sa isa ka simbahan sa ila lugar, pero ginpakanubo sia sang mga tawo didto kay pigado sia. Nangita man sia sang obra para masuportahan niya ang iya kaugalingon kag ang iya bata nga babayi. Pero, bisan ano pa nga paninguha niya, wala gid sia makakita sang obra.

 Si Sowbhagya nagsiling: “Nadulaan ako sang paglaum, gani nagdesisyon ako nga maghikog. Pero, bal-an ko nga kon wala na ’ko, magadamo pa gid ang problema sang akon bata. Gani nagdesisyon ako nga mahikog kami nga duha.” Bangod nagbatyag sia nga wala sing pulos kag wala sang nagapalangga sa iya, nagbiyahe sia para magbakal sang hilo.

 Samtang nagabiyahe pauli sakay sa tren, ginpalapitan si Sowbhagya ni Elizabeth nga isa sa mga Saksi ni Jehova kag gin-istorya sia. Nagsiling si Sowbhagya nga wala sia sang obra, gani nagsiling si Elizabeth nga buligan niya sia nga makakita sang obra. Dayon nagsiling man si Elizabeth nga nagapakadto sia sa isa ka Bible study. Nakibot gid sa sini si Sowbhagya kay bisan pa madamo na nga simbahan ang iya nakadtuan, wala pa gid sia nakabati nga may mga tawo nga nagatuon sa Biblia. Gin-agda sia ni Elizabeth nga magkadto sa ila balay para makatuon sing dugang parte sa pag-Bible study.

 Sang nakaabot sa ila balay si Sowbhagya, nagaplano sia gihapon nga maghikog. Pero, gin-upod si Meghana sang isa nila ka paryente sa iban nga lugar, gani nagdesisyon si Sowbhagya nga hulaton ang iya bata para dayunon ang iya plano.

 Samtang nagahulat sa iya bata, nagbisita sia kay Elizabeth, nga malipayon nga nag-abiabi sa iya. Sang didto sia, ginpakita ni Elizabeth sa iya ang libro nga Ano Gid ang Ginatudlo sang Biblia? Gusto niya tun-an ang kapitulo nga “Diin ang mga Patay?” kay bag-o lang napatay ang iya bana. Gani sina nga adlaw, nagsugot si Sowbhagya nga magpa-Bible study.

 Gin-agda ni Elizabeth si Sowbhagya nga mag-attend sa isa ka kombension nga hiwaton sa sunod nga semana, kag nagsiling si Sowbhagya nga ma-attend sia. Nanamian gid sia sa programa amo nga nagdesisyon sia nga gusto niya mangin isa sa mga Saksi ni Jehova. Kag pagpauli niya halin sa kombension, may nagtanyag sa iya sang obra.

 Padayon nga nagtuon sa Biblia si Sowbhagya. Indi na niya gusto nga tapuson ang iya kabuhi, kay may katuyuan na ini. Nabawtismuhan sia, kag sang ulihi nabawtismuhan man ang iya bata nga si Meghana. Subong, pareho sila nga mga regular payunir, kag si Meghana nagaobra bilang remote volunteer sa isa sa mga translation office sa India.

 Nagapasalamat gid si Sowbhagya kag si Meghana nga ginpalapitan ni Elizabeth si Sowbhagya sa tren, ginpakitaan sang sinsero nga interes, kag ginsugiran sang kamatuoran! Daku man ang ila pagpasalamat kay Jehova. Si Meghana nagsiling: “Patay na kami kuntani subong kon wala namon natun-an ang kamatuoran sadto nga adlaw. Malipayon gid kami subong. Excited gid kami ni Nanay nga maabot ang tion nga mahakos namon liwat si Tatay, matudluan sia parte kay Jehova, kag masugiran kon paano ginluwas ni Jehova ang amon kabuhi.”