Sang nagligad nga mga tinuig, nakaeksperiensia ang Venezuela sang grabe nga krisis sa ekonomiya kag mga kinagamo. Ang isa ka Saksi nga si Edgar nagsiling, “Sa sulod lang sang pila ka tuig, kadasig sang pagnubo sang balor sang kuarta kag nagdiutay na lang ang pagkabutang sang mga tawo. Gani pamatyag namon daw nagsaylo kami sa iban nga pungsod bisan pa wala kami naghalin diri sa Venezuela!”

 Ano ang nakabulig kay Edgar nga maka-adjust sa sitwasyon? Nagsiling sia: “Ginpamensar namon sang akon asawa nga si Carmen ang halimbawa sang mga misyonero nga nagsaylo sa iban nga pungsod nga pigado katama. Bisan kulang ang suplay sang ila mga kinahanglanon, natun-an nila nga mabuhi sing simple lang. Bangod sini gintinguhaan man namon nga pasimplehon ang amon kabuhi kag testingan ang bag-o nga mga butang, pareho sang pagtanom sang mga ulutanon.”

 Pero may ginhimo pa gid si Edgar kag si Carmen. Gintinguhaan nila nga paumpawan ang pareho nila nga mga Saksi lakip na ang mga gina-depress. (1 Tesalonica 5:11) Si Edgar nagsiling, “Ginapaumpawan namon sila kag ginapalig-on nga buligan man ang iban nga nagakinahanglan kay mangin malipayon sila kon himuon nila ini.”—Binuhatan 20:35.

 Sang nagsugod ang COVID-19 nga pandemic, nagdesisyon si Argenis nga bantalaan ang iya mga paryente. Ang pila sa ila nagpasugot nga magpa-Bible study paagi sa telepono.

 Gusto man ni Argenis nga makabenepisyo ang iya mga paryente sa 2020 nga rehiyonal nga kombension bisan wala sila sing Internet. Ginhatagan sila sang isa ka Saksi halin sa malapit nga banwa sang rekording sang programa. Dayon nanghulam ang paryente ni Argenis sang daku nga TV kag mga speaker. Gintawgan sila ni Argenis antes magsugod ang programa para mangamuyo. Bangod sang pagpaninguha ni Argenis, 4 sa iya mga paryente kag 15 nga iban pa ang naka-attend.

 Ang mag-asawa nga si Jairo kag si Johana amo lang ang may salakyan sa ila kongregasyon, gani ginagamit nila ini para buligan ang iban. Ang isa ka kabudlayan amo nga kulang ang suplay sang gasolina sa Venezuela. Si Jairo nagsiling, “Madamo nga oras ang ginahinguyang namon sa paghulat para makapatughong, kon kaisa gani nagapila kami bilog nga gab-i.”

 Para kay Jairo, ang ila pagpaninguha para buligan ang iban may maayo gid nga epekto. Nagsiling sia: “Kon nagadala kami sang suplay sa mga kauturan, nalipay gid kami nga makita ang ila pagpasalamat, indi sa amon, kundi kay Jehova, nga nagahatag sang tanan nga kinahanglanon sang iya katawhan.”—2 Corinto 9:11, 14.

 Si Norianni nga isa ka sister nga malapit na mag-30 anyos nagbatyag nga basi para sa iban lamharon pa sia kaayo para magbulig. Pero nabasahan niya ang 1 Timoteo 4:12: “Indi pagtuguti nga may magpakanubo sang imo pagkapamatan-on. Sa baylo, mangin halimbawa ka sa mga matutom.”

 Ina nga teksto nagpahulag gid kay Norianni nga maghatag sing daku nga tion sa mga tigulang sa ila nga kongregasyon. Ginabuligan niya sila sa letter writing nga pagministeryo kag ginahagad niya sila nga updan sia sa iya mga Bible study. Ginatawgan man niya sila sa telepono kag ginapadal-an sang makapalig-on nga mga text. Si Norianni nagsiling, “Ginpakita ni Jehova sa akon nga madamo ako sang mahimo para makabulig.”

 Ang aton mga kauturan sa Venezuela nagaatubang sang madamo nga mga kabudlayan sa sining mabudlay nga mga tion. Pero, matutom sila gihapon sa ila pagministeryo kag “nagahatag sing daku nga lugpay” sa isa kag isa.—Colosas 4:11; 2 Timoteo 4:2.