Si Yanmei, nga isa ka Saksi sa Asia, nagbulig sa isa ka bulag nga babayi nga si Mingjie para magtabok sa dalan. a Si Mingjie nagsiling: “Salamat gid. God bless!” Dayon, ginpamangkot ni Yanmei si Mingjie kon gusto niya nga magkit-anay sila liwat para istoryahan ang parte sa Biblia. Sang ulihi nagsiling si Mingjie nga kada adlaw gid sia nagapangamuyo nga kuntani matultulan niya ang matuod nga kongregasyon sang Dios. Ngaa amo gid sina ang iya ginapangamuyo?

 Gin-istorya ni Mingjie nga sang 2008 gin-imbitar sia sang iya amiga nga bulag man nga magtambong sa isa ka simbahan nga para sa mga may kasablagan. Pagkatapos sang sermon, ginpamangkot ni Mingjie ang pari kon ano nga libro ang iya ginagamit sa pagtudlo. Nagsabat sia nga Biblia ang iya ginagamit, nga amo ang matuod nga Pulong sang Dios. Gusto gid ni Mingjie nga mabasa man ini. Gani nangita sia sing paagi nga makakuha sang Chinese nga Biblia sa braille kag ginbasa niya ang 32 ka volume sini sa sulod sang mga anom ka bulan. Samtang padayon nga ginabasa ni Mingjie ang Biblia, natun-an niya nga ang doktrina sang Trinidad nga ginatudlo sang simbahan nga iya gintambungan indi insakto, kag natun-an man niya nga ang Dios may ngalan, si Jehova.

 Amat-amat man nga nabatyagan ni Mingjie nga kalaw-ay sang batasan sang mga upod niya sa simbahan. Narealisar niya nga wala nila ginasunod kon ano ang ginasiling sang Biblia. Halimbawa, una nga ginahatagan sang pagkaon sa simbahan ang mga wala sing diperensia kag mga salin na lang ang ginahatag sa mga bulag. Naglain gid ang iya buot sa sini, gani nangita sia sang iban nga mga simbahan sa ila lugar. Amo ini ang rason kon ngaa ginapangamuyo gid ni Mingjie nga makita ang matuod nga Cristianong kongregasyon.

 Nagsugot si Mingjie nga magtuon sa Biblia bangod sang kaayo nga ginpakita ni Yanmei. Sang ulihi, nagtambong si Mingjie sa miting sang mga Saksi ni Jehova. Si Mingjie nagsiling: “Indi ko gid malipatan ang akon una nga pagtambong sa miting. Ginbugno gid ako sang mga kauturan. Nanamian gid ako sa ila. Bisan pa bulag ako, nabatyagan ko gid nga wala sila sing pinilian.”

 Nag-uswag si Mingjie sa pagtuon kag regular na sia nga nagatambong sa mga miting. Nanamian gid sia magkanta sang mga Kingdom song, pero indi ini mahapos sa iya kay wala sang braille nga songbook. Gani ginbuligan sia sang mga kauturan sa kongregasyon nga maghimo sang iya kaugalingon nga songbook. Natapos niya nga i-transcribe ang 151 ka mga kanta sa sulod sang 22 ka oras! Sang Abril 2018, nag-upod na si Mingjie sa pagbantala, kag sugod sadto, nagahinguyang sia sang mga 30 ka oras kada bulan sa pagbantala.

 Para mabuligan si Mingjie nga mapreparahan ang iya bawtismo, ginrekord ni Yanmei ang mga pamangkot kag mga bersikulo sa Biblia halin sa libro nga Organisado sa Paghimo sang Kabubut-on ni Jehova. Ginbawtismuhan si Mingjie sang Hulyo 2018. Nagsiling sia: “Nagustuhan ko gid ang gugma nga ginpakita sang mga kauturan sa kombension. Naghibi ako kay nangin bahin gid man ako sang matuod nga kongregasyon sang Dios.” (Juan 13:34, 35) Determinado si Mingjie nga ipakita man sa iban ang pareho nga gugma nga ginpakita sa iya, gani subong, nagaalagad sia bilang isa ka bug-os tion nga manugbantala.