Ginagamit namon ang mga donasyon para suportahan ang mga hilikuton sang amon organisasyon sa pagsimba kag sa pagbulig sa mga tawo. Ginahimo namon ini nga mga hilikuton bilang bahin sang amon panguna nga tulumuron, nga amo ang pagbulig sa mga tawo nga mangin disipulo ni Cristo Jesus.—Mateo 28:19, 20.

 Wala gid namon ginagamit ang mga donasyon para magmanggaranon ang isa sa amon. Wala sing sueldo ang amon mga gulang ukon mga ministro, kag wala man ginabayaran ang mga Saksi ni Jehova sa ila pagpamalaybalay. Wala man sing sueldo ang mga miembro sang amon religious order, lakip na ang mga nagaalagad sa amon mga branch office, world headquarters, kag mga miembro sang Nagadumala nga Hubon.

•   Publishing: Naga-translate kami, naga-imprinta, nagapadala, kag nagapanagtag sang minilyon ka Biblia kag iban pa nga Cristianong publikasyon kada tuig, kag tanan ini wala sing bayad. Kag ang amon elektroniko nga mga publikasyon nga ara sa amon jw.org nga website kag JW Library app wala man sing bayad ukon mga advertisement.

•   Pagpanukod kag Pagmentinar: Sa bilog nga kalibutan, nagatukod kami kag nagamentinar sang simple nga mga tilipunan sa pagsimba para gamiton sang amon mga kongregasyon sa pagtipon kag pagdayaw sa Dios. Nagatukod man kami kag nagamentinar sang mga branch office kag mga translation office. Ang kalabanan nga trabaho ginahimo sang mga boluntaryo, gani makakinot kami.

•   Pagdumala kag Pagtatap: Ang mga hilikuton sa amon world headquarters, mga branch office, kag mga translation office, subong man ang mga nagaalagad bilang nagalakabay nga ministro, ginasuportahan sang mga donasyon para sa amon bug-os kalibutan nga hilikuton.

•   Pagbantala: Ang mga Saksi wala ginabayaran sa ila pagbantala sang maayong balita ukon pagtudlo sa iban sang “pulong sang Dios.” (2 Corinto 2:17) Pero, pareho sa mga hilikuton sang mga Cristiano sang unang siglo, ang mga ginpili kag ginhanas nga mga ministro nga nagagamit sang ila daku nga tion sa pagbantala nga hilikuton ginaamanan sang simple nga puluy-an kag sang ila panguna nga mga kinahanglanon.—Filipos 4:16, 17; 1 Timoteo 5:17, 18

•   Pagpanudlo: Ang amon mga asembleya kag mga kombension ginasuportahan sang mga donasyon. Dugang pa, nagahimo man kami sang base sa Biblia nga mga audio kag video nga mga programa. May mga eskwelahan man kami nga nagahanas sang mga gulang kag mga ministro nga nagagamit sang ila daku nga tion sa pagbantala para mangin mas mangin epektibo sila sa ila mga asaynment.

•   Pagbulig sa Tion sang Kalamidad: Ginahatagan namon sing pagkaon kag tubig ang mga biktima sang kalamidad, kag ginapahimuan sila sing puluy-an. Ginabuligan namon indi lang ang ‘amon mga masigkatumuluo’ kundi pati na ang mga indi Saksi.—Galacia 6:10.