Ginapilit Bala sang mga Saksi ni Jehova nga Mangin Saksi Man ang Ila Kabataan?

I-PLAY

Wala, kay personal nga desisyon ang pag-alagad sa Dios. (Roma 14:12) Ginatudluan sang mga Saksi ni Jehova ang ila kabataan sang mga prinsipio sa Biblia. Pero kon magdaku na sila, sila ang magadesisyon kon mangin Saksi ni Jehova man sila ukon indi.—Roma 12:2; Galacia 6:5.

Pareho sang madamo nga ginikanan, gusto man sang mga Saksi ni Jehova ang pinakamaayo para sa ila kabataan. Ginatudluan nila ang ila kabataan sang makapaayo sa ila pareho sang pag-obra, mga prinsipio sa moral, kag mga ginapatihan parte sa Dios. Nagapati ang mga Saksi ni Jehova nga ang Biblia nagatudlo sang pinakamaayo nga paagi sang pagkabuhi, kag luyag nila ini ipatudok sa ila kabataan. Gani, ginatun-an nila ang ila kabataan sa Biblia kag ginaupod sila sa mga miting sa Kingdom Hall. (Deuteronomio 6:6, 7) Kon maghamtong na ang bata, sia mismo ang magadesisyon kon mangin Saksi ni Jehova sia pareho sa iya mga ginikanan.

Ginabawtismuhan bala sang mga Saksi ni Jehova ang mga lapsag?

Wala. Ang Biblia wala nagatudlo nga bawtismuhan ang lapsag. Halimbawa, antes bawtismuhan ang mga Cristiano sadto, nabatian nila anay ang mensahe, ‘ginbaton’ ini, kag naghinulsol. (Binuhatan 2:14, 22, 38, 41) Buot silingon para mabawtismuhan, dapat may ikasarang na ang isa nga hangpon, patihan, kag ikabuhi ang ginatudlo sang Biblia. Indi gid ini mahimo sang isa ka lapsag.

Samtang nagadaku ang kabataan, mahimo nga magdesisyon sila sa ulihi nga magpabawtismo. Pero, dapat anay nila mahangpan ang desisyon nga ila pagahimuon.

Ginasikway bala sang mga Saksi ni Jehova ang ila kabataan kon indi sila magpabawtismo?

Wala. Bisan masubo sa mga ginikanan nga wala sila gin-ilog sang ila bata, palangga gihapon nila sia kag wala sia ginasikway tungod lang nga indi niya luyag nga mangin Saksi.

Ang kada isa, bisan ano ang edad, dapat magdesisyon kon mapabawtismo sia ukon indi

Ngaa ginaupod sang mga Saksi ni Jehova ang ila kabataan kon nagabantala sila?

Ginaupod namon ang amon kabataan kon nagabantala bangod sang masunod nga mga rason. *

Ginasugo sang Biblia ang mga ginikanan nga tudluan ang ila kabataan parte sa Dios kag hanason sila nga alagaron sia. (Efeso 6:4) Bangod nalakip sa pag-alagad sa Dios ang pagbantala, isa ini ka importante nga bahin sang pagtudlo sa bata parte sa Dios.—Roma 10:9, 10; Hebreo 13:15.
Ginapalig-on man sang Biblia ang mga kabataan nga “magdayaw sila tanan sa GINOO.” (Salmo 148:12, 13, Ang Pulong sang Dios) Isa ka importante nga paagi para madayaw ang Dios amo ang pagsugid sa iban parte sa iya. *
May praktikal nga benepisyo ang kabataan kon nagaupod sila sa ila ginikanan sa pagbantala. Halimbawa, makatuon sila nga mag-istorya sa tanan nga klase sang tawo. Matun-an man nila nga magpakita sing kaluoy, kaayo, pagtahod, kag pag-una sa iban. Makabulig man ini sa ila nga mahangpan nga ang ila ginapatihan halin gid sa Biblia.

Nagaselebrar bala ang mga Saksi ni Jehova sing mga holiday ukon iban pa nga selebrasyon?

Wala nagapakigbahin ang mga Saksi ni Jehova sa relihioso nga mga selebrasyon nga wala nagapahamuot sa Dios. * (2 Corinto 6:14-17; Efeso 5:10) Halimbawa, wala kami nagapakigbahin sa mga birthday ukon nagaselebrar sing Krismas, bangod wala man ini ginselebrar sang mga Cristiano sang una.

Pero, nalipay kami makig-upod sa amon pamilya kag magregalo sa amon kabataan. Gani, nagatipontipon ang amon pamilya kag nagaregalo bisan wala sing okasyon.

Nalipay magregalo ang Cristiano nga mga ginikanan sa ila kabataan

Ano ang ginabatyag sang mga nagdaku sa Saksi ni Jehova nga pamilya?

“Ang pagbantala nagtudlo sa akon nga tahuron ang iban, bisan lain ang ila pagpati ukon pagtratar sa akon. Kag kon nagabantala kami, masami nga nagaistorya ang mga tawo sang ila mga kabalaka kag problema. Gani imbes nga magpokus sa kaugalingon, natun-an ko nga hunahunaon man ang ginabatyag sang iban kag ang ila mga kinahanglanon.”—Tara. *
“Wala gid ako ginpilit sang akon mga ginikanan nga mangin Saksi. Pirme gid nila ako ginahambalan nga ako ang madesisyon. Kada mamangkot ako kay Mama parte sa pagpati sang mga Saksi, ginasabat niya ako: ‘Na-research mo na ina?’ Gani, naga-research ako kag kumbinsido nga amo ini ang akon relihion, indi kay relihion ini sang akon ginikanan.”—Ellie.
“Bisan wala ako nagaselebrar sang mga holiday, wala gid ako nasubuan. Masako ako kon weekend upod sa iban nga Saksi. Nagakaon kami, nagasaot, kag nagahampang. Pirme ako ginasilingan sang akon mga klasmeyt nga mas busy pa ako sangsa ila.”—Melissa.
“Bisan naintiendihan ko nga wala kita nagaselebrar sang Krismas, kon kaisa nasubuan ako. Nakabulig gid sa akon nga pirme ginaimbitar sang akon ginikanan sa amon balay ang akon mga abyan kag mga paryente. Nadumduman ko man nga nakabaton ako regalo sa ila.”—Miguel.

^ par. 6 Wala namon ginapaupod ang kabataan sa pagbantala kon wala ang ila Saksi nga ginikanan ukon kon wala sila sing upod nga adulto nga Saksi.

^ par. 8 Ginsambit sang Biblia ang pila ka kabataan nga ginkahamut-an sang Dios bangod ginsugid nila sa iban ang ila ginapatihan.—2 Hari 5:1-3; Mateo 21:15, 16; Lucas 2:42, 46, 47.

^ par. 10 Tan-awa ang artikulo nga “Ngaa ang mga Saksi ni Jehova Wala Nagasaulog sang Pila ka Selebrasyon?”

^ par. 23 Gin-islan ang pila ka ngalan.