Paano Ginahiwat ang Kasal sang mga Saksi ni Jehova?
Sa masami, ang mga kasal sang mga Saksi ni Jehova simple kag may malip-ot nga pamulongpulong base sa Biblia. Kon kaisa sa tapos sang seremonya may tinipon ukon sinalusalo. a Pareho sina ang sinalusalo nga gintambungan ni Jesus sang yara sia sa siudad sang Cana sa pamuno sang iya ministeryo.—Juan 2:1-11.
Paano ginahiwat ang seremonya sa kasal sang mga Saksi ni Jehova?
Ang pamulongpulong sa kasal amo ang panguna nga bahin sang seremonya. Mga 30 minutos ang kalawigon sini kag ang nagapamulongpulong isa ka ministro sang mga Saksi ni Jehova. Makapalig-on ini nga pagbinagbinag kon paano makabulig ang Biblia sa ginakasal para mangin padayon, mahigugmaon, kag malipayon ang ila pag-asawahay.—Efeso 5:33.
Sa madamo nga pungsod, ang mga ministro sang mga Saksi ni Jehova ginahatagan sing awtoridad para himuon nga legal ang kasal. Sa sina nga sitwasyon, sa katapusan nga bahin sang pamulongpulong, ang ginakasal nagasumpaanay. Posible man nga ginasuksok nila sa isa kag isa ang mga singsing. Dayon ipahibalo sang ministro nga sila mag-asawa na.
Sa iban nga pungsod, ginapatuman sang kasuguan nga isa ka opisyal sang gobierno ang dapat maghimo nga legal sang kasal. Dapat himuon ini sang nagapakasal indi madugay antes sang pamulongpulong sa kasal. Kon ang nobyo kag nobya wala makasumpaanay sa atubang sang opisyal sang gobierno, mahimo nila ini sa tion nga manugtapos na ang pamulongpulong sa kasal. Kon nakasumpaanay na sila, mahimo nga magdesisyon sila nga suliton ini. Kon amo ina ang ila desisyon dapat gamiton nila ang mga tinaga nga nagapahangop nga nahimo na nila ini. Sa tapos sang pamulongpulong may pangamuyo nga nagapangabay nga pakamaayuhon sang Dios ang bag-o nga mag-asawa.
Diin sila ginakasal?
Madamo sang Saksi nga nagapili nga sa Kingdom Hall hiwaton ang seremonya sang ila kasal kon posible. b Kon may sinalusalo sa tapos sini, ginahiwat nila ini sa iban nga lokasyon.
Sin-o ang makatambong?
Kon ang kasal ginahiwat sa Kingdom Hall, kinaandan na nga makatambong ang bisan sin-o, Saksi man sila ukon indi. Pero, kon may sinalusalo sa tapos sini, ang mag-asawa ang nagapili sang agdahon sa sinalusalo.
May pagsulundan bala sila sa pamayo?
Bisan wala sing espesipiko nga pagsulundan sa pamayo ang mga kasal sa Kingdom Hall, ginasunod sang mga Saksi ni Jehova ang direksion sang Biblia nga magpakita sing kaugdang kag pagtahod sa ila pamayo. Ginaapresyar gid nila kon amo man sina ang himuon sang iban. (1 Timoteo 2:9) Siempre pa, naaplikar man ina nga prinsipio kon may ginhanda ang mag-asawa nga sinalusalo.
Nagaregalo bala ang ila mga bisita?
Ang Biblia nagasiling nga dapat kita mangin maalwan. (Salmo 37:21) Nalipay maghatag ang mga Saksi ni Jehova kag magbaton sang mga regalo sa kasal. (Lucas 6:38) Pero, wala nagapangayo sing regalo ang mga Saksi ukon ginawaragwag nila sa publiko ang ngalan sang nagregalo. (Mateo 6:3, 4; 2 Corinto 9:7; 1 Pedro 3:8) Magluwas nga indi ini suno sa Biblia, posible nga masaw-ahan ukon mahuy-an pa gani ang mga bisita.
Naga-toast bala sila sa sinalusalo?
Wala. Wala naga-toast ang mga Saksi ni Jehova, bangod kustombre ini sang butig nga relihion. c Ginapabutyag sang mga Saksi ang ila luyag nga mangin malipayon ang mag-asawa sa iban nga paagi.
May ginasabwag bala sila nga bugas ukon iban pa?
Wala. Sa pila ka lugar, may ginasabwag ang mga tawo nga bugas ukon iban pa sa bag-ong kasal. Nagapati sila nga magahatag ini sa mag-asawa sing suerte, kalipay, kag malawig nga kabuhi. Pero ginalikawan sang mga Saksi ni Jehova ang tanan nga disparatis lakip ang suerte nga indi gid suno sa prinsipio sang Biblia.—Isaias 65:11.
Nagahanda bala sila sing pagkaon kag ilimnon?
Wala sing ginahanda nga pagkaon ukon ilimnon sa seremonya sang kasal sa Kingdom Hall. Pero, may pila ka mag-asawa nga nagahanda sang sinalusalo ukon merienda sa tapos sang seremonya. (Manugwali 9:7) Kon magdesisyon sila nga may alkoholiko nga ilimnon, ginasiguro nila nga haganhagan lang ini kag legal ang edad sang magainom sini.—Lucas 21:34; Roma 13:1, 13.
May kinanta bala ukon sinaot?
Kon may ginhanda nga sinalusalo ang mag-asawa, mahimo sila magdesisyon nga may kinanta kag sinaot. (Manugwali 3:4) Nadepende sa naluyagan kag kultura sang isa ang pagpili nila sang mga kanta, pero dapat maayo gid ang ila pagpili. Sa masami, ang seremonya sang kasal sa Kingdom Hall may mga kanta nga ang tema nabase sa Biblia.
Nagaselebrar bala sila sang anibersaryo sa kasal?
Bangod wala sing ginasiling ang Biblia parte sa pagselebrar sang anibersaryo sa kasal, ang mag-asawa nga Saksi ang magadesisyon kon bala selebrahon nila ang ila anibersaryo ukon indi. Kon selebrahon nila ini, mahimo nga duha lang sila ukon kaupod sa ila mga abyan kag pamilya.
a Depende sa lugar ang mga kustombre, paghiwat, kag legal nga mga kinahanglanon.
b Wala nagapanukot ang ministro nga nagapamulongpulong sa seremonya sang kasal, kag wala man sing bayad ang paggamit sang Kingdom Hall.
c Para sa pagbinagbinag sang pagano nga ginhalinan sang pag-toast, tan-awa ang “Mga Pamangkot sang mga Bumalasa” sa Pebrero 15, 2007, nga gua sang Ang Lalantawan.
Basi Manamian Ka Man
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Pag-asawahay?
Ang mga prinsipio sa Biblia makabulig sa mag-asawa nga malikawan ang pila ka problema. Makabulig man ini sa ila nga masolbar ang indi malikawan nga mga problema sa ila pag-asawahay.
SABAT SA MGA PAMANGKOT SA BIBLIA
Ano ang Ginasiling sang Biblia Parte sa Makahulubog nga Ilimnon? Sala Bala ang Pag-inom Sini?
Ginasambit sa Biblia ang maayo nga epekto sang alak kag iban pa nga makahulubog nga ilimnon.
MGA PIRME GINAPAMANGKOT
May mga Pagsulundan Bala ang mga Saksi ni Jehova Parte sa Pagdeyt?
Ang pagdeyt bala lingawlingaw lang ukon serioso nga butang?
PARTE SA AMON
Mag-attend sa Miting
Hibalua ang ginahimo sa amon mga miting. Mangita sing lokasyon sang miting nga malapit sa imo.