Nagapati ang mga Saksi ni Jehova nga ang mga prinsipio kag mga sugo sa Biblia makabulig sa aton nga maghimo sing mga desisyon nga makapalipay sa Dios kag makapaayo sa aton. (Isaias 48:17, 18) Indi kami ang naghimo sini nga mga prinsipio kag mga sugo, pero ginaaplikar namon ini. Binagbinaga kon paano naangot ang pila sini sa pagdeyt. a

•   Ang pag-asawahay isa ka permanente nga pag-updanay. (Mateo 19:6) Ginakabig sang mga Saksi ni Jehova ang pagdeyt nga isa ka tikang sa pag-asawahay, gani para sa amon serioso ini nga butang.

•   Ang pagdeyt para lang sa mga ara na sa husto nga edad nga mangasawa ukon mamana. “Indi na [sila] tuman kabata,” ukon naglampas na sa edad nga ang seksuwal nga handum mabaskog gid.​—1 Corinto 7:​36.

•   Ang mga nagadeyt dapat hilway nga mangasawa ukon mamana. Ang iban nga legal nga nagdiborsio indi hilway nga mangasawa ukon mamana sa pagtamod sang Dios, kay suno sa iya talaksan, ang lamang nga basihan sang pagdiborsio amo ang seksuwal nga imoralidad.​—Mateo 19:9.

•   Ginasugo ang mga Cristiano nga gusto mangasawa ukon mamana nga pilion lang ang pareho nila sing pagtuluuhan. (1 Corinto 7:​39) Para sa mga Saksi ni Jehova, ini nga sugo wala nagapatuhoy sa isa ka tawo nga nagarespeto lang sang amon mga pagtuluuhan kundi sa isa nga nagapati kag nagatuman sini bilang bawtismado nga Saksi. (2 Corinto 6:​14) Pirme ginatudluan sang Dios ang iya mga sumilimba nga mangasawa ukon mamana lamang sang may pareho nila sing pagtuluuhan. (Genesis 24:3; Malaquias 2:​11) Mapuslanon man ini nga sugo, subong sang napamatud-an sang mga research. b

•   Dapat tumanon sang mga kabataan ang ila mga ginikanan. (Hulubaton 1:8; Colosas 3:​20) Ang mga kabataan nga ara pa sa poder sang ila mga ginikanan dapat magtuman sa desisyon sang ila mga ginikanan parte sa pagdeyt. Mahimo malakip sa sini ang edad kon san-o puede makigdeyt ang ila bata kag kon ano ang puede kag indi puede nila himuon.

•   Personal nga makapili ang mga Saksi kon san-o sila makigdeyt kag kon kay sin-o, base sa mga ginapatuman sang Kasulatan. Nahisanto ini sa prinsipio nga, “Ang kada isa magadala sang iya kaugalingon nga lulan sang responsibilidad.” (Galacia 6:5, footnote) Pero kon parte sa pagdeyt, madamo ang maalamon nga nagapangayo sing laygay sa hamtong nga mga Saksi nga gusto gid makabulig sa ila.​—Hulubaton 1:5.

•   Madamo sa kinaandan nga ginahimo sang mga nagadeyt ang serioso nga sala. Halimbawa, nagasugo ang Biblia nga likawan ang seksuwal nga imoralidad. Wala lang ini nagapatuhoy sa pagpakig-sex kundi sa iban pa nga mahigko nga buhat nga ginahimo sang indi mag-asawa, pareho sang paghimas sang kinatawo sang isa ukon paghimo sing oral ukon anal sex. (1 Corinto 6:​9-​11) Bisan ang mga buhat sang mga wala pa makasal nga nagapasilabo sang balatyagon kag wala pa naglab-ot sa seksuwal nga imoralidad, “kahigkuan” gihapon kag makapaakig sa Dios. (Galacia 5:​19-​21) Ang mga pag-istoryahanay parte sa imoral nga mga butang nga nagalakip sang “paghambal sing binastos” ginapakamalaut man sang Biblia.​—Colosas 3:8.

•   Ang tagipusuon, ukon ang nasulod nga pagkatawo, madaya. (Jeremias 17:9) Puede sini pahulagon ang isa nga maghimo sing butang nga nahibaluan niya nga sala. Para ang mga nagadeyt indi madaya sang ila tagipusuon, dapat nila likawan nga magsilahanon lang sa mga sitwasyon nga mahimo sila matentar. Mahimo sila mag-upod sa grupo ukon mag-upod sang hamtong nga tsaperon. (Hulubaton 28:26) Ang indi minyo nga mga Cristiano nga nagapangita sing palangasaw-on ukon pamanahon nakahibalo nga delikado ang pagpakigdeyt paagi sa internet, ilabi na ang pagpakigsuod sa tawo nga indi pa gid nila kilala.​—Salmo 26:4.