Kon parte sa lubong, ginabase namon sa Biblia ang amon mga ginapatihan kag ginahimo. Nalakip sa sini ang mga masunod:

•   Natural lang nga masubuan kita kon mapatay ang aton pinalangga. Nasubuan ang mga disipulo ni Jesus sang napatay ang ila mga pinalangga. (Juan 11:33-​35, 38; Binuhatan 8:2; 9:​39) Gani, wala namon ginakabig ang lubong nga tion para magkinasadya. (Manugwali 3:​1, 4; 7:​1-4) Kundi, tion ini para buylugan ang mga namatyan sa ila kasubo.​—Roma 12:15.

•   Ang mga patay wala sing hinalung-ong. Bisan ano man ang amon kultura, ginalikawan namon ang wala nabase sa Biblia nga mga kustombre kag mga pagpati nga ang mga patay may hinalung-ong kag makaimpluwensia sila sa mga buhi. (Manugwali 9:​5, 6, 10) Nalakip sa sini ang pagpulaw asta mag-aga para bantayan ang patay, magasto nga lubong kag selebrasyon sang anibersaryo sang patay, paghalad, pag-istorya kag pagpangabay sang bulig sa patay, kag ritwal sa pagkabalo. Ginalikawan namon ini tanan nga kustombre kag pagpati kay ginatuman namon ang sugo sang Biblia: “Magbulag kamo, . . . kag untati ninyo ang pagtandog sa indi matinlo nga butang.”​—2 Corinto 6:​17.

•   May paglaum ang mga patay. Ginatudlo sang Biblia nga may pagkabanhaw kag magaabot ang tion nga madula na ang kamatayon. (Binuhatan 24:15; Bugna 21:4) Ini nga paglaum nakabulig sa mga Cristiano sang una nga indi magkasubo sing sobra kon may mapatay kag amo man sa amon subong.​—1 Tesalonica 4:​13.

•   Ang Biblia nagalaygay nga mangin maugdang ukon indi magpadayawdayaw. (Hulubaton 11:2) Nagapati kami nga ang lubong indi tion para sa “pagpadayawdayaw” sang estado sa pangabuhi sang isa. (1 Juan 2:​16) Wala kami nagahiwat sang magasto nga lubong nga may malahalon gid nga mga lungon kag magarbo nga bayo para lang magpakitakita sa mga bisita.

•   Wala namon ginapilit sa iban ang amon mga pagpati parte sa lubong. Ginasunod namon ini nga prinsipio: “Ang kada isa sa aton manabat sa Dios.” (Roma 14:12) Pero kon may kahigayunan, ginapaathag namon “nga may kalulo kag tudok nga pagtahod” ang amon mga pagpati.​—1 Pedro 3:​15.

 Diin ini ginahiwat? Kon magdesisyon ang pamilya nga may diskurso sa lubong, puede ini hiwaton sa lugar nga gusto nila pareho sang Kingdom Hall, punerarya, crematory, sa balay, ukon sa patyo mismo.

 Ano ang ginahimo? May ginahatag nga diskurso para paumpawan ang pamilya kag mga abyan sang napatay. Ginapaathag sang nagahambal ang ginasiling sang Biblia parte sa kamatayon kag paglaum nga pagkabanhaw. (Juan 11:25; Roma 5:​12; 2 Pedro 3:​13) Puede man masambit sa diskurso ang maayo nga mga kinaiya kag hinimuan sang napatay kag masaysay ang iya katutom nga makapalig-on sa iban.—2 Samuel 1:​17-​27.

 Puede man kantahon ang isa ka ambahanon nga nabase sa Kasulatan. (Colosas 3:​16) Sa katapusan sang programa may pangamuyo.​—Filipos 4:​6, 7.

 May balayran bala ukon pagpangolekta? Wala kami nagapabayad sa amon mga miembro sa bisan ano nga relihioso nga serbisyo pareho sang diskurso sa lubong, kag wala man sang pagpangolekta sa amon mga miting.​—Mateo 10:8.

 Sin-o ang puede magtambong? Puede makatambong sa Kingdom Hall bisan ang indi mga Saksi. Pareho sa iban namon nga mga miting, ang diskurso sa patay bukas para sa tanan.

 Ang kada Saksi magadesisyon para sa iya kaugalingon base sa iya konsiensia nga natudluan sang Biblia. (1 Timoteo 1:​19) Pero wala kami nagapakigbahin sa relihioso nga mga seremonya nga wala nabase sa Biblia.​—2 Corinto 6:​14-​17.