Ginarespeto sang mga Saksi ni Jehova ang mga gobierno kag ang mga simbulo sini nga mga gobierno. Nahibaluan namon nga may kinamatarong ang iban nga mag-recite sang panumpa sa pungsod, magsaludo sa bandera, ukon magkanta sang national anthem.

 Pero wala nagaentra sa sini nga mga seremonya ang mga Saksi ni Jehova kay nagapati kami nga supak ini sa mga panudlo sang Biblia. Ginaapresyar namon kon respetuhon sang iban ang amon mga pagpati pareho sa pagrespeto namon sa ginapatihan nila.

Sa sini nga artikulo

•  Ano nga mga prinsipio sa Biblia ang ginasunod namon parte sa sini?

•  Paano kon ginapatuman sang kasuguan ang pag-entra sa sini nga mga seremonya?

•  May ginadampigan bala sa pulitika ukon sa mga isyu sa komunidad ang mga Saksi ni Jehova?

 Ari ang duha ka importante nga prinsipio sa Biblia nga ginasunod namon:

•   Ang Dios lang ang dapat simbahon. Ang Biblia nagasiling: “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.” (Lucas 4:8) Ang mga panumpa sa pungsod kag mga national anthem masami nga may mga tinaga sang promisa nga unahon sang isa ang iya pungsod ukon palanggaon sang isa ang iya pungsod labaw sa bisan ano. Gani, nagapati ang mga Saksi ni Jehova nga sala para sa ila nga mag-entra sa sini nga mga seremonya.

   Nagapati man ang mga Saksi ni Jehova nga ang pagsaludo sa bandera isa ka buhat sang pagsimba, ukon pareho sa pagsimba sa mga diosdios, nga ginadumilian sang Biblia. (1 Corinto 10:14) Ang pila ka historian nagapati nga ang mga bandera sang mga pungsod, mga simbulo sang pagsimba. “Ang panguna nga simbulo sang pagtuo kag panguna nga ginasimba sa nasyonalismo amo ang bandera,” siling sang historian nga si Carlton J. H. Hayes. a Parte sa mga Cristiano sang una, ang awtor nga si Daniel P. Mannix nagsiling: “Ang mga Cristiano nangindi . . . sa paghalad sa espiritu de la guardia sang [Romanong] emperador—halos katumbas karon sa pagpangindi sa pagsaludo sa bandera.” b

  Bisan wala nagasaludo sa bandera ang mga Saksi ni Jehova, wala namon ini ginaguba, ginasunog, ukon ginahimuan sang bisan ano nga nagapakita nga wala namon ginarespeto ang bandera ukon ang iban pa nga simbulo sang pungsod.

•   Ang tanan nga tawo alalangay para sa Dios. (Binuhatan 10:34, 35) Ang Biblia nagasiling nga ginhimo sang Dios ‘halin sa isa ka tawo ang tagsa ka pungsod sang mga tawo.’ (Binuhatan 17:26) Bangod sini, nagapati ang mga Saksi ni Jehova nga sala nga tratahon ang isa ka tribo ukon pungsod nga mas maayo sangsa iban. Ginarespeto namon ang tanan nga tawo, diin man sila naghalin ukon diin man sila nagaistar.—1 Pedro 2:17.

 Wala ginakontra sang mga Saksi ni Jehova ang mga gobierno. Nagapati kami nga ang mga gobierno nalakip sa “kahimusan sang Dios” nga ginapasugtan niya nga maggahom. (Roma 13:1-7) Nagapati man kami nga dapat sundon sang mga Cristiano ang sekular nga mga awtoridad.—Lucas 20:25.

 Pero, paano abi kon ang ginasugo sang gobierno supak sa ginasugo sang Dios? May mga tion nga nangin posible nga magpangabay sa gobierno nga bag-uhon ang mga kasuguan. c Kon indi ini posible, matinahuron nga nagadesisyon ang mga Saksi ni Jehova nga “tumanon ang Dios subong manuggahom sa baylo sang mga tawo.”—Binuhatan 5:29.

 Wala. Ang mga Saksi ni Jehova wala sing ginadampigan sa pulitika ukon sa mga isyu sa komunidad. Wala kami nagapanumpa sa pungsod, nagasaludo sa bandera, ukon nagakanta sang national anthem. Pero indi buot silingon nga mga aktibista kami, kundi ginasunod lang namon ang amon natun-an sa Biblia parte sa sini nga mga seremonya.