Ang Watch Tower Bible and Tract Society of Pennsylvania indi komersial nga korporasyon nga ginhimo sang 1884 suno sa mga kasuguan sang Commonwealth of Pennsylvania, U.S.A. Ginagamit ini sang Mga Saksi ni Jehova para suportahan ang ila hilikuton sa bilog nga kalibutan, pareho sang pagbalhag sang mga Biblia kag base sa Biblia nga mga balasahon.

 Suno sa charter sini nga korporasyon, ang katuyuan sini “relihioso, nagatudlo, kag nagabulig,” kag labaw sa tanan, para “iwali kag itudlo ang ebanghelyo sang Ginharian sang Dios nga ang hari amo si Jesucristo.” Ang mga miembro sang korporasyon ginaagda kag wala nagadepende sa kon pila ang ila gindonar. Ang mga miembro kag mga direktor sini nagabulig sa Nagadumala nga Hubon sang mga Saksi ni Jehova.

 Luwas sa Watch Tower Bible and Tract Society of Pennsylvania, ang mga Saksi ni Jehova may legal nga mga ahensia sa lainlain nga pungsod. Ang iban sini nga mga ahensia may “Watch Tower,” “Watchtower,” ukon translation sini sa ila mga ngalan.

 Sugod sang ginhimo ining lainlain nga legal nga mga ahensia daku gid ang nabulig sini sa amon. Halimbawa:

•   Pagsulat kag pagbalhag. Nakabalhag na kami sing mga 220 milyones ka Biblia kag halos 40 bilyones ka balasahon nga base sa Biblia, sa sobra 700 ka lenguahe. Paagi sa jw.org nga website libre nga mabasa sang mga tawo ang Biblia online sa sobra 120 ka lenguahe. Makita man nila diri ang sabat sa ila mga pamangkot parte sa Biblia pareho sang, “Ano ang Ginharian sang Dios?”

•   Edukasyon. May sarisari kami nga eskwelahan para magtudlo sang Biblia. Halimbawa, sugod sang 1943, sobra 8,000 ka Saksi ni Jehova ang nakabenepisyo sa maid-id nga paghanas sa Watchtower Bible School of Gilead. Paggradwar nila, puede sila mangin mga misyonero ukon magbulig para mapabakod kag mapauswag ang amon hilikuton sa bilog nga kalibutan. Kag kada semana, minilyon ka tawo, bisan ang indi mga Saksi, ang ginatudluan sa mga miting sa tagsa namon ka kongregasyon. May mga klase man kami para magtudlo sing pagbasa kag pagsulat kag naghimo kami sing libro para sini nga mga klase sa 110 ka lenguahe.

•   Pagbulig sa iban. Nagabulig man kami sa mga nagaantos bangod sang mga trahedya​—kahimuan man ini sang tawo, pareho sang pagpinatyanay sang mga tribo sa Rwanda sang 1994, ukon kalamidad, pareho sang linog sa Haiti sang 2010.

 Bisan pa madamo na kami sing nahimo paagi sa sini nga mga ahensia, ang amon mga hilimuon wala nagadepende sa bisan diin sa sini. Ang tagsa ka Cristiano may kaugalingon nga responsibilidad sa pagtuman sa sugo sang Dios nga magwali kag magtudlo sang maayong balita. (Mateo 24:14; 28:19, 20) Nagapati kami nga ang Dios ang nagabulig sa amon hilimuon kag padayon sia nga “nagapatubo sini.”—1 Corinto 3:6, 7.