Sa bilog nga kalibutan, ang mga Saksi ni Jehova may 15 ka sanga talatapan nga nagaimprinta. Ang isa sini, ang sanga sa Central Europe, ara sa Selters, Germany, sa lugar nga ginatawag Steinfels, nga sa German nagakahulugan sing “Bato nga Igang.”

Sang Mayo 23-25, 2014, ang sanga sa Central Europe nag-imbitar sang mga kaingod, mga negosyante, kag lokal nga mga opisyal para sa isa ka open house. Ini nga okasyon gintawag nga “30 ka Tuig sa Selters” kay ang pasilidad sang sanga opisyal nga gin-inagurahan sang Abril 21, 1984.

Sa tion sang open house, sobra 3,000 ang nag-tour sa mga pasilidad. “Ang pagbisita sa sanga talatapan sang mga Saksi ni Jehova pirme gid espesyal nga okasyon,” siling sang mayor, nga mga 30 ka tuig na nga nagapangalagad sa lokal nga gobierno. Nagsiling sia: “Indi ko gihapon malipatan nga ang sanga talatapan sa Steinfels madasig nga nahuman sang 1979 asta 1984.”

Ang isa ka eksibit diri ginatig-uluhan “Ang Katawhan ni Jehova sa Central Europe.” Nakita sang mga bisita ang mga 120 ka tuig nga kasaysayan sang mga Saksi sa sini nga lugar. Ini nga eksibit permanente na subong nga displey sang sanga talatapan.

Ang isa pa ka eksibit nagadispley sang talagsahon kag importante nga mga Biblia. Halimbawa, makita diri ang una nga edisyon sang kompleto nga German nga Biblia nga napetsahan 1534 kag ang bahin sang Polyglot Bible ni Elias Hutter nga napetsahan 1599, nga may 12 ka lenguahe. Dugang pa, may mga displey, tsart, kag mga video presentation nga nagapokus sa kabilihanan sang mga prinsipio sang Biblia sa aton pangabuhi subong.

May duha ka tour diri diin ang mga bisita puede makalibot nga wala sing tour guide. Natun-an diri sang mga bisita ang ginahimo adlaw-adlaw sang sobra 1,000 ka lalaki kag babayi nga nagaistar kag nagatrabaho sa sanga talatapan. Sa una nga tour, nga may tema “Ang Amon Kabuhi,” ginpatan-aw sa mga bisita ang pila ka kuarto nga ilistaran. Nagkaon man sila sa dining room kag naglagaw sa daw parke nga palibot. “Kanami gid kag katahom sang lugar,” siling sang isa ka bisita.

Sa ikaduha nga tour, nga gintig-uluhan “Produksion,” maagyan ang Pressroom, Bindery, kag Shipping Department. Nakita gid sang mga bisita kon paano ginaimprinta, gina-bind, kag ginapadala ang mga literatura sa Biblia sa sobra 50 ka pungsod. Ang isa ka lalaki nagsiling: “Wala gid ko nagdahom nga bilog kalibutan gali ang organisasyon sang mga Saksi ni Jehova. Ang ila mga publikasyon nagalab-ot sa tanan nga bahin sang kalibutan. Milagro gid ini kay nahimo ini tanan paagi sa mga boluntaryo.”

Ang espesyal nga bahin amo ang eksibit parte sa jw.org, ang opisyal nga website sang mga Saksi ni Jehova. Ang mga bata kag tigulang nagtan-aw sang mga presentasyon kag video, kag nasabat ang madamo nila nga pamangkot.

Sang natapos ang tour, nagayuhumyuhom kag nagdayaw gid ang madamo nga bisita kay naintiendihan pa gid nila ang hilikuton sang mga Saksi ni Jehova sa bilog nga kalibutan. Ang isa ka lalaki nagsiling: “Kadamo sang akon sala nga pagpati parte sa mga Saksi. Dapat ko gid bag-uhon ang akon pagtan-aw sa ila.” Ang isa naman ka babayi sulitsulit nga nagsiling: “Sini nga adlaw, nag-updanay ang tanan nga rasa.”