Mga 145 kilometros sa aminhan sang New York City, malapit sa isa ka baryo sa Wallkill, New York, makita ang mga uma nga may importante nga papel sa pagtudlo sing Biblia sang mga Saksi ni Jehova sa bilog nga kalibutan. Ang una nga uma sa Watchtower Farms, nga amo ang tawag sa sini nga pasilidad subong, ginbakal 50 ka tuig na ang nagligad, sang Enero 2, 1963.

Gin-istorya ni David Walker, nga isa sa mga Saksi ni Jehova nga nag-alagad sa Wallkill halin sang nag-umpisa ini, kon paano nabakal ang una nga uma: “Nagadamo na ang miembro sang world headquarters sang mga Saksi ni Jehova sa Brooklyn, New York, kag dapat makakinot sa pagkaon. May isa pa ka uma ang mga Saksi ni Jehova sa New York, nga mga anom asta walo ka oras halin sa Brooklyn. Pero ang Wallkill duha lang ka oras, gani amo gid ini ang lugar nga amon kinahanglan.” Ini nga uma gingamit sang mga Saksi ni Jehova para tamnan sang mga prutas kag utanon, kag nagsagod man diri sing mga manok, baboy, kag mga baka, kag naghimo sing mga produkto halin sa gatas. Sang ulihi, nadugangan pa ini nga mga uma.

Sa sulod sang isa ka dekada, ang pag-uswag sang mga Saksi ni Jehova nagresulta sa isa pa ka pagbag-o sa Wallkill. Magluwas sa pag-ani sang literal nga mga patubas, ginsugdan man diri ang paghimo sang mga literatura nga makabulig sa simbuliko nga pagpangani nga ginhambal ni Jesus. (Mateo 9:​37; Lucas 10:2; Juan 4:​35, 36) Binagbinaga ang pila sa mga hilikuton sa Wallkill.

Pag-imprinta: Sa tungatunga sang ika-20 nga siglo, ang kalabanan sang aton mga literatura base sa Biblia, ginahimo sa printery sa Brooklyn, New York. Pero nagdaku ang kinahanglanon, kag indi na ini masarangan sang printery sa Brooklyn. Gani sang 1973, natapos sang mga Saksi ni Jehova ang pagpatindog sang isa pa ka printery sa Wallkill. Sugod sadto, pila ka beses na nga ginpadakuan ini nga printery, kag ang pinakaulihi ginhimo sang 2004.

Teknolohiya: Sang 1979, ginsugdan sang isa ka grupo sang mga Saksi ni Jehova sa Wallkill ang paghimo sang isa ka computerized system, nga ginatawag na subong nga Multilanguage Electronic Publishing System (MEPS). Ini nga program ginagamit sa pagbalhag sang literatura sa Biblia sa sobra 600 ka lenguahe.

Edukasyon: Sang 1988 ang Watchtower Bible School of Gilead ginsaylo halin sa Brooklyn pakadto sa Wallkill, kag sang Oktubre 17, nagsugod ang klase. Diri ginhiwat ang klase asta nga ginsaylo ini liwat sa Watchtower Educational Center sa Patterson, New York, sang Abril 1995.

Parte naman sa iban nga uma, ang mga teknik kag pagpadalagan sa Watchtower Fams nagbag-o man sa sulod sang sobra lima ka dekada. Pero daku gihapon nga trabaho ang ginahimo para masuplayan sang de-kalidad nga pagkaon ang mga Saksi ni Jehova nga nagaalagad sa mga pasilidad sang Bethel sa New York.

Sa karon, ang mga Saksi ni Jehova nagapatindog sang bag-o nga mga opisina, puluy-an, kag iban pa nga pasilidad sa Wallkill. Ginakay-o man nila ang daan nga mga bilding. Tanan ini makabulig sa Watchtower Farms nga makapadayon sa pagsuplay sang espirituwal nga kinahanglanon sang nagadamo nga Saksi ni Jehova sa sini nga bahin sang kalibutan.

Si David Walker nga ginsambit kaina, nagsiling: “Sa sulod sang 50 ka tuig, nalipay gid ako nga makita kon paano amat-amat nga nagdaku ang mga pasilidad sa Wallkill kag nakabulig sa aton panikasog nga tudluan sing Biblia ang mga tawo sa bilog nga kalibutan!”