Ang indi kinaandan nga pagbunok sang ulan sa Central Europe sang Hunyo 2013 nagresulta sa pag-awas sang mga suba. Sa Hungary, nagtaas ang tubig sa Danube River, kag amo ini ang pinakamataas nga nibel nga narekord sa kasaysayan sini nga suba.

Bangod sini nga emerhensia, ginpangabay sang Hungarian Ministry of Human Resources ang sanga talatapan sang mga Saksi ni Jehova kon bala puede sila buligan sang mga Saksi para malikawan ang dugang nga halit sang baha. Gani, gin-agda sang sanga talatapan ang mga kongregasyon malapit sa Danube River nga magbuylog sa sini nga hilikuton nga gin-organisar sang lokal nga awtoridad.

Dalayawon gid ang pagsuporta sang mga kongregasyon. Sa nagsunod nga mga inadlaw, sobra 900 ka Saksi halin sa 72 ka kongregasyon ang nagbulig sa pagbutang sang mga sandbag sa pangpang sang suba. Ginpasuksok man sila sing badge card nga may nasulat nga “Mga Saksi ni Jehova,” ngalan nila, kag siudad.

Sa isa ka siudad, ang representante sang lokal nga Hungarian Red Cross nagpadala sing sulat sa isa ka kongregasyon: “Dapat lang nga pasalamatan namon kamo kag respetuhon, kay talagsa lang kami makakita sing mga tawo nga nahiusa kag nagamatumato pareho sa inyo, labi na gid kay layulayo ang inyo ginbiyahe! Ginapabugal ko gid ang inyo maayo nga halimbawa sa amon siudad!”

Ang tsirman sang disaster relief organization, nga miembro man sang Hungarian Parliament, nagpadala sang sulat sa sanga talatapan para pasalamatan ang mga Saksi sa ila maayo nga pagbulig.