Sang Domingo, Enero 5, 2014, si Serge Gerardin nagasakay sa bus pakadto sa asembleya sang mga Saksi ni Jehova malapit sa Paris, France, sang nasaksihan niya ang isa ka grabe nga aksidente. “May salakyan nga nagbunggo sa concrete barrier sang taytay kag naglupad,” siling niya. “Dayon nagbunggo liwat sa taytay ang salakyan, nagkalayo, nahulog, kag nagtupa nga una ang atop.”

Si Serge sobra 40 ka tuig na nga bombero. Kapitan sia sang mga bombero, gani madasig sia nga nagresponde. Nagsiling sia: “Bisan pa sa pihak kami nga lane sang haywey, ginpangabay ko ang drayber nga magdulog, kag nagdalagan ako sa nagakalayo nga salakyan.” Nabatian ni Serge ang singgit nga “Tabang! Tabang!” Nagsiling sia: “Naka-amerikana ako kag nakakurbata, kag wala ako sing proteksion sa lawas. Pero bal-an ko nga puede pa maluwas ang mga nagasinggit!”

Naglibot si Serge sa salakyan kag nakita niya ang isa ka pasahero nga daw indi kabalo sang iya himuon kag ginbuligan niya ini nga makapalayo. “Naghambal sia nga may duha pa ka tawo sa salakyan,” siling ni Serge. “Sina nga tion, madamo na nga salakyan ang nagpundo. Pero bangod grabe gid ang init kag kalayo, indi makapalapit ang mga tawo.”

May mga drayber sang trak nga nagpalapit dala ang ila fire extinguisher. Sa pagpanguna ni Serge, gingamit nila ang ila extinguisher para mapahaganhagan ang kalayo sa salakyan. Ang drayber na-trap sa idalom sang salakyan. Gani nagbuligay si Serge kag ang iban pa nga tawo nga nagdulog para maalsa ang salakyan kag ginguyod nila ang drayber palayo.

“Sina nga tion,” siling ni Serge, “nagdaku liwat ang kalayo!” Pero may isa pa ka pasahero nga nagabaliskad kag nagaangot pa sa seat belt. May nag-abot nga isa pa ka bombero nga off-duty man, kag nagasuksok sing pangmotor nga leather nga bayo. “Ginpaathag ko nga daw malupok na ang salakyan,” siling ni Serge, “gani nagdesisyon kami nga butungon na lang pagua ang tawo sa iya mga butkon.” Wala pa isa ka minutos, naglupok ang salakyan.

Sang nag-abot ang mga bombero kag mga medic, gin-atipan nila ang mga biktima kag ginpalong ang kalayo. Ginbulong man ang mga pilas kag paso ni Serge sa iya mga kamot. Sang manugsakay na si Serge sa bus pakadto sa asembleya, may mga lalaki nga naglagas kag nagpasalamat sa iya.

Nagapasalamat gid si Serge nga ara sia sadto nga tion para magbulig. “Nabatyagan ko nga responsibilidad ko kay Jehova nga akon Dios ang kabuhi sadto nga mga tawo. Nalipay gid ako kay nakabulig ako para masalbar sila.”