Sang Septiembre 13, 2014, ginhiwat ang gradwasyon sang ika-137 nga klase sang Watchtower Bible School of Gilead sa educational center sang mga Saksi ni Jehova sa Patterson, New York. Ginahanas sini nga eskwelahan ang eksperiensiado nga mga ministro sang mga Saksi ni Jehova para mangin mas epektibo pa gid sila sa pagpabakod sang mga kongregasyon kag mga sanga talatapan diin sila naasayn. Sa kabilugan, 12,333 ang nagtambong sa programa, sa Patterson mismo ukon paagi sa video streaming sa Canada, Jamaica, Puerto Rico, kag sa Estados Unidos.

Si Samuel Herd, nga miembro sang Nagadumala nga Hubon sang mga Saksi ni Jehova, amo ang tsirman sang programa. Sa iya nagabukas nga pamulongpulong, ginpadaku niya nga mas mataas ang panghunahuna ni Jehova sangsa aton. (Isaias 55:​8, 9) Nagsiling sia nga pagkatapos sang lima ka bulan nga pagtuon sang mga estudyante sang Gilead parte sa panghunahuna sang Dios, gasgas pa lang ang ila nahimo, kay ‘diutay lamang ini nga bahin sang binuhatan sang Dios.’ (Job 26:14) Nagsiling man si Utod Herd nga kada magtipon kita para binagbinagon ang panghunahuna sang Dios makabenepisyo kita, kag isa sa sini ang programa sa gradwasyon.

‘Ang Kinaiya nga Ginapatubas sang Espiritu Amo ang Pagkamapinasensiahon.’ (Galacia 5:​22) Ginbinagbinag ni John Larson, nga miembro sang Komite sang Sanga sang Estados Unidos, ang duha ka paagi nga mapakita naton ang pagkamapinasensiahon, nga isa sa mga kinaiya nga ginapatubas sang espiritu sang Dios. Una, kinahanglan mangin mapinasensiahon kita kay Jehova samtang ginahanas niya kita kag ginabuligan nga mangin malig-on sa aton pagtuo. (1 Pedro 5:​10) Si Abraham isa ka maayong halimbawa sang pagkamapinasensiahon sang ginhanas sia ni Jehova asta sang gintuman ni Jehova ang Iya saad sa iya.​—Hebreo 6:​15.

Ikaduha, kinahanglan mangin mapinasensiahon kita sa aton kaugalingon. Pagkatapos sang paghanas sa mga estudyante sa Gilead, basi sobra ang ginapaabot nila sa ila kaugalingon. Kon wala dayon sila sing makita nga pag-uswag sa lugar diin sila naasayn, basi magpensar sila, ‘Ano bala ang sala sa akon?’ Base sa eksperiensia mismo ni Utod Larson, ginpasalig niya sila nga malampuwasan nila ang mga kabudlayan kon mangin mapinasensiahon sila sa ila kaugalingon kag padayon nga mangin mapisan asta nga tapuson na sang Dios ang paghanas sa ila.​—Hebreo 6:​11, 12.

“Kabay nga ang Inyo Tagipusuon Magpabilin nga Mapainubuson kag Mabuhi sing Wala sing Katubtuban!” Ginbase ni Anthony Morris sang Nagadumala nga Hubon ang iya tema sa Salmo 22:26, nga ang ulihi nga bahin sini mahimo badbaron sing literal nga “kabay nga mabuhi ang inyo tagipusuon sing wala sing katubtuban.” Para mabaton ini nga pagpakamaayo, dapat mangin mapainubuson kita. Ginpadaku ni Utod Morris nga indi na kita paggamiton ni Jehova kon indi kita mapainubuson. Mahimo malimtan na sang bisan sin-o sa aton, bisan sang madugay nga mga Cristiano, nga importante gid nga ilugon naton si Cristo Jesus.​—2 Pedro 1:9.

May mga halimbawa sa Kasulatan sang mga tawo nga mapainubuson kag indi mapainubuson. Si Herodes Agripa bugalon nga nagbaton sang pagpadungog sang mga tawo nga para tani sa Dios, gani ginsilutan sia sang anghel sang Dios kag “gin-ulod sia.” (Binuhatan 12:21-​23) Pero si Pedro wala nagsunggod ukon nangakig sang ginsabdong sia ni Jesus bangod “ang [iya] panghunahuna indi iya sang Dios, kundi iya sang tawo.” (Mateo 16:21-​23) Ginbaton niya ang disiplina kag nangin halimbawa sia sang pagkamapainubuson.​—1 Pedro 5:5.

Ang iban nga estudyante iasayn sa Bethel sa isa sa mga sanga talatapan sang mga Saksi ni Jehova, kag ginpaandaman sila ni Utod Morris nga kon indi sila magpaubos, indi gid sila mangin malipayon sa ila asaynment. Pero, mahimo nga indi dayon matalupangdan sang isa nga indi sia mapainubuson. Para ipadaku ang punto, nagsiling sia nga sang una may ginlaygayan nga isa ka gulang bangod indi sia mapainubuson. Nagsulat ang gulang sa sanga talatapan nga nagasiling, “Ako na siguro ang pinakamapainubuson nga tawo.” Ginpalig-on ni Utod Morris ang mga estudyante nga indi nila ina pag-ilugon. Makapabilin sila nga mapainubuson kon indi sila magpabugal sang ila awtoridad kag kilalahon nila nga ang matuod nga awtoridad iya ni Jehova nga Dios kag ni Cristo Jesus.

“Indi Sia Hawothawot sa Paghatag sang Iya Espiritu.” (Juan 3:​34) Ginpahanumduman ni Michael Burnett, nga instruktor sa Gilead, ang mga estudyante nga buligan sila sang balaan nga espiritu nga malampuwasan ang mga kabudlayan kag pagpangduhaduha nga maatubang nila sa ila mga asaynment. Sa bulig sang espiritu sang Dios, nahimo ni Bezalel ang iya asaynment nga maghimo sang tabernakulo. (Exodo 35:30-​35) Paagi sa balaan nga espiritu, wala lang nagsagad pa gid si Bezalel sa iya obra kundi natudluan man niya ang iban. Amo man sini ang mabulig sang balaan nga espiritu sa mga naggradwar sa Gilead, ilabi na kon sundon nila ang paagi sang pagtudlo halin sa Kasulatan, nga natun-an nila sa klase.

Sang panahon ni Bezalel, daku gid ang nabulig sang mga babayi nga Israelinhon sa paghimo sang tabernakulo. (Exodo 35:25, 26) Sing kaanggid, ang utod nga mga babayi sa klase napamatud-an man nga ‘sampaton nga mga babayi’ kay ginsuportahan nila ang ila bana. Sa konklusion ni Utod Burnett, ginlaygayan niya ang mga estudyante: “Dapat ang inyo ikasarang balansehan ninyo sang pagkamapainubuson kag pagkamatinumanon. Kon himuon ninyo ini, ihatag sa inyo ni Jehova ang iya espiritu sing bugana.”

“Masaot Ka Bala Upod sa Akon?” Sa pamulongpulong ni Mark Noumair, nga kabulig sa Teaching Committee, ginpasangkad niya ang iya tema paagi sa paggamit sang halimbawa ni Hari David sang gindala niya ang kaban sang katipan sa Jerusalem. (2 Samuel 6:​12-​14) Mapainubuson nga nagsaot si David upod “sang ulipon nga mga babayi sang iya mga alagad” samtang ginadala ang Kaban. (2 Samuel 6:​20-​22) Indi gid malipatan sang ulipon nga mga babayi ina nga adlaw nga nagsaot si Hari David upod sa ila. Ginpalig-on ni Utod Noumair ang mga estudyante nga ‘magsaot upod sa ulipon nga mga babayi.’ Dayon ginpamangkot niya sila: “Makilala bala kamo bilang isa nga nagabulig sa mga may diutay lang ukon wala sing responsibilidad? . .  Pabaloran bala ninyo ang iban base sa ila espirituwal nga mga kinaiya?”

Mailog sang mga naggradwar si Jehova kon padayon nila nga ipakita ang mainunungon nga gugma sa sina nga paagi. (Salmo 113:​6, 7) Bisan pa ang pila sa palibot nila indi mapainubuson, dapat indi magpaapekto ang mga estudyante sa indi kahimpitan sang iban. “Pensara ninyo nga indi kamo importante,” siling ni Utod Noumair. Nagdugang pa sia: “Iluga ninyo ang paagi sang pagpakig-angot ni Jehova sa iya mga karnero.”

“Pagbantala sa Tagsa ka Kahigayunan.” Ginsambit ni William Samuelson, nga nagatatap sa Theocratic Schools Department, si apostol Pablo nga ginabantala gid niya ang maayong balita kon may kahigayunan. (Binuhatan 17:17) Dayon ginpaakto liwat ni Utod Samuelson sa mga estudyante ang ila eksperiensia sa ministeryo samtang nagaeskwela sa Gilead. Halimbawa, naistorya sang mag-asawa ang nagabantay sa balaligyaan sang pagkaon. Ginhulat anay nila nga magdiutay na lang ang kostumer kag ginpakita sa babayi ang video nga Ngaa Dapat Tun-an ang Biblia? Ginpakita man nila sa iya ang jw.org, diin makakita sia sing mga impormasyon sa iya lenguahe nga Laotian. Ginbalikan sang mag-asawa ang babayi para palambuon ang iya interes.

“Padayon nga Mangin Handa sa Pag-alagad Para sa Ginharian.” Gin-interbyu ni William Nonkes, nga nagaalagad sa Service Department sa sanga talatapan sa Estados Unidos, ang apat ka estudyante nga manuggradwar. Bilang pagsunod sa Isaias 6:8, nagpakita na sila sing kahanda sa pag-alagad para sa Ginharian, pero ginbuligan sila sang eskwelahan nga mangin mas handa pa gid. Ginpaathag ni Sister Snolia Maseko nga ginpakita sa iya sang Gilead ang mga butang nga dapat niya pauswagon, ilabi na sa paggamit sing maalamon sang iya tion bisan pagkatapos sang isa ka adlaw nga pag-alagad. Nagsiling sia, “Ginbuligan ako sini nga paghanas nga himuon ang mga butang nga abi ko indi ko masarangan.” Natun-an ni Utod Dennis Nielsen kon paano makabulig sa iya ang Sofonias 3:​17 nga indi maluyahan sa iya pagministeryo. “Kon ara ako sa ministeryo kag indi maayo ang resulta, dapat dumdumon ko nga nalipay gid si Jehova sa akon nahimo,” siling ni Utod Nielsen, “kag amo man sini dapat ang batyagon ko.”

“Tan-awa ang Nagalupad nga mga Pispis.” (Mateo 6:​26) Si Stephen Lett sang Nagadumala nga Hubon ang naghatag sang panguna nga pamulongpulong sang programa. Base sa panudlo ni Jesus nga dapat ‘tan-awon,’ naton sing maayo ang mga pispis, ginpadaku ni Utod Lett ang pila ka leksion nga matun-an naton sa sini.​—Job 12:7.

Halimbawa, ginaatipan ni Jehova ang mga pispis, gani atipanon man niya kita. Bahin kita sang “panimalay sang Dios” kag ginapasalig niya kita nga ‘amanan niya ang mga natungod sa iya.’ (1 Timoteo 3:​15; 5:8) Siempre, dapat himuon man naton ang aton bahin. Pareho sang mga pispis nga kinahanglan mangita sang pagkaon nga ginaaman sang Dios, dapat padayon man naton nga “unahon ang pagpangita sa Ginharian” para mabaton naton ang iya pagpakamaayo.​—Mateo 6:​33.

Ginpadaku man ni Utod Lett nga madamo nga pispis ang nagahuni para maghatag sing paandam kon may katalagman. Ginapaandaman man naton ang mga kauturan kon nagakaigo, halimbawa, kon ang isa ka utod “makahimo sang sayop nga tikang antes niya matalupangdan ini.” (Galacia 6:1) Kag paagi sa aton pagbantala, ginapaandaman naton ang mga tawo sa nagahilapit nga “adlaw ni Jehova.” (Sofonias 1:​14) Sa isa pa ka halimbawa, ginpaathag ni Utod Lett nga pareho sa mga pispis nga nagalupad sa ibabaw sang mataas nga mga kabukiran para magsaylo sa iban nga lugar, malampuwasan man naton ang dalagku nga mga kabudlayan sa bulig ni Jehova.—Mateo 17:20.

Konklusion. Nabaton sang mga estudyante ang ila mga diploma, dayon ginbasa sang isa sa mga naggradwar ang sulat sang pagpasalamat sang klase. Sa nagatakop nga pamulongpulong ni Utod Herd, ginpaanggid niya ang proseso sang pagpatudok sang panghunahuna ni Jehova sa aton tagipusuon sa pagpadulot sang lansang sa kahoy sang riles. Kinahanglan ini pulpugon sing pila ka beses para magdulot sing maayo. Gani, kinahanglan padayon man nga hunahunaon sang mga naggradwar ang ila natun-an sa Gilead. “Hatagi sing tion nga magdulot gid ini sa inyo tagipusuon,” siling ni Utod Herd. Dayon nagdugang sia, “Iluga ang panghunahuna sang Dios, kag mangin pagpakamaayo kamo.”