Sang nagligad nga 50 ka tuig, 583 ka mga Saksi ni Jehova ang nagbiyahe sa bilog nga kalibutan sa sulod sang napulo ka semana. Pero wala sila nagbiyahe para maglagaw lang. Ang panguna gid nila nga katuyuan amo nga maeksperiensiahan ang makapalig-on nga pagpakig-upod sa mga Cristiano sa serye sang 1963 nga “Walay Katapusan nga Maayong Balita” nga mga Asembleya. Ang mga delegado nagbiyahe agod makaupod ang mga Saksi sa sobra 20 ka pungsod, amo nga gintawag ini nga “Bilog nga Kalibutan” nga Asembleya.

Ang panguna nga bahin sang tagsa ka asembleya amo ang pamulongpulong nga may tig-ulo “Kon ang Dios Mangin Hari sa Bug-os nga Duta.” Si Nathan Knorr, nga halin sa ulong talatapan sang mga Saksi ni Jehova, ang nagpamulongpulong sini sa kalabanan nga mga asembleya. Ginlaragway niya ang nagalala nga kahimtangan sang kalibutan kag ginpatuhay ini sa dalayawon nga saad sang Biblia nga ang duta himuon liwat nga Paraiso. Sa bilog nga kalibutan, 580,509 ang kabilugan nga nagtambong sa sini nga pamulongpulong.

Nagsugod ang serye sang mga asembleya sa Milwaukee, Wisconsin, U.S.A. Halin didto, nagbiyahe ang mga delegado pasidlangan. Pagkatapos sang asembleya sa New York, nagkadto sila sa England, Sweden, Germany, kag Italy. Nabantala nila ang maayong balita halin sa Biblia sa sini nga mga lugar.

Madamo nga tawo sa sini nga mga lugar ang nagpasalamat gid kay naghatag sing tion ang mga Saksi nga makig-istorya sa ila. Ang isa ka pamatan-on nga babayi sa Stockholm, Sweden, nagsiling: “Indi ko malimtan ang inyo pagkadto diri. . . . Nagbiyahe gid kamo pakadto diri para masugid sa akon ang inyo pagtuo sa Dios? Dalayawon gid kamo.”

Pero daw nasubuan ang mga delegado pag-abot nila sa Athens, Greece. Bangod ginkanselar sang gobierno ang permit para sa asembleya nga pagahiwaton sa Panathinaikos Stadium kay ginpilit sila sang mga lider sang relihion. Pero wala ini nakapugong sa makugi nga mga Saksi. Sang katapusan sang Agosto, halos 10,000 ang nakatambong sa programa, nga ginhiwat sa pribado nga mga balay kag lokal nga mga kongregasyon.

Halin sa Athens, nagkadto ang mga delegado sa Lebanon, Jordan, Israel, kag Cyprus. Gin-abiabi gid sila sang ila mga kauturan, kag kon kaisa makahalam-ot pa ang resulta. Sa Nicosia, Cyprus, ang isa ka delegado nag-istorya parte sa iya sapatos: “Kada magpauli ako sa balay [sang akon ginadayunan] kag ginauba ko ang akon sapatos . . . , nagakadula ini . . . , pagligad sang lima ka minuto mabalik naman, nga nagahininghining na!”

Ang katapusan nga bahin sang pagbiyahe amo ang sa Asia kag sa Pasipiko. Ang India, Burma (Myanmar subong), Thailand, Hong Kong, Singapore, Philippines, Indonesia, Australia, Taiwan, Japan, New Zealand, Fiji, kag Korea nag-abiabi gid sa mga delegado kag sa linibo ka Saksi sa sini nga mga lugar. Ginpahisuno gid sang madamo ang ila iskedyul para makatambong sa asembleya, pero tumalagsahon ang ginhimo sang magnobyahanay halin sa Yokosuka, Japan. Sang naglisensia ang lalaki sa iya amo nga mabakasyon sia kay matambong sang asembleya sa Kyoto, ginsilingan sia nga ang bakasyon sa obra para lang sa lubong kag kasal. Bangod may plano na gid man sila, nagpakasal na lang sila sing abanse. Kag gintuon nila ang ila honeymoon sa tion sang asembleya!

Natapos ang pagbiyahe sang Septiembre, sa mga asembleya sa Hawaii kag California, U.S.A. Sa Pasadena, California, mas madamo ang nagtambong sangsa ginapaabot. Gani, grabe ang trapik sang natapos ang sesyon. Pero, ang pamantalaan sa sina nga lugar nagreport nga ang hepe sang pulis nagsiling: “Sa tanan nga kombension nga nakita ko nga pareho sini ka daku, amo ini ang pinakamalinong.”

Ang epekto sini nga mga asembleya mabatyagan gihapon subong. Ang reperensia sa Biblia nga “All Scripture Is Inspired of God and Beneficial” ginpagua sa sini nga asembleya, kag ginagamit gihapon sa mga miting sang mga Saksi ni Jehova.

May bag-o nga ambahanon nga ginpagua sa asembleya sa New York. Ginhimo ini ni Harold King, ang Saksi nga ginpagua sa bilangguan sa China sang 1963. Ang ambahanon may tig-ulo nga “From Door to Door.” Ginkomposo ini ni Harold King sang ara sia sa bilangguan, kag asta subong ginakanta gihapon sang mga Saksi ni Jehova ang bersion sini nga may tig-ulo nga “Magpamalaybalay.”

Ang mga kombension sang mga Saksi ni Jehova subong lain na gid. Indi na ini tanto kadaku nga mga pagtilipon. Mas madamo na ang lugar nga ginahiwatan sini, gani diutay na lang ang ginabiyahe sang mga nagatambong. Bangod sini nga mga pagbag-o kag pagpasimple, mas makakonsentrar na ang mga nagatambong sa programa. Sobra pito ka milyon ka mga Saksi ni Jehova kag mga gin-agda nila ang nagatambong sa amon mga kombension kada tuig. Gusto mo man bala magtambong sa amon kombension subong nga tuig? Mangita sing lokasyon sang kombension nga malapit sa imo.