Sang Hulyo 2013, nagpadala ang Nagadumala nga Hubon sang mga Saksi ni Jehova sing makalilipay nga sulat sa mga misyonero kag iban pa nga ara sa pinasahi nga bug-os tion nga pag-alagad sa iban nga pungsod. Parte ini sa kahimusan nga buligan ang mga nagaalagad sa iban nga pungsod nga makatambong sa rehiyonal kag internasyonal nga mga kombension nga pagahiwaton sadto sa 2014 kag temprano nga bahin sang 2015.

Ang katuyuan sini nga kahimusan indi lang para makatambong sila sang kombension kundi para man makaupod nila ang ila pamilya ukon mga abyan. Ang sulat nagasiling nga ang organisasyon ang mabayad sang ila plete sa eroplano pakadto-pabalik.

May amo na sini nga kahimusan sadto, pero may pagbag-o subong nga tuig. Sa panuytoy sang Teaching Committee sang Nagadumala nga Hubon, ang bag-o nga departamento nga World Headquarters (WHQ) Travel, amo ang ma-book sang ila mga tiket.

Sang napadala na ang mga sulat, amat-amat nga nakabaton ang WHQ Travel sang mga request sang tiket sa eroplano. Sang Enero 2014, nagbaha na ang mga request. Ang grupo nga gin-asayn sa sini nga kahimusan nagpangita kag nag-book sang mga flight para sa mga ara sa pinasahi nga bug-os tion nga pag-alagad halin sa bilog nga kalibutan.

Pero ang pag-book sang pila ka flight indi mahapos. Ang mga ara sa Reykjavík, Iceland, kinahanglan makakadto sa Cochabamba, Bolivia. Ang iban nga halin sa Nouméa, New Caledonia, kinahanglan makakuha sang flight pakadto sa Antananarivo, Madagascar. Ang iban nga halin sa Port Moresby, Papua New Guinea, makadto sa Seattle, Washington, U.S.A., may ara man nga halin sa Ouagadougou, Burkina Faso, nga makadto sa Winnipeg, Canada.

Ang departamento nga WHQ Travel, nga may lima ka miembro, nag-book sang mga 19,000 ka flight. Paagi sa pondo nga gin-amot sang mga kongregasyon para sa sini nga katuyuan, nagbakal sila kag nagpadala sing mga tiket sa eroplano sa mga 4,300 ka magabiyahe halin sa 176 ka pungsod.

Ginaapresyar gid ini nga aman. Ang mag-asawa nga misyonero nagsulat: “Mabalik na kami subong sa amon asaynment sa Southeast Asia. Nagapasalamat gid kami sa pagbulig ninyo sa amon nga makapauli sa England, diin kami natawo, para makaupod namon ang amon pamilya sa una nga bes pagkatapos sang lima ka tuig. Kon wala ini nga aman, indi gid kami makapauli. Gani nagapasalamat gid kami sa tanan nga nagbulig para mangin posible ini.”

Ang misyonero nga nagaalagad sa Paraguay nagsulat: “Gusto gid namon magpasalamat sang akon asawa kay ginhatagan kami sing kahigayunan nga makatambong sa internasyonal nga kombension sa New Jersey, U.S.A. Sang 2011, nagsugod kami sa pagplano sang amon biyahe pakadto sa Estados Unidos para makita ang ulong talatapan. May nasupot na kami nga kuarta para sa sini. Pero sang Hunyo sina nga tuig, gin-asayn kami nga magbisita sa sign-language nga mga kongregasyon sa Paraguay. Buot silingon, pirme na kami mabiyahe. Pagkatapos namon ini mapamensaran sing maayo, nagdesisyon kami nga indi na lang magdayon sa amon biyahe sa Estados Unidos kundi mabakal na lang sing salakyan nga magamit namon sa amon bag-o nga asaynment. Dayon, nabaton namon ang sulat parte sa pagtambong sa internasyonal nga kombension. Gani, natuman gid ang amon handum! Nagapasalamat gid kami kay Jehova bangod sa kaayo kag pagpalangga nga ginpakita niya sa sini nga paagi.”

“Gusto namon ipadala ining malip-ot nga sulat para magpasalamat sing daku!” sulat sang mag-asawa halin sa Malawi. “Siguro grabe gid ang inyo pangabudlay kag daku gid nga tion kag pondo ang gingamit para ma-book ang madamo nga flight. Ginaapresyar gid namon ang inyo pagpangabudlay, kag labaw sa tanan, ang kaalwan sang organisasyon ni Jehova nga nagbulig sa amon nga makapauli para makatambong sa internasyonal nga kombension kag makaupod ang amon pamilya kag mga abyan.”

Nanamian gid ang mga ara sa WHQ Travel sa ila asaynment. “Ang pagbulig sa mga misyonero nga makapauli sa ila pamilya kag mga abyan pinasahi gid,” siling ni Mileivi. “Nakabulig ini sa akon nga maapresyar ang grabe gid nga pagpalangga sang organisasyon sa mga nagaalagad sa iban nga pungsod,” siling ni Dorise. Kag si Rodney, nga manugtatap sang departamento, nagsiling, “Nalipay gid ako nga nangin bahin ako sini nga kahimusan.”

Nalipay gid ang mga Saksi ni Jehova sa bilog nga kalibutan nga nakaamot sila sa sining mahigugmaon nga regalo para sa ila mapisan kag masinakripisyuhon nga kauturan.