Kon i-click mo ang lenguahe sang site sa sini nga pahina, makita mo ang listahan sang sobra 300 ka lenguahe. Mahimo nga wala sing pareho sini sa iban nga website!

Ikumparar naton ini sa pila ka kilala nga mga site. Binagbinaga: Sang Hulyo 2013, ang website sang United Nations mabasa sa anom ka lenguahe. Ang Europa, ang opisyal nga website sang European Union, mabasa sa 24 ka lenguahe. Ang Google naman, 71 ka lenguahe kag ang Wikipedia, 287.

Malawig nga tion ang kinahanglan para ma-translate ang isa ka website sa sobra 300 ka lenguahe. Ang kalabanan sini ginahimo sang ginatos ka Saksi ni Jehova sa bilog nga kalibutan nga gusto magdayaw kay Jehova. May organisado sila nga mga team sa kada lenguahe, kag ginagamit nila ang ila ikasarang sa pag-translate sang Ingles.

Ang jw.org may madamo nga pahina sang mga impormasyon nga gin-translate sa sobra 300 ka lenguahe. Gani, ang total sang mga pahina sa sini nga website tuman kadamo—sobra 200,000!

Ang jw.org indi lamang matigayon sa madamo nga lenguahe kundi popular man. Amo sini ang ginapakita sa website nga Alexa nga nagatipon sang impormasyon kon ano nga mga website ang pirme ginabuksan sa bilog nga kalibutan. Sa kategoriya sini nga “Relihion kag Espirituwalidad” may listahan sang mga 87,000 ka website, pati na ang iya sang nagapanguna nga mga relihion, relihioso nga mga manugbalhag, kag pareho sini nga mga organisasyon. Sa sini nga listahan, ang jw.org nagpangaduha suno sa report sang Hulyo 2013! Ang nagapanguna amo ang isa ka komersial nga site nga makabukas sang lainlain nga translation sang Biblia.

Suno sa report sang Oktubre 2013, ang jw.org ginakadtuan kada adlaw sing sobra 890,000 ka beses. Padayon kami nga magahatag sing praktikal nga impormasyon parte sa Biblia nga matigayon sang mga tawo bisan diin man sila.