Sang Oktubre 7, 2013, gin-release sang mga Saksi ni Jehova ang mobile device app para sa pagtuon kag pagbasa sang Biblia nga ginatawag JW Library. Ining libre nga app may anom ka Ingles nga translation sang Biblia, lakip ang King James Version kag ang 2013 nga rebisyon sang Bag-ong Kalibutan nga Badbad sang Balaan nga Kasulatan. *

Minilyon subong ang nagadepende sa smartphone, tablet, ukon iban pa nga gadyet kon trabaho kag komunikasyon ang hambalan. Kon amo, ngaa ginhimo pa ang JW Library kay ang mga may gadyet makakuha naman sing mga reperensia para sa pagbasa kag pagtuon sang Biblia sa jw.org?

Una, kon ma-install mo ini nga app, magamit mo ini bisan wala sing Internet. Ikaduha, gindesinyo gid ini para buligan ang nagabasa nga makita dayon ang mga teksto kag matun-an sing mas maid-id ang Biblia. Paano?

Sa una mo nga pagbukas sang JW Library, makita mo dayon ang mga ngalan sang libro sang Biblia. Kon magpili ka sing libro sang Biblia, magua dayon ang mga kapitulo. Gani makita mo dayon ang bersikulo ukon dinalan sina nga kapitulo sa sulod lang sang pila ka segundo. May madamo man ini nga feature para sa pagtuon sang Biblia:

• Footnote nga nagapakita sang kahulugan sang mga tinaga

• Cross reference ukon bersikulo sang Biblia nga naangot sa bersikulo nga ginabasa mo

• Search feature nga nagapakita kon pila ka beses gingamit ang tinaga ukon tinagpong (phrase)

• Balayan sang kaundan sa umpisa sang kada libro sang Biblia

• Listahan sang mga manunulat sang tagsa ka libro sang Biblia, lugar kon diin ini ginsulat, kag petsa kon san-o ini ginsulat kag natapos

• Seksion sang de-kolor nga mga mapa, tsart, time line, kag diagram

Pareho sang tanan nga publikasyon sang mga Saksi ni Jehova, ang JW Library wala ginapabayaran. Ining libre nga Bible app, nga gingastuhan sang boluntaryo nga mga donasyon, na-download na sang sobra isa ka milyon ka beses. (2 Corinto 9:7) Tilawi nga gamiton ini nga app kag panginpusli ining pinasahi nga portable nga librarya?