Para sa mga Saksi ni Jehova, wala na sing libro nga mas importante sangsa Biblia. Ginatun-an nila ini sing regular kag ginagamit sa pagtudlo sa iban parte sa maayong balita sang Ginharian sang Dios. (Mateo 24:14) Bangod pirme nila ini ginagamit, madasig maguba ang ila mga Biblia. Gani, ginpat-od gid sang mga Saksi nga ang ginrebisar nga 2013 nga Bag-ong Kalibutan nga Badbad sang Balaan nga Kasulatan sa Ingles mangin matahom kag mabakod.

Ining bag-o nga Biblia dapat mabakod gid. Sang gin-istorya sang mga Saksi nga representante sang imprintahan sa Wallkill, New York, U.S.A., ang presidente sang isa ka bookbinding company parte sa ila plano, ginsilingan niya sila, “Imposible gid nga makahimo sang Biblia nga gusto n’yo.” Nagdugang pa sia, “Makapasubo nga ang kalabanan nga Biblia gindesinyo para lang i-displey sa lamesa ukon ibutang sa mga bookshelf kag indi mabakod.”

Ang una nga mga edisyon sang Bag-ong Kalibutan nga Badbad indi mabakod—ang iban sini nagakalataltal kon mainit kaayo ang tiempo. Gin-usisa gid sing maayo sang mga nagaobra sa imprintahan sa Wallkill ang mga materyal para sa kober, pangpapilit, kag kon paano i-bind agod makahimo sing Biblia nga indi dayon maguba bisan pirme ginagamit kag bisan ano ang klima. Basi sa ila pag-usisa, naghimo sila sing sampol nga mga Biblia kag ginpagamit ini sa mga Saksi sa pila ka pungsod para matestingan sa lainlain nga klima, halin sa mga lugar sa Tropiko asta sa Alaska.

Pagligad sang anom ka bulan, ginbalik ang mga Biblia, kag ang mga nagaobra sa imprintahan naghimo sing mga pagbag-o sa mga sampol kag ginpadala ini liwat. Sa kabilugan, 1,697 ka Biblia ang natestingan. Grabe gid ang naagyan sang iban nga Biblia sing indi hungod. Halimbawa, ang isa naulanan sing bilog nga gab-i, kag ang isa pa gid nabahaan sang nagbagyo. Ang resulta sini nga pagtesting kag sang indi hungod nga mga hitabo nakabulig para mabal-an kon daw ano gid ini kabakod.

Sang 2011, samtang ginatestingan ang Biblia, ang mga Saksi nagbakal sang bag-o nga high-speed bindery para sa imprintahan sa Wallkill kag sa Ebina, Japan. Ginhimo ini, indi lamang para makaimprinta sang bastante nga Biblia para sa una nga paggua sini kundi para pareho ang hitsura sang mga Biblia nga imprintahon sa sining duha ka imprintahan.

Sang una nga mga binulan sang 2012, nag-imprinta ang duha ka imprintahan sang 1984 nga edisyon sang Bag-ong Kalibutan nga Badbad. Itom kag maroon ang kolor sini kag ang bag-o nga polyurethane nga materyal para sa kober ang gingamit. Pero, ang glue kag liner nga gingamit sa bag-o nga binding machine wala pa natestingan, gani nagatuwas ang kober kon itakod na ini sa Biblia. Wala nagmadinalag-on ang ila napensaran nga mga solusyon, gani gin-untat ang pag-imprinta.

Ang mga manughimo sang isa sa mga materyal nagsiling nga problema gid ang pagtuwas sang mga kober kag mabudlay ini solusyonan. Sa baylo nga maggamit sang matig-a nga kober, desidido ang mga utod nga magbalhag sang Biblia nga mahumok kag matahom ang kober. Pagligad sang apat ka bulan nga pagtesting sang mga kombinasyon sang glue kag liner, nakakita sila sang husto nga kombinasyon para makaimprinta sang Biblia nga mahumok ang kober kag wala nagatuwas.

Sang Septiembre 2012, ang mga imprintahan gin-instruksionan nga untaton ang pag-imprinta, ipaubos ang ila stock, kag maghulat sang instruksion nga imprintahon ang ginrebisar nga edisyon sang Bag-ong Kalibutan nga Badbad. Naiskedyul nga ipagua ini sa Oktubre 5, 2013, sa annual meeting sang Watch Tower Bible and Tract Society of Pennsylvania.

Nabaton sang duha ka imprintahan ang mga electronic file sang Biernes, Agosto 9, 2013, dayon ginsugdan ang pag-imprinta pagkasunod nga adlaw. Ang una nga kompleto nga Biblia naimprinta sang Agosto 15. Sa sulod sang pito ka semana, ang imprintahan sa Wallkill kag Ebina nagapanghikot sing 24-oras kada adlaw para makahimo kag makapadala sang sobra 1,600,000 ka Biblia, nga bastante para sa tanan nga matambong sa annual meeting.

Matahom kag mabakod ini nga Biblia, pero mas makagalanyat ang mensahe sini nga nagahatag sing kabuhi. Pagligad sang isa ka adlaw nga nakabaton sang Biblia ang isa ka babayi nga taga-Estados Unidos, nagsulat sia, “Bangod sa bag-o nga edisyon, mas naintiendihan ko na ang Biblia.”