Alas 6:45 pa lang sang aga sa Tuxedo, New York. Asul ang langit kag may manipis nga yelo nga nagatabon sa isa ka gamay nga linaw sa kilid sang apat ka panalgan nga bilding. Nagapasulod sa sini nga bilding ang lamharon nga mga lalaki kag babayi. Nakabayo sila sing pang-obra kag nakabotas. Subong nga aga nagbiyahe sila halin sa ila mga hotel kag mga dalayunan sa lainlain nga estado—Patterson, Wallkill, kag ang iban sa Brooklyn pa, nga mga 80 kilometros.

Pero antes sini nga adlaw, ang kalabanan sa ila mas malayo pa ang ginhalinan, sa tanan nga bahin sang United States kag iban pa. Nagboluntaryo sila nga mag-obra diri—ang iban isa ka semana, ang iban anom ka semana, kag ang iban mas malawig pa. Kaugalingon nila nga gasto ang pagkadto diri, kag wala sing bayad ang ila serbisyo pero nalipay sila.

Mga 120 ang boluntaryo sini nga aga, pero magadamo pa ini sa masunod nga mga binulan. Nagdiretso sila sa dining room kag nagpungko, tig-napulo sa kada lamesa. Madamo ang nagpangape dayon kag nasimhutan na nila ang bacon halin sa kusina. Pag-abot sang alas 7:00, nakita nila sa telebisyon ang pagbinagbinag sang teksto para sa sini nga adlaw. Pagligad sang kinse minutos, ang mga weyter nagbutang na sing pamahaw. Magluwas sa bacon, may tinapay, itlog, kag oatmeal. Bugana gid ang pagkaon.

Pagkatapos sang kaon, may nagatakop nga pangamuyo, kag ang tanan maobra na. Ang mga naasayn sa konstruksion malipayon nga nagaistoryahanay samtang nagasuksok sang ila hard hat, safety glasses, high-visibility vest, kag heavy tool belt.

Ang ila hilikuton amo ang pagbag-o sang bilding anay sang International Paper Company sa Tuxedo. Himuon ini nga lugar para magsuportar sang konstruksion sang ulong talatapan sang mga Saksi ni Jehova sa Warwick, mga pila ka kilometros halin diri. Sa Tuxedo, ang mga bilding ginahimo nga mga kuarto nga ilistaran kag mga opisina, kag subong man workshop kag bodega. Sang Martes, Marso 12, 2013, ginhatag sang local planning board ang conditional approval sa plano sang site sa Tuxedo.

Paano ginaabiabi ang temporaryo nga mga boluntaryo sa una nila nga pag-abot sa ila mga dalayunan? “Pag-check-in mo,” siling ni William, halin sa New Jersey, “ginatudluan ka sang mga utod sa front desk—kon diin ang imo kuarto, diin ang importante nga mga lugar, kag diin gamiton ang mga yabi. Ginabuligan ka gid sang tanan. Pag-abot mo sa Tuxedo, ipakilala ka sa imo crew leader pagkatapos pamahaw kag ipaathag niya kon ano ang imo ulubrahon.”

Ano ang ginasiling sang mga nagaboluntaryo diri? Si Yajaira kag ang iya bana naghalin sa Puerto Rico, kag nagabulig sila sa framing kag drywall. “Nagabugtaw kami mga alas 4:30 pa lang,” siling niya. “Tinluan namon ang amon apartment, mangape, kag makadto na sa bus nga nagasugat-dul-ong sa amon. Kapoy gid kami pagkagab-i, pero daw wala kami nagauntat kadlaw. Malipayon gid ang tanan.”

Ang site sa Warwick ginapalibutan sang kagulangan. Si Zach kag ang iya asawa nga si Beth, nga taga-Minnesota, nagabulig sa paghanda sang site. Sang ginpamangkot sila kon ngaa nagkadto sila diri, si Beth nagsiling: “Para sa amon, wala na sing iban pa nga katuyuan ang kabuhi kundi ang mag-alagad kay Jehova. Gusto namon gamiton ang amon ikasarang sa pag-alagad sa iya.”