Sang Agosto 2014, ang mga Saksi ni Jehova sa bilog nga kalibutan nagpanghatag sing tract para ipakilala ang jw.org. Bangod sini, nagdamo sing sobra 20 porsiento ang nagbukas sang website sina nga bulan, nga naglab-ot sa halos 65 ka milyon. Sa bilog nga kalibutan, halos 10,000 ka tawo ang nagpangabay sing libre nga pagtuon sa Biblia sa puluy-an paagi sa site​—sobra ini sing 67 porsiento sa nagligad nga bulan! Ini nga kampanya nakabulig sa mga tawo bisan diin.

Gintamyaw sang isa ka Saksi sa Canada si Madeline sa elebeytor kag ginpakita sa iya ang tract nga Diin Makita ang Sabat sa Importante nga mga Pamangkot sa Kabuhi? Nagsiling si Madeline nga sang gab-i antes sini, ara sia sa ila balkonahe nga nagapangamuyo sing hugot nga buligan sia sang Dios nga masabat ini nga mga pamangkot. Nangabay sia sadto sa pila ka relihion nga tun-an sia Biblia, pero wala gid sing may nagkadto sa iya. Sang ulihi, nagsugod sia sa pagtuon sa Biblia upod sa mga Saksi ni Jehova.

Sa Pilipinas, naistorya ni Rowena ang isa ka Chinese nga lalaki nga nagatindog sa atubangan sang fast-food nga restawran. Ginhatagan niya sia sing tract kag ginpaathag nga gusto sang mga Saksi ni Jehova nga buligan ang mga tawo nga makabenepisyo sa libre nga edukasyon halin sa Biblia.

Nagsiling ang lalaki nga wala pa gid sia makakita sang Biblia. Ang masunod nila nga pag-istoryahanay nagpahulag sa lalaki nga magtambong sa asembleya sang mga Saksi ni Jehova. Pagkatapos sini, nagsiling ang lalaki nga gusto niya magtuon sing dugang pa parte sa Biblia kag nagaplano sia nga mag-download sang Biblia sa aton website.

Nakita liwat ni Guillermo, nga isa ka apa nga Saksi sa Spain, ang schoolmate niya sang una nga si Jorge, nga isa man ka apa. Nagsiling si Jorge nga bag-o lang napatay ang iya iloy kag madamo sia sing pangduhaduha kag mga pamangkot. Ginhatagan sia ni Guillermo sing tract kag ginpaathag kon paano niya makita sa jw.org ang impormasyon sa sign language nga makasabat sa madamo niya nga pamangkot. Gin-agda man ni Guillermo si Jorge nga magtambong sa miting sa Kingdom Hall. Nagkadto si Jorge, kag halin sadto, nagatambong gid sia sa mga miting, bisan pa 60 ka kilometro ang kalayuon sang iya balay pakadto sa Kingdom Hall.

Sa Greenland, ang duha ka Saksi nga mag-asawa nagsakay sa baruto sing anom ka oras pakadto sa isa ka komunidad nga may 280 ka pumuluyo. Daku ang ila gingasto para mahimo ini. Ginbantalaan nila ang mga tawo didto, ginhatagan sing mga tract, kag ginpatan-aw sing Greenlandic nga video sa jw.org. Nakasugod man sila sing pagtuon sa Biblia sa isa ka mag-asawa nga ila naistorya. Subong, nagatuon sila sing duha ka beses kada semana paagi sa telepono.

Ini nga mga panikasog wala lamang ginhimo sa sina nga lugar. Ang mga Saksi sa Nicaragua nagpanghatag sing tract sa nagahambal sing Mayangna nga mga tawo sa kagulangan sang Caribbean. Pagkatapos sang ila 20 ka oras nga sigesige nga pagbiyahe sa kagangkagang nga bus kag batsihon nga dalan, naglakat sila sing 11 ka oras, kag kon kis-a nagalubong pa sa lunang, para makalab-ot sa sini nga komunidad. Ginhatagan nila ang mga tawo didto sing mga tract kag ginpatan-aw sing mga video sa Mayangna nga lenguahe. Nagdayaw gid sila kag nalipay sa sini.

Si Estela nagtanyag sing tract sa isa ka lalaki nga naglabay sa gamay nga banwa sa kagulangan sang Amazon sa Brazil. Ginbaton sang lalaki ang tract, pero ginsulod niya ini sa iya bulsa kay indi sia interesado. Pagpauli niya, ang motor sang iya baruto naguba kag wala sia makahalin sa suba. Samtang nagahulat sia nga may mabulig sa iya, ginbasa niya ang tract. Paagi sa iya cell phone, ginbuksan niya ang jw.org, diin ginbasa niya ang pila ka artikulo kag gin-download ang pila ka video. Pila ka adlaw sang ulihi, naistorya sang lalaki ang bana ni Estela kag ginpangabay sia nga pasalamatan si Estela bangod sa tract. “Ang mga artikulo nga akon ginbasa samtang ara ako sa suba nagpakalma sa akon asta nga may baruto nga nag-abot para buligan ako,” siling niya. “Nanamian gid ang akon mga bata sa mga video parte kay Caleb. Buksan ko gid pirme ang jw.org.”